Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA 28

Nona Vakabulai na Gone o Mosese

Nona Vakabulai na Gone o Mosese

RAICA mada na gonelailai e tagi tiko oqori, e tara tiko na iqaqalo ni liga i koya na yalewa. Oqo o Mosese. O kilai koya na yalewa rairai vinaka oqori? Oqori na luve i Fero, e raluve ni Ijipita.

E vula tolu nona vunitaki Mosese tiko na tinana, ni sega ni vinakata mera vakamatei koya na kai Ijipita. Ia e kila tiko ni na rawa ni kune o Mosese, sa qai cakava na ka me vakabulai koya kina.

A cakava sara vakavinaka e dua na kato me kua ni curuma na wai. E vakadavori Mosese e loma qai biuta na kato ena veico babalavu ena bati ni Uciwai na Naile. A tukuni vei Miriama na gane i Mosese me vakaraica tiko na cava ena yaco.

Sega ni dede sa lako yani na luve i Fero me lai sili ena Uciwai na Naile, qai kunea sara na kato. A kaci yani vua e dua na nona yalewa dauveiqaravi: ‘Lai kauta mai vei au na kato oya.’ Ni dolava na kato na raluve, e raica ni sa tagi tiko na gone rairai vinaka o Mosese, qai lomani koya sara vakalevu. E sega ni vinakata me vakamatei.

O raica rawa ni mai vosa tiko vei luve i Fero o Miriama? E taroga: ‘Meu lai kauta beka mai e dua na yalewa ni Isireli me susuga vei iko na gone?’

E kaya na raluve, ‘yalovinaka lai kauti koya mai.’

A cici yani vakatotolo o Miriama me lai tukuna vei tinana. Ni yaco mai na tina i Mosese, e kaya vua na raluve: ‘Kauta na gone, lai susuga me noqu, au na saumi iko.’

Sa qai lai susugi Mosese ga o tinana. Ni sa qase cake mai, a kau tale yani vei luve i Fero, me lai susuga me vaka e luvena dina. Oqo na vuna e lai susu tu mai kina o Mosese ena vale i Fero.