Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA 30

Na Vunikau Kama

Na Vunikau Kama

E LAKO ina ulunivanua o Orepi o Mosese me vakani ira kina na sipi. A raica ni kama tiko e dua na vunikau, ia e sega ni oti rawa!

E nanuma kina o Mosese, ‘E duatani na ka oqo, meu lai raica mada.’ Ni voleka yani e rogo mai kina e dua na domo e vaka oqo: ‘Kua ni lako voleka mai. Luvata nomu ivava, ni qele tabu o butuka tu.’ E vosa tiko mai na Kalou ena gusu ni agilosi, mani ubia kina o Mosese na matana.

Sa qai kaya na Kalou: ‘Au raica nira bula rarawa tiko na noqu tamata ena vanua o Ijipita. Au na sereki ira, o iko sara ga au na tala mo lai kauti ira tani mai Ijipita.’ Ena kauti ira na nona tamata o Jiova ina vanua rairai vinaka o Kenani.

E qai kaya o Mosese: ‘Era sega tu ni kilai au. Meu na cakava vakacava? Niu lako yani era na taroga mai na Isireli: “O cei e talai iko mai?” Na cava meu kaya?’

E sauma yani na Kalou. ‘Oqo na ka mo na lai kaya: O JIOVA na Kalou i Eparama, na Kalou i Aisake, kei na Kalou i Jekope e talai au mai vei kemuni.’ Sa qai kaya tale o Jiova: ‘Oqo na yacaqu me tawamudu.’

E sauma o Mosese: ‘Ia vakacava ke ra sega ni vakabauta ni oni talai au yani?’

E taroga na Kalou, ‘Na cava o taura tiko?’

E sauma o Mosese: ‘Na ititoko.’

‘Viritaka ina qele,’ e kaya na Kalou. Ni sa viritaka, e qai vuki me gata. E vakaraitaka tale e dua na cakamana vei Mosese. E kaya: ‘Biuta na ligamu ina nomu loma ni kote.’ E cakava o Mosese, ia ni biuta mai i tuba na ligana e sa vulavula taucoko tu! E vaka na tauvi vukavuka. Oti sa qai vakaraitaka o Jiova vei Mosese na ikatolu ni cakamana. E kaya: ‘Ni o sa cakava na cakamana e tolu oqo ena matadra na Isireli, era na vakabauta niu talai iko yani.’

Ni oti oqori sa lai tatau vei Jecoro o Mosese qai kaya: ‘Yalovinaka meu lesu tale vei ira na wekaqu i Ijipita meu lai raici ira.’ Sa rau veitalatala na veivugoni, mani lesu tale yani i Ijipita o Mosese.