Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA 10

Na Waluvu Levu

Na Waluvu Levu

ENA taudaku ni waqa, era cakava voli ga na lewenivanua na ivalavala ni nodra bula makawa. Era se sega tiko ga ni vakabauta ni na yaco mai na Waluvu. A sivia beka na nodra veidredrevaki, ia a qai tini botoilevu.

Vakasauri ga sa tekivu tasova na wai mai lomalagi, e vaka sara ga ni o sova na wai mai na dua na vokete. A dina ga o Noa! Ia ke dua e via vodo e waqa ena gauna oqo sa bera, baleta sa sogota vakadua na katuba o Jiova.

Sega ni dede sa luvu na veibuca. Sa dave na wai me vaka na uciwai, era bale na veivunikau, e rogo levu na veiqiqiyaki ni vatu lelevu. Era rere na tamata. Era kaba ena vanua cecere. Io, oqo era diva tale mera a rogoci Noa, mera vodo i waqa ni a se dola tu vei ira na kena katuba! Ia sa bera.

Sa toso cake tiko ga na cere ni wai. E 40 na siga 40 na bogi taucoko na kena tau tiko na uca. Sa qai toso cake sara ina yasa ni veiulunivanua, sega ni dede sa ra dromu na veiulunivanua cecere. Me vaka ga a kaya na Kalou, nira na mate kece na tamata kei na manumanu era tiko e tuba. O ira ga na tiko e loma era na bula.

A maqosataki dina na waqa a taya o Noa kei iratou na luvena. Ni yacova ga na wai, e vude sara qai mai ciri tu yani. Ena dua na siga ni sa oti na tau ni uca, a tekivu cila sara mai na siga. Kemudou! Sa dua tu ga na wasawasa levu na vanua taucoko, na ka duadua ga e rawa ni kune, oya na waqa ni veiciriyaki voli.

Era sa sega tale ni qai veivakaleqai na tuwawa, nira sa yali. Era sa mate kece, vaka kina na tinadra kei ira kece na vo ni tamata ca. Ia na cava sa yacovi ira na tama ni tuwawa?

Era sega ni tamata vakataki keda. Era agilosi ra qai lako mai vuravura mera mai bula voli kina vakatamata. Ia ni sa yaco mai na Waluvu era a sega ni mate nira a biuta laivi tu mai na yagodra vakatamata, era lesu i lomalagi me vaka na agilosi. Era sega tale ni qai vakatarai mera lewe ni vuvale ni agilosi ni Kalou. Ra yaco mera agilosi i Setani, e vakatokai ira na iVolatabu mera timoni.

Sa qai vakavuna na Kalou me liwa na cagi, mani lutu vakamalua kina na wai ni Waluvu. A qai kasa na waqa ena dua na ulunivanua ni oti e lima na vula. Ni sivi tale e vica vata na siga, eratou sa raica rawa na veiulunivanua na tiko e loma ni waqa. Sa toso sobu tiko ga na cere ni wai.

Sa qai sereka o Noa e dua na reveni mai na waqa me vuka i tuba. E vuka yani vakalailai qai lesu tale mai, vuka yani, lesu tale mai, ni se sega ni dua na vanua vinaka me ro kina, ia ena waqa ga.

A via kila o Noa se sa mamaca na vanua, mani tala yani e dua na ruve. Ia a lesu tale ga mai o koya ni sega na vanua me ro kina. Ni lesu mai ena ikarua ni gauna sa tokia tiko mai e dua na drau ni olive. Kila sara o Noa ni sa lutu sobu sara na wai. A tala tale na ruve ena ikatolu ni gauna, a sega ni lesu mai ni sa kunea na vanua mamaca me bula kina.

Sa qai kaya na Kalou vei Noa: ‘Lako tani mai na waqa. Kauti iratou tani mai na nomu vuvale kei ira na manumanu.’ E sivia na dua na yabaki na nodratou tiko voli e loma ni waqa. Eda rawa ni vakasamataka na levu ni nodratou marau ni ratou sa sobu mai na waqa qai butuka tale na qele mamaca kei na nodratou vakavinavinakataka na nodratou a vakabulai.