Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA 39

Tubu na Senikau ena iTitoko i Eroni

Tubu na Senikau ena iTitoko i Eroni

RAICA mada na senikau kei na amodi dreu e tubu tiko ena kau oqo. Oqori na ititoko i Eroni. Era tubu ena loma ni dua ga na bogi. Meda raica mada se cava e vakavuna.

Era veilakoyaki voli na Isireli ena vanua liwa. Ra nanuma e so ni sega ni dodonu me nodra iliuliu tiko o Mosese, se me bete levu o Eroni. Eratou duavata kina o Kora, Tecani, Epairami, kei ira tale na 250 era veiliutaki tiko. Era qai mai kaya vei Mosese: ‘Na cava o viavia lewa tiko kina vei keimami?’

A kaya o Mosese vei Kora kei na nona ilawalawa: ‘Dou kauta mai ni mataka ina vale ni Kalou na nomudou miqa. Me biu mai kina na ka boi vinaka. Eda na qai raica se o cei e digitaka o Jiova.’

Ena siga tarava eratou sa lako yani ina valeniveitavaki o Kora kei ira na lewe 250 na nona ilawalawa. Lewe vuqa tale era lako vata yani kei iratou. E vakacudrui Jiova sara ga vakalevu na ka oqo. E kaya o Mosese: ‘Dou lako tani mai na nodra valelaca na tamata ca oqo. Dou kua ni tara e dua na nodra iyaya.’ Era rogoci koya na tamata ra qai lako tani mai na valelaca i Kora, Tecani, kei Epairami.

Sa qai kaya tale o Mosese: ‘Na ka oqo dou na kila kina se digitaki cei o Jiova. Ena tadola na qele qai tilomi ira na tagane ca oqo.’

Ni oti ga nona vosa o Mosese a tadola na qele qai tiloma na valelaca i Kora kei na nona iyaya kece, Tecani kei Epairami kei ira na tiko kina, ra qai bulu vakadua. Nira rogoca na tamata na tagi era kailavaka: ‘Meda dro! De tilomi keda tale ga na qele!’

E se tiko voleka ga ena valeniveitavaki o Kora kei ira na 250 qai biuta mai e dua na bukawaqa o Jiova mera kama kece kina. Sa qai kaya o Jiova vei Eliesa na luve i Eroni me ubia na icabocabonisoro ena nodra miqa na tamata mate. Nona cakava oya e vakaroti ira kina na Isireli ni o Eroni ga kei ira na luvena tagane e dodonu mera bete i Jiova.

Ia e via vakamatatataka sara vakavinaka o Jiova ni digitaki Eroni ga kei ira na luvena tagane mera bete. E kaya kina vei Mosese: ‘Mera dui kauta mai na nodra ititoko na iliuliu ni veiyavusa e Isireli. Me kauta mai o Eroni na nona ititoko ena vukudra na yavusa i Livai. Mera mai biu kece ena mata ni kato ni veiyalayalati ena loma ni valeniveitavaki. Ena tubu na senikau ena ititoko i koya au sa digia me bete.’

Ni rai yani o Mosese ena mataka tarava sa tubu tu na senikau kei na amodi dreu ena ititoko i Eroni! O sa qai kila na vuna e tubu tiko kina na senikau ena ititoko i Eroni?