Raica sara na lewena

Raica na lewenivola

 ITALANOA 7

Dua na Turaga Yaloqaqa

Dua na Turaga Yaloqaqa

NI SA tubu na iwiliwili ni tamata e dela i vuravura, e levu era vakataki Keni nira cakava na ka ca. Ia e dua na turaga a duatani, na yacana o Inoki. E turaga yaloqaqa. Dina ga ni tu vata kei ira na tamata daucaka ca, ia e tomana tiko ga na nona qarava na Kalou.

O kila na vuna era daucakava kina e levu na ka ca na tamata ena gauna oya? Ia vakasamataka mada, o cei a vakavuna me rau talaidredre vua na Kalou o Atama kei Ivi, ena nodrau kania na vuanikau a vakatabuya vei rau na Kalou? Io, e dua na agilosi ca, e vakatokai koya na iVolatabu me o Setani. E saga tiko ga o koya me rawai keda kece meda ca.

Dua na siga a lesi Inoki na Kalou o Jiova me tukuna vei ira na lewenivanua e dua na itukutuku era sega sara ga ni via rogoca. E tukuni vaka oqo: ‘Dua na siga ena vakarusai ira kece na tamata ca na Kalou.’ A rairai vakacudrui ira vakalevu na itukutuku oqo, de dua ra via vakamatei Inoki sara ga kina. Sa na gadrevi gona vua na yaloqaqa me tukuna kina vei ira na lewenivanua na veika sa na vakarau cakava na Kalou.

A sega ni laiva na Kalou me bula dede o Inoki ena kedra maliwa na tamata ca. A bula voli o koya me 365 wale ga na yabaki. Na cava eda kaya kina ni ‘365 wale ga na yabaki’? Baleta nira kaukaua cake vei keda nikua na lewe i vuravura ena gauna oya qai balavu tale ga na nodra bula. O Mecusela mada ga na luve i Inoki, a 969 na yabaki ni nona bula!

Ia, ni sa mate o Inoki, sa qai torosobu tiko ga na itovo ni tamata. E kaya na iVolatabu ni ‘sa ca ena veigauna kece ga na ka era nanuma,’ oya na vuna a ‘vakasinaiti kina o vuravura ena ivalavala kaukaua.’

O kila beka e dua na vuna sa rui levu kina na leqa e vuravura ena gauna oya? Baleta ni a vakayagataka o Setani e dua na iwalewale vou mera rawai kina na tamata ena caka ca. Oqori na ka eda na qai vulica ena wase tarava.