Raica sara na lewena

Raica na lewenivola

 ITALANOA 4

Vu ni Nodrau Cemuri

Vu ni Nodrau Cemuri

RAICA na ka sa yaco oqo. Rau sa cemuri mai na were totoka o Iteni o Atama kei Ivi. O kila na vuna?

Baleta ni rau cakava e dua na ka e vakatabui vei rau. E totogitaki rau gona kina o Jiova. O kila na cava erau cakava?

Rau a cakava e dua na ka a vakatabuya vei rau na Kalou. A kaya vei rau ni rawa me rau kana mai na kau ena were, ia e dua ga na kau me rau kua ni kania na vuana, de rau na mate kina. E nona na Kalou na kau oya. Eda kila ni cala na noda lai taura e dua na ka e sega ni noda, se vakacava? Ia, na cava sa qai yaco?

Dua na siga ni tiko voli ena were o Ivi, a qai vosa vua e dua na gata. Vakasamataka mada oya! E tukuna vei Ivi me kania na vuanikau a vakatabuya vei rau na Kalou. Ia a sega ni bulia na gata o Jiova mera vosa. Sa kena ibalebale ga ni dua tani tale e vosa tiko mai na gusu ni gata. O cei beka?

Sega ni o Atama. Kena ibalebale ni dua ga vei ira a buli e liu ni se bera ni bulia na vuravura o Jiova. O ira oya era agilosi, eda sega ni raici ira. A qai dokadoka gona e dua vei ira. E nanuma ni dodonu me veiliutaki tale ga me vaka na Kalou. E vinakata mera talairawarawa vua na tamata, mera kua ni talairawarawa vei Jiova. Oqo sara ga na agilosi a vosa mai na gusu ni gata.

A vakaisini Ivi na agilosi oqo. E tukuna vei Ivi ni na vaka na Kalou ke kania na vuanikau, a vakabauti koya o Ivi. Mani kania sara na vuanikau, vaka tale ga kina o Atama. Rau sa talaidredre sara ga e keri vua na Kalou o Atama kei Ivi, oqori na vuna erau cemuri kina mai na nodrau were totoka.

Ia ena dua na siga, ena qai raica na Kalou me veisautaki na vuravura taucoko me dua na were totoka me vakataki Iteni. O na qai vulica se o rawa ni vakaitavi vakacava ena kena veisautaki na vuravura oqo me vaka tale na were o Iteni. Ia meda raica mada se cava a qai yacovi Atama kei Ivi.