Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 IKURI

O Cei o “Papiloni na Ka Levu”?

O Cei o “Papiloni na Ka Levu”?

E TU ena ivola na Vakatakila eso na vosa era vakaibalebale. (Vakatakila 1:1) Kena ivakaraitaki, e cavuti kina e dua na yalewa e volai e yadrena na yaca “Papiloni na Ka Levu.” E tukuni ni yalewa qo e dabeci ira tiko e dua “na ilala levu, [kei] na veimatanitu.” (Vakatakila 17:1, 5, 15) Me vaka ni sega ni dua na yalewa e rawa ni cakava qo, e macala kina ni tiko na ibalebale kei Papiloni na Ka Levu. Ia e vakaibalebaletaki cei na yalewa saqamua qo?

Ena Vakatakila 17:18, e vakatokai kina na yalewa qo me “koro levu e nodra ranadi na tui kei vuravura.” Na vosa “koro” eda lai vakasamataka kina na bula vakoro, e lewai, qai cicivaki na veika kece e loma ni koro me muria na lawa ni koro. Ia na “koro levu” e cavuti ena Vakatakila e lewai ira sara mada ga na “tui kei vuravura.” O cei e dau vosayaco vakalevu ena noda bula na kawatamata qai vaka me sa lewai ira sara tu mada ga na tui kei vuravura? O lotu. Eda kila vakacava ni o lotu? Eda taroga na taro qo baleta ni dau vosayaco tale ga ena veika e tara na noda bula, na tabana vakapolitiki, kei na tabana ni veivoli.

Ia dikeva mada eso tale na ka e kaya na Vakatakila. Na yalewa e vakatokai tiko me o Papiloni na Ka Levu e sega ni rawa ni vakaibalebaletaki ena tabana vakapolitiki baleta ni kaya na Vosa ni Kalou ni o ira na “tui kei vuravura,” se tabana vakapolitiki ni vuravura qo, era “veiyacovi tawadodonu” tiko kei koya. Na veiyacovi tawadodonu qo e vakaibalebaletaka na nona tokoni ira voli na iliuliu kei vuravura, qo tale ga na vuna e vakatokai kina me “saqamua levu.”Vakatakila 17:1, 2; Jemesa 4:4.

E sega tale ga ni rawa nida tukuna ni o Papiloni na Ka Levu e vakaibalebaletaka na tabana ni veivoli e vuravura baleta ni o ira na “dauveivoli” era yasovaki koya ena gauna sa na vakarusai kina. E tukuni sara mada ga ni o ira na tui kei vuravura kei ira na dauveivoli era na qai raici Papiloni na Ka Levu tu mai “vakayawa.” (Vakatakila 18:3, 9, 10, 15-17) O koya gona, sa rawa nida kaya ni o Papiloni na Ka Levu e sega ni vakaibalebaletaka na tabana vakapolitiki, se tabana ni veivoli, e vakaibalebaletaka ga na tabana vakalotu.

E vakadeitaki tale ni o Papiloni na Ka Levu e vakaibalebaletaka na tabana vakalotu nida raica na kena tukuni ni vakacalai ira tiko na lewe i vuravura ena nona “dau vakatevoro.” (Vakatakila 18:23) Sa rauta me vakatokai o Papiloni na Ka Levu ena iVolatabu me “nodra itikotiko na timoni.” (Vakatakila 18:2; Vakarua 18:10-12) E vakaitavi vakalevu tale ga o koya ena saqati ni sokalou dina, e vakacacani ira na “parofita” kei ira na “yalosavasava.” (Vakatakila 18:24) Na levu ni nona cata na sokalou dina o Papiloni na Ka Levu e vakacacani ira, e vakamatei ira sara mada ga “na ivakadinadina i Jisu” era yalodina tiko. (Vakatakila 17:6) O koya gona, na yalewa e vakatokai tiko me o Papiloni na Ka Levu e vakaibalebaletaka na lotu lasu kece e vuravura, era wili kece kina na lotu era saqata na Kalou o Jiova.