Raica sara na lewena

Raica na lewenivola

 ITALANOA 6

Na Cauravou Vinaka kei na Cauravou Ca

Na Cauravou Vinaka kei na Cauravou Ca

RAICI Keni mada kei Epeli, erau sa cauravou. O Keni e dauteitei, e tei covuata, kauvuata, kei na kakana draudrau.

O Epeli e dauvakatawa sipi, qai taleitaka na qaravi ira na lami. Nira sa lelevu mai na sipi sa na vakatawa o Epeli e dua na qelenisipi.

Ena dua na siga rau a kauta vua na Kalou na nodrau isolisoli o Keni kei Epeli. E kauta yani e so na vuaniqele o Keni. O Epeli na nona sipi vinaka duadua. A marautaki Epeli kei na nona isolisoli o Jiova, ia e sega ni marautaka na isolisoli i Keni. O kila na vuna?

E sega wale ga ni vinaka cake na isolisoli i Epeli, ia e tamata vinaka tale ga. E dau lomani Jiova kei na tuakana. Ia e ca o Keni ni sega ni lomani tacina.

A tukuna gona na Kalou vei Keni me veisautaka na nona itovo. Ia e sega ni via vakarorogo o Keni. E cudru vakalevu baleta ni taleitaki Epeli na Kalou. Sa qai kaya o Keni vei Epeli, ‘Daru lako ina were.’ Ni rau sa tiko taurua ga a qai mokuti Epeli vakaukaua o Keni, mani mate sara kina. Sa dua dina na ka vakaloloma.

Dina ni sa mai mate o Epeli, ia e sega vakadua ni guilecavi koya na Kalou. E se nanumi koya tiko ga baleta ni a tamata vinaka. O koya gona, dua na siga ena vakabulai koya tale mai o Jiova. Sa na rawa ni mai bula e vuravura me tawamudu. Sa na totoka dina meda veikilai kei ira na tamata vinaka me vakataki Epeli, se vakaevei?

Na Kalou e sega ni taleitaki ira na vakataki Keni. Ni a vakamatei tacina, e totogitaki koya na Kalou ena nona vakatalai koya tani mai vei iratou na nona vuvale. Nona lako tani o Keni me lai tiko ena dua na yasa i vuravura, a kauta e dua na ganena me watina.

Yaco na gauna me rau vakaluveni o Keni kei watina. Era vakawati tale ga ra qai vakaluveni na vo ni luve i Atama kei Ivi. Sega ni dede sa ra le levu na tamata e vuravura. Meda raica mada e so vei ira.