Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE TINIKAWALU

Na Papitaiso kei na Nomu Veiwekani kei na Kalou

Na Papitaiso kei na Nomu Veiwekani kei na Kalou
  • Na cava na ivakarau ni papitaiso ni lotu vaKarisito?

  • Na cava mo cakava mo qai vakadonui kina mo papitaiso?

  • Ena yalataki koya vakacava e dua vua na Kalou?

  • Na cava e vakaibalebaletaka na nona tabadromuci e dua me papitaiso?

1. Na cava e vinakata kina na matanivanua ni Iciopea me papitaiso?

“RAICA! Sa tu qo na wai. Na cava e tarova na noqu papitaiso?” A taroga na taro qo e dua na matanivanua ni Iciopea ena imatai ni senitiuri. A vakaraitaka vua o Filipi e dua na lotu vaKarisito, ni o Jisu sara ga na Mesaia yalataki. E tarai  koya na turaga ni Iciopea qo na ka e vulica mai na iVolatabu, mani vinakata sara ga me papitaiso!—Cakacaka 8:26-36.

2. Na cava mo vakasamataka kina vakabibi na papitaiso?

2 Ke o sa vulica vinaka na wase ni ivola kece sa oti kei ira na iVakadinadina i Jiova, de dua o na via taroga tale ga, ‘Na cava e tarovi au meu kua ni papitaiso?’ Me yacova mai qo o sa vulica na vosa ni yalayala ni Kalou me baleta na bula tawamudu ena Parataisi. (Luke 23:43; Vakatakila 21:3, 4) O sa vulica tale ga na kedra ituvaki dina na mate, kei na inuinui ni veivakaturi. (Dauvunau 9:5; Joni 5:28, 29) De dua o sa dau tomani ira na iVakadinadina i Jiova ena nodra soqoni vakaivavakoso. Ke vaka kina, o sa na vakadinata ni laurai dina vei ira na vua ni lotu dina. (Joni 13:35) Koya e bibi duadua, o sa rairai tekivu bucina e dua na veiwekani voleka kei na Kalou o Jiova.

3. (a) Na cava a vakarota o Jisu vei ira nona imuri? (b) Me vakayacori vakacava na papitaiso ena wai?

3 O na vakaraitaka vakacava ni o via qarava na Kalou? A kaya o Jisu vei ira na nona imuri: “Ni lako moni vakavulici ira na lewe ni veivanua kece ga mera noqu tisaipeli, ni papitaisotaki ira.” (Maciu 28:19) E ivakaraitaki sara ga o Jisu ena nona papitaiso ena wai. A sega ni vakamiriki se liviraki wale ga e uluna na wai. (Maciu 3:16) Na vosa “papitaiso” e vu mai na dua na vosa vaKirisi e kena ibalebale na “dromu e loma ni wai.” Na papitaiso gona ni lotu vaKarisito e kena ibalebale me dromu sara ga e wai.

4. Na cava e vakaraitaka na nona papitaiso e dua ena wai?

4 O ira kece era vinakata mera veiwekani kei na Kalou o Jiova e dodonu mera papitaiso ena wai. Na nomu papitaiso e vakaraitaka raraba ni o gadreva mo qarava na Kalou. E vakaraitaka ni o vinakata sara ga mo cakava na loma i Jiova. (Same 40:7, 8) Ia mo qai vakadonui mo papitaiso, e tiko eso na ka bibi mo cakava.

 BIBI NA KILA KEI NA VAKABAUTA

5. (a) Na cava na imatai ni ka bibi mo cakava me rawa kina ni vakadonui mo papitaiso? (b) Na cava e bibi kina mo dau tiko ena nodra soqoni na iVakadinadina i Jiova?

5 E dua na ka bibi o sa cakava tiko. Na cava ya? Na nomu sa kilai Jiova na Kalou kei Jisu Karisito, rairai sa dua tale ga na nomu ituvatuva dei ni vuli iVolatabu. (Wilika Joni 17:3.) Ia e levu tale na ka e se vo mo vulica. Na lotu vaKarisito e dodonu me “vakasinaiti ena kilaka dodonu me baleta na nona inaki [na Kalou].” (Kolosa 1:9) Ena yaga sara vakalevu ena tikina qo na nomu dau tiko ena nodra soqoni na iVakadinadina i Jiova. O koya gona e bibi sara mo kua ni dau calata. (Iperiu 10:24, 25) Nomu tiko wasoma ena soqoni ena vakarabailevutaka na nomu kilai koya na Kalou.

