Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA 3

iMatai ni Tagane kei na Yalewa

iMatai ni Tagane kei na Yalewa

NA CAVA e duidui ena iyaloyalo oqo? Io, sa kune kina na tamata. Oqo o rau na imatai ni tagane kei na yalewa. O cei e buli rau? Na Kalou. O kila na yacana? O Jiova. Na yacadrau na tagane kei na yalewa oqo o Atama kei Ivi.

A buli Atama vakacava na Kalou? E vakayagataka na kuvuniqele me bulia kina e dua na yago vinaka vakaoti. E yago ni tagane. Sa qai uvuca na cagi ena qaraniucu i Atama me bula kina.

A solia vei Atama e dua na cakacaka na Kalou o Jiova. A kaya vua me vakayacani ira na manumanu. A rairai wanonovi ira dede na manumanu o Atama ni bera ni vakatokayacataki ira ena yaca veiganiti. Ia a raica rawa e dua na ka ni vakayacani ira tiko na manumanu. O kila se cava oya?

Era vakaisa kece na manumanu. Era tiko na elefaniti tagane kei na elefaniti yalewa, na laione tagane kei na laione yalewa. Ia o Atama e sega na kena isa. Sa qai cakava o Jiova me moce lutu o Atama, qai ucuna mai sarisarina e dua na sui. Mani bulia sara kina e dua na yalewa me kena isa se watina.

Dua na ka na levu ni marau i Atama! Bau marau tale mada ga o Ivi me mai bula tu ena dua na were totoka vaka oqo! Sa rawa ni rau vakaluveni me rau marautaka na bula kei ira na luvedrau.

A vinakata o Jiova me rau bula tawamudu o Atama kei Ivi. A vinakata me rau teivaka na vuravura taucoko me vaka na were totoka o Iteni. Sa na wacava mada na levu ni nodrau marau o Atama kei Ivi ni rau vakasamataka na itavi a soli vei rau. Ke o bula ena gauna oya, o na taleitaka beka mo veivuke ena kena vakarairaivinakataki o vuravura? Ia a sega ni dede na nodrau marau o Atama kei Ivi. Meda raica mada na vuna.