Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 IKURI

Na Cava ena Yaco ena Siga ni Lewa?

Na Cava ena Yaco ena Siga ni Lewa?

NA CAVA o na vakasamataka ni o rogoca na vosa qo, Siga ni Lewa? Levu era vakasamataka na nodra sa na yatudua mai e vica vata na bilioni ena mata ni itikotiko vakaturaga ni Kalou. Ya na vanua e sa qai mai tau kina na lewa me baleta na tamata yadua. Eso era vakaicovitaki ena bula tawamudu i lomalagi, eso tale era na vakararawataki me tawamudu. Ia e duatani sara na ka e kaya na iVolatabu me baleta na gauna ya. E vakaraitaka na Vosa ni Kalou ni gauna ya e sega ni gauna me rerevaki, ia e dodonu meda vakanamata kece kina, ni na vakalesui tale mai kina na veika vinaka kece eda dau gadreva tu.

Eda wilika ena Vakatakila 20:11, 12, na nona ivakamacala na yapositolo o Joni me baleta na Siga ni Lewa: “Au qai raica e dua na idabedabe vulavula levu vakaturaga kei koya e dabe tiko kina. Erau dro tani mai matana o vuravura kei lomalagi, e sega tale ni dua na vanua me rau laurai kina. Au qai raici ira na mate, na vetaicake kei na vetaira, nira duri tu ena mata ni idabedabe vakaturaga, qai dola eso na ivolavivigi. Ia e dola e dua tale na ivolavivigi, na ivolavivigi ni bula. Era lewai na mate ena veika e volai tu ena ivolavivigi me salavata kei na ka era cakava.” O cei e tukuni eke ni Turaganilewa?

Eda kila ni o Jiova na Turaganilewa levu ni kawatamata. Ia e lesia e dua tale me veilewai. E kaya na yapositolo o Paula ena Cakacaka 17:31 ni “sa lokuca o koya [na Kalou] e dua na siga me lewai vuravura kina ena yalododonu ena liga i koya e lesia.” O koya e lesi qo me Turaganilewa o Jisu Karisito sa vakaturi oti. (Joni 5:22) Ia ena tekivu ninaica na Siga ni Lewa? Ena vakacava na kena dede?

E vakaraitaka na ivola na Vakatakila ni na yaco e liu na ivalu na Amaketoni mera vakarusai kece kina o ira era vakarurugi ena lewa i Setani, qai tarava yani na Siga ni Lewa. * (Vakatakila 16:14, 16; 19:19–20:3) Ni oti na Amaketoni, ena qai vesu o Setani kei ira nona timoni ena qara sega ni vakabotona me duanaudolu na yabaki. Ena loma ni gauna qo, era na “veiliutaki vakatui kei Karisito me 1,000 na yabaki” na le 144,000 era itaukei vata mai lomalagi. (Vakatakila 14:1-3; 20:1-4; Roma 8:17) Na Siga ni Lewa e sega ni dua na ka ena yaco ga vakusakusa ena loma ni 24 na aua. E duanaudolu na yabaki na kena dede.

Ena loma ni duanaudolu na yabaki, ena “lewai ira na bula kei ira na mate” o Jisu Karisito. (2 Timoci 4:1) O ira “na bula” qo e dusia “na isoqosoqo levu” ena bula sivia yani na Amaketoni. (Vakatakila 7:9-17) Na yapositolo o Joni e raici ira tale ga “na mate . . . nira duri tu ena mata ni idabedabe vakaturaga” mera lewai. Me vaka ga a yalataka o Jisu, era na “rogoca . . . na domona o ira kece na tu ena ibulubulu nanumi mera tucake mai.” E vakayacori qo ena nodra vakaturi. (Joni 5:28, 29; Cakacaka 24:15) Ia ena yavutaki ena cava na nodra lewai?

E kaya na raivotu i Joni ni sa qai “dola eso na ivolavivigi,” ra qai “lewai na mate ena veika e volai tu ena ivolavivigi me salavata kei na ka era cakava.” (Vakatakila 20:12) Vakacava e volai ena ivolavivigi qori na nodra cala makawa ni bera nira mate? Sega, na lewa e tau me baleti ira ena sega ni yavutaki ena ka era cakava ni bera nira mate. Eda kila vakacava qo? E kaya na iVolatabu: “O koya sa mate sa bokoci na nona ivalavala ca.” (Roma 6:7) O ira gona era vakaturi e sega sara ga ni qai nanumi tale e dua na nodra cala makawa. O koya gona, na ivolavivigi ya e vakatakarakarataka eso tale na ka ena vinakata vei ira o Jiova. Ke ra via bula tawamudu o ira na bula sivia na Amaketoni kei ira era sa vakaturi, e dodonu mera talairawarawa ena ivakaro ni Kalou, wili kina na ivakaro vou ena vakatakila o Jiova ena loma ni duanaudolu na yabaki. O koya gona, era na lewai na tamata yadua ena ka era cakava ena loma ni Siga ni Lewa.

Dua na iwase levu vei ira na vakaturi era sega mada ga ni kila na loma ni Kalou ni bera nodra mate. Ena vinakati gona mera vakavulici. Na cakacaka vakaitamera qo ena vakayacori ena loma ni Siga ni Lewa. Io, “era na vulica na ivalavala dodonu na lewenivanua.” (Aisea 26:9) Ia sega ni o ira kece ena gauna ya era na vinakata mera cakava na loma ni Kalou. E kaya na Aisea 26:10: “Ke lomani mada ga na tamata ca, ena sega ni vulica na ivalavala dodonu. Ena vanua mada ga ni ivalavala dodonu ena caka ca o koya, ena sega ni raica na cecere i Jiova.” O ira na tamata ca qo era sa na qai vakamatei vakadua ena Siga ni Lewa.Aisea 65:20.

Me qai cava na Siga ni Lewa, sa na qai rawa ni tukuni dina nira sa qai “bula tale” o ira era vakaturi, qo nira sa na bula uasivi. (Vakatakila 20:5) O koya gona ena Siga ni Lewa, sa na qai vakalesui na kawatamata ena kena ituvaki uasivi a nakita taumada na Kalou. (1 Korinica 15:24-28) Oti, sa na qai yaco na iotioti ni veivakatovolei. Ena sereki o Setani mai na vanua e vesu tu kina, vakatarai me vakacalai ira na tamata ena iotioti ni gauna. (Vakatakila 20:3, 7-10) Sa na qai vakayacori vei ira na saqati koya na vosa ni yalayala ni iVolatabu: “O ira na yalododonu era na taukena na vuravura, era na qai bula tawamudu kina.” (Same 37:29) Io, na Siga ni Lewa ena kauta mai na veivakalougatataki vei ira kece na kawatamata talairawarawa!

^ para. 1 Raica eso tale na itukutuku me baleta na Amaketoni (Armageddon) ena Insight on the Scriptures, Volume 1, tabana e 594-595, 1037-1038, kei na wase 20 ni ivola na Qarava na Kalou Dina, tabaka ruarua na iVakadinadina i Jiova.