Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA 14

Vakatovolea na Vakabauta i Eparama na Kalou

Vakatovolea na Vakabauta i Eparama na Kalou

O RAICA na ka e cakava tiko o Eparama? E taura tu e dua na isele, kena irairai ni via vakamatei luvena tiko. Na cava beka na vuna? Ni bera nida sauma na taro oya, da raica tale mada se rau a vakaluveni vakacava o Eparama kei Sera.

Nanuma tiko ni a yalataka vei rau na Kalou ni na dua na luvedrau tagane. E rairai dredre oqo ni rau sa qase sara. Ia e vakabauta o Eparama ni sega ni dua na ka e dredre vua na Kalou. Na cava a yaco?

Oti e dua na yabaki nona yalayala vei rau na Kalou, a qai sucu o Aisake na luvedrau tagane. Sa yabaki 100 o Eparama ena gauna oya, e yabaki 90 o Sera. Sega ni guilecava na Kalou nona yalayala!

A vakatovolea na vakabauta i Eparama na Kalou ni sa cauravou o Aisake. A kaya vua: ‘Eparama!’ Sauma mai o koya: ‘O yau oqo!’ Kaya tale na Kalou: ‘Kauta na luvemu e dua bau ga o Aisake, lako ina ulunivanua au na vakaraitaka vei iko. Vakamatei koya me isoro.’

E rarawataka dina na vosa oqori o Eparama ni lomani luvena vakalevu. Ia, vakacava nona yalataka na Kalou nira na tawana na vanua o Kenani na luve i Eparama? Ena qai rawa vakacava ke sa na mate o Aisake? Dina ni sega ni kila o Eparama se cava na vuna e kaya kina vua na Kalou me cakava na ka oqori, e talairawarawa ga vua.

Ni rau sa yaco yani ina ulunivanua, a vesuki Aisake sara o Eparama, vakadavori koya ina icabocabonisoro, qai ucuna mai na isele me vakamatei koya. Na gauna vata oqori a rogo mai kina nona vosa e dua na agilosi ni Kalou: ‘Eparama, Eparama!’ A sauma o Eparama: ‘O yau oqo!’

E kaya mai na Kalou: ‘Mo kua ni vakamatea na gone se kitaka vua e dua na ka. Au sa qai kila ni o vakabauti au, ni o sega ni bureitaka na luvemu vei au, na luvemu dua bau.’

O Eparama e vakabauta vakalevu na Kalou. E vakabauta o koya ni sega ni dua na ka e dredre vei Jiova, ena rawa ni vakaturi Aisake tale mai na mate. Ia a sega ni inaki i Jiova me vakamatei Aisake o Eparama. A cakava gona na Kalou me tao e dua na sipi ena dua na veikau, qai kaya vei Eparama me vakacabora me isosomi kei luvena.