Nida saga meda kila vinaka na Vosa ni Kalou, qori e dua na ikalawa bibi ni papitaiso

6. Me vakacava na levu ni ka mo kila ena iVolatabu mo qai vakadonui mo papitaiso?

6 Ia e sega ni kena ibalebale qo mo kila kece sara na ka e tu ena iVolatabu me qai vakadonui mo papitaiso. A sa kila toka eso na ka na matanivanua ni Iciopea, ia a vinakati ga me vukei me rawa ni matata vua eso tale na ka mai na iVolatabu. (Cakacaka 8:30, 31) Se vo levu tale ga na ka mo vulica. Ena sega ni mudu na nomu vulica tiko ga na veika e baleti koya na Kalou. (Dauvunau 3:11) Ia ni bera ni o papitaiso, e bibi mo kila, mo vakabauta tale ga na yavu ni ivakavuvuli ena iVolatabu. (Iperiu 5:12) Qo e okati kina na kedra ituvaki dina na mate vaka kina na bibi ni yaca ni Kalou kei na nona Matanitu.

7. Ena yaga vakacava na nomu vulica na iVolatabu?

7 Ia e sega ni veirauti me tiko wale ga na kila, baleta “ke sega na vakabauta eda na sega ni vakamarautaka rawa na Kalou.” (Iperiu 11:6) E kaya na iVolatabu ni gauna era sa rogoca kina na nodra itukutuku na lotu vaKarisito eso na lewe ni koro makawa o Korinica, ‘era vakabauta ra qai papitaiso.’ (Cakacaka 18:8) Na nomu vulica tale ga na iVolatabu e rawa ni vakadeitaka na lomamu mo vakabauta kina ni Vosa  dina ga ni Kalou. Ena vukei iko tale ga mo vakabauta na vosa ni yalayala ni Kalou kei na nomu rawa ni vakabulai ena vuku ni isoro i Jisu.—Josua 23:14; Cakacaka 4:12; 2 Timoci 3:16, 17.

TUKUNA YANI NA KA DINA ENA IVOLATABU

8. Na cava ena uqeti iko mo tukuna yani kina na ka o sa vulica?

8 Ni sa dei e lomamu na nomu vakabauta, sa na dredre mo kinoca na ka o sa vulica. (Jeremaia 20:9) Sa na gu na yalomu mo tukuna yani na veika e baleti koya na Kalou kei na nona inaki.—Wilika 2 Korinica 4:13.

Na nomu vakabauta e dodonu me uqeti iko mo tukuna yani na ka o sa vulica

9, 10. (a) O cei soti o rawa ni tekivu tukuna vei ira na ka dina ena iVolatabu? (b) Na cava mo cakava ke o via vakaitavi kei ira na iVakadinadina i Jiova ena cakacaka vakavunau vakaivavakoso?

9 De dua ena tekivu na nomu tukuna yani na ka dina mai na iVolatabu vei ira na wekamu, nomu itokani, ira oni tiko veivolekati, kei ira oni cakacaka vata. Lakolako o sa na via vakaitavi ena cakacaka vakavunau e tuvanaki ena ivavakoso ni iVakadinadina i Jiova. Ke vaka kina, veivosakitaka sara na tikina qo kei koya na iVakadinadina e vakavulici iko tiko ena iVolatabu. Ke nanumi ni sa ganiti iko mo vakaitavi ena cakacaka vakavunau vakaivavakoso, sa na qai lesi e rua na qase me rau na veivosaki kei iko kei na nomu qasenivuli.

10 Qo e dua tale ga na gauna vinaka mo veikilai kina kei na so na qase ni ivavakoso e nodra itavi mera vakatawa na qelenisipi ni Kalou. (Cakacaka 20:28; 1 Pita 5:2, 3) Ke rau raica na qase ni o kila vinaka na yavu ni ivakavuvuli ena iVolatabu, e salavata na nomu bula kei na ka e vinakata na Kalou, o qai vinakata dina mo iVakadinadina i Jiova, erau sa na qai vakaraitaka vei iko ni sa veiganiti mo vakaitavi ena cakacaka vakavunau, kena ibalebale mo sa dautukutuku bera ni papitaiso ni itukutuku vinaka.

11. Na cava mera na cakava e liu eso ni bera nira vakadonui mera lai cakacaka vakavunau?

11 Ena yasana kadua, de dua erau na raica na qase ni se vo tiko eso na ka mo na cakacaka tale kina ni bera ni vakadonui mo lai cakacaka vakavunau. Qo ena rairai okati kina  na nomu tagutuva eso na ivalavala o rairai cakava lo voli. O koya gona, ni bera ni o kerea mo dautukutuku bera ni papitaiso, e bibi mo na muduka mada na cala bibi me vaka na veiyacovi tawadodonu, mateni kei na vakayagataki ni wainimate gaga.—Wilika 1 Korinica 6:9, 10; Kalatia 5:19-21.

VEIVUTUNI, VEISAU

12. Na cava e bibi kina mo veivutuni?

12 E tiko tale ga eso na ka mo cakava ni bera ni vakadonui mo papitaiso. A kaya na yapositolo o Pita: “Ni veivutuni . . . ni veisau me bokoci kina nomuni ivalavala ca.” (Cakacaka 3:19) O koya e veivutuni ena rarawataka na nona cala. E bibi me veivutuni o koya e dau vakayacora eso na ivalavala torosobu, ia e bibi me veivutuni tale ga o koya e dau qarauna me savasava na nona ivakarau ni bula. Na vuna? Nida ivalavala ca kece qai bibi meda dau kerea me vosoti keda na Kalou. (Roma 3:23; 5:12) Ni bera ni o vulica na iVolatabu, o sega tu ni kila na loma ni Kalou. O koya gona, o sega ni rawa ni kaya ni a salavata taucoko kei na loma ni Kalou na nomu ivakarau ni bula! Ena vakasama qo e bibi tale ga kina mo veivutuni.

13. Na cava na ibalebale ni veisau?

13 Ia ni dua e veivutuni, e dodonu me salavata kei na nona veisau. E sega ni veirauti mo rarawataka wale ga na nomu cala. E dodonu mo cata na nomu ivakarau ni bula makawa mo qai vakadeitaka e lomamu ni tekivu qo lako yani, o sa na cakava ga na ka dodonu. Koya gona e bibi mo veivutuni, mo veisau, ni bera ni o papitaiso.

NOMU YALAYALA

14. Na cava tale e bibi mo cakava ni bera ni o papitaiso?

14 E tiko e dua tale na ka bibi mo cakava ni bera ni o papitaiso. E dodonu mo yalataka na nomu bula vua na Kalou o Jiova.

O sa yalataki iko vua na Kalou ena masu?

15, 16. Na cava na ibalebale ni nomu yalataki iko vua na Kalou? Cava ena uqeta e dua me cakava qori?

15 Ni o yalataki iko vua na Kalou o Jiova ena masu, o  yalataka ni o na qaravi koya sara ga vakatabakidua me tawamudu. (Vakarua 6:15) Ia na cava ena vinakata kina e dua me cakava qori? Me rawa nida sauma na taro qo, vakasamataka mada ke sa vinakata e dua na cauravou me vakamau. Mani nanuma o koya me rau veibuku kei na dua na goneyalewa. Lakolako sa raica na nona itovo vinaka na goneyalewa, e mani vakavuna me taleitaki koya vakalevu. Sega ni dede, sa vosaki goneyalewa me rau vakamau. E dina ni nona vakamau ena salavata mai kei na levu na itavi. Ia na nona loloma ena uqeti koya me bolea na itavi kece ya.

16 Ni o sa kilai Jiova, o lomani koya tale ga, sa na gu na lomamu mo vakaliuci koya tiko ga ena nomu bula, o na sega tale ni tu suka se lomalomarua. O koya e via muria na Luve ni Kalou, o Jisu Karisito, e dodonu me “kua tale ni muria na lomana.” (Marika 8:34) Eda sega ni muria na lomada ena noda sega ni vakalaiva na veika eda gadreva kei na veika eda via cakava me vakaleqa na noda vakaliuca na loma ni Kalou. O koya gona, ni bera ni o papitaiso, e dodonu me inaki levu duadua ni nomu bula mo cakava na loma ni Kalou.—Wilika 1 Pita 4:2.

MO LEQATAKA VAKASIVIA NA NOMU YALAYALA?

17. Na cava era sega kina ni via yalataki ira vei Jiova eso?

17 Eso era sega ni via yalataka na nodra bula vei Jiova ena nodra lomaleqataka ni sa rui kalawa bibi. Era leqataka ni gauna era sa na yalataki ira kina, era sa na saumitaro vua na Kalou. Ena vuku ni nodra leqataka de ra na sega ni dina ena nodra yalayala vei Jiova, era nanuma kina mera sa kua ga ni yalataka na nodra bula vua.

18. Na cava ena uqeti iko mo yalataki iko vei Jiova?

18 Na levu ga ni nomu lomani Jiova, ena qai uqeti na lomamu mo yalataki iko vua, mo solia tale ga na nomu vinaka kece mo dina kina ena nomu yalayala. (Dauvunau 5:4) Ni o sa yalataka na nomu bula, sega ni vakabekataki ni o  na vinakata me “rakorako vei Jiova na nomuni itovo, moni vakamarautaki koya [kina] vakalevu.” (Kolosa 1:10) Ni o lomana na Kalou, o na sega ni raica ni rui dredre na nomu cakava na lomana. Sega ni vakabekataki ni o na duavata kei na yapositolo o Joni ni a vola: “Qo na ibalebale ni noda lomana na Kalou, meda muria na nona ivunau, ia e sega ni icolacola bibi na nona ivunau.”—1 Joni 5:3.

19. Na cava mo kua kina ni leqataka vakasivia na nomu yalayala vua na Kalou?

19 E sega ni tukuni me uasivi sara na nomu bula mo qai yalataki iko vua na Kalou. E kila o Jiova na nomu malumalumu, o koya gona ena sega ni namaka mo cakava na veika o na sega ni rawata. (Same 103:14) Ena vinakata o koya  mo dina ena nomu yalayala, ena tokoni iko, ena vukei iko. (Wilika Aisea 41:10.) Ke o vakararavi vei Jiova mai vu ni lomamu, “ena vakadodonutaka na nomu ilakolako o koya.”—Vosa Vakaibalebale 3:5, 6.

VAKARAITAKA NA NOMU YALAYALA ENA NOMU PAPITAISO

20. Na cava ena sega kina ni rawa ni tiko lo ga vei keda na noda sa yalataki keda vei Jiova?

20 Ni o vakasamataka na veika e se qai dikevi mai, de dua  ena uqeti iko mo yalataka nomu bula vei Jiova ena masu. Ia sega ni o koya ga ya, o ira kece era lomana dina na Kalou e dodonu tale ga mera “tusanaka raraba” na nodra vakabauta. (Roma 10:10) Ia o na cakava vakacava qori?

Nomu papitaiso e vakaibalebaletaka na nomu sa mate vata kei na nomu ivakarau ni bula makawa kei na nomu tucake tale mo cakava na loma ni Kalou

21, 22. Sala cava o na “tusanaka raraba” kina na nomu vakabauta?

21 Mo tukuna vua na kodineita ni ilawalawa qase ena nomu ivavakoso ni o sa via papitaiso. Ena qai raica o koya e vica na qase me ratou raica vata kei iko eso na taro me baleta na yavu ni ivakavuvuli vakaivolatabu. Ke ratou raica na qase qori ni sa ganita mo papitaiso, eratou na vakaraitaka vei iko. * Ena gauna o papitaiso kina, e dau kena ivakarau me dua na ivunau ni papitaiso. Sa na qai kerea o koya e vunau vei ira na vakarau papitaiso mera sauma e rua na taro rawarawa mera “tusanaka raraba” kina nodra vakabauta.

22 Ni o sa papitaiso, sa mai vakaraitaka kina e matanalevu ni o sa yalataka nomu bula vua na Kalou, o sa yaco mo iVakadinadina i Jiova. Era tabadromuci ena wai na papitaiso me vakaraitaka na nodra sa yalataki ira vei Jiova.

IBALEBALE NI NOMU PAPITAISO

23. Na cava na ibalebale ni nona papitaiso e dua “ena yaca i Tamada kei na Luvena kei na yalo tabu”?

23 E kaya o Jisu ni o ira na nona tisaipeli era na papitaiso “ena yaca i Tamada kei na Luvena kei na yalo tabu.” (Maciu 28:19) Kena ibalebale ni o koya e papitaiso e kila qai doka na itutu i Jiova na Kalou kei Jisu Karisito. (Same 83:18; Maciu 28:18) E kila vinaka tale ga na itavi kei na kaukaua ni yalo tabu ni Kