Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA 21

Era Cati Josefa na Tuakana

Era Cati Josefa na Tuakana

RAICA mada na rarawa kei na nona rairai vakaloloma o Josefa. Eratou se qai volitaki koya ga na tuakana vei ira na turaga oqo era lako tiko i Ijipita. Ena lai vakabobulataki e kea. Na cava eratou cakava kina na ka ca oqo na tuakana?

Baleta ni ratou vuvutaki Josefa, ni dau taleitaki koya vakalevu o Jekope na tamadratou. Dua na siga a lolomataka o Jekope vua na nona gonenitoko e dua na kote balavu rairai vinaka. Tekivu sara ga e kea nodratou vuvutaki Josefa na tuakana kei na nodratou cati koya. Ia, e tiko tale e dua na vuna eratou cati koya kina.

A rua na tadra i Josefa. Ratou cuva tiko vua na tuakana e lewe 10 ena nona tadra ruarua oqori. Ni talanoataka vei iratou sa qai kuria ga na nodratou sega ni taleitaki koya.

Dua gona na siga ni ratou lai vakana sipi na tuakana, a kaya vei Josefa o Jekope me lai raici iratou mada. Ni ratou se qai raici koya ga, sa ratou kaya cake mai e so: ‘Me datou vakamatei koya.’ Sa qai kaya o Rupeni, o koya e qase duadua vei iratou: ‘Sega, dou kua ni cakava oqori!’ Ratou muria na vosa i tuakadratou, ratou qai viritaki Josefa ga ina dua na ikeliwai qai bosei na ka me caka vua.

Ena gauna vata oqori era lako tiko yani kina e so na luve i Isimeli. Mani kaya sara o Juta: ‘Tou volitaki koya vei ira na luve i Isimeli.’ Ratou qai volitaki Josefa sara ena 20 na tiki ni siliva. Sa dua dina na ka vakaloloma!

Na cava eratou na lai tukuna vei tamadratou? Ratou vakamatea e dua na me qai toni ena kena dra na kote rairai vinaka i Josefa me kau vei tamadratou. Eratou lai kaya: ‘Keitou kunea oqo, e kote beka i Josefa?’

Ni raica ga o Jekope sa tagicaka: ‘Sa kani koya beka e dua na manumanu.’ Oqori sara ga na ka eratou vinakata me vakabauta. E rarawataka dina o Jekope. A tagi tiko me vica vata na siga, ia e sega ni mate o Josefa. Meda raica mada se cava a qai yacovi koya.