Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 IKURI

E Tukuna na Parofisai i Taniela na Gauna ena Tadu Mai Kina na Mesaia

E Tukuna na Parofisai i Taniela na Gauna ena Tadu Mai Kina na Mesaia

A BULA voli na parofita o Taniela ni se vo tu e 500 vakacaca na yabaki me qai sucu o Jisu. Ia a vakatakila vei Taniela o Jiova eso na itukutuku ena vakarawarawataka noda kila na gauna ena lumuti, se lesi kina o Jisu me Mesaia, se Karisito. Qo na ka a vakatakilai vei Taniela: “Mo kila, me matata vei iko ni na 7 na macawa, ena 62 tale ga na macawa mai na gauna e vakaroti kina me tara tale o Jerusalemi me yacova na Mesaia na iLiuliu.”Taniela 9:25.

Me rawa nida qai cakacakataka na yabaki a tadu mai kina na Mesaia e bibi meda kila mada e liu na yabaki a “vakaroti kina me tara tale o Jerusalemi.” E vakamacalataki ena itukutuku e vola o Niemaia ni a tukuni me tara tale na bai kei Jerusalemi “ena ika20 ni yabaki i Tui Atakisekise.” (Niemaia 2:1, 5-8) Era vakadeitaka na kenadau ni mai dua vinaka na yabaki na veiliutaki nei Atakisekise ena 474 B.G.V. Kena ibalebale, na ika20 ni yabaki ni nona veiliutaki na 455 B.G.V. Qori sara ga na yabaki meda tekivu wiliwili kina.

Ia ke da sa tekivu wiliwili, me vakacava na kena balavu? E kaya na parofisai ni balavu ni gauna oya me qai yacova na tadu mai ni “Mesaia na iLiuliu” e “7 na macawa, ena 62 tale ga na macawa”—69 taucoko na macawa. E vica na yabaki qo? E vakamacalataki ena so na vakadewa ni iVolatabu ni “macawa” e sega ni dusia tiko na macawa eda dau kila tu, me vitu na kena siga. Qo e macawa ni veiyabaki. Kena ibalebale e tiko kina e vitu na yabaki. Na wasewasei ni yabaki va qo e dau matau vei ira na Jiu ena gauna makawa. Me kena ivakaraitaki, a dua na nodra Yabaki ni Vakacecegu ena veiyavitu na yabaki, me vaka ga na nodra Siga ni Vakacecegu ena veiyavitu na siga. (Lako Yani 23:10, 11) O koya gona na 69 na macawa e cavuti ena parofisai e dusia tiko e 69 na macawa e yavitu na yabaki, se 483 taucoko na yabaki.

Sa qai vo ga meda tekivu wiliwili. Ke da wilika e 483 na yabaki mai na yabaki 455 B.G.V. eda na yacova na yabaki 29 G.V. Qori sara ga na yabaki ni papitaiso i Jisu, yaco kina me Mesaia! * (Luke 3:1, 2, 21, 22) E vakasakiti dina na vakayacori ni parofisai qo se vakaevei?

^ para. 2 E 454 na yabaki ke da wilika mai na 455 B.G.V. me yacova na 1 B.G.V. A dua tale na yabaki mai na 1 B.G.V. me yacova na 1 G.V. (sega ni dua na yabaki na saiva). Qai 28 tale na yabaki mai na 1 G.V. me yacova na 29 G.V. Na isoqoni ni tolu na fika qo (454+1+28) e 483 na yabaki. A “muduki” na bula i Jisu ena yabaki 33 G.V., ena loma ni ika70 ni macawa vakaparofisai. (Taniela 9:24, 26) Raica na ivola Nanuma Matua na Parofisai i Taniela! wase 11, kei na Insight on the Scriptures, Volume 2, tabana e 899-901. E tabaka ruarua na iVakadinadina i Jiova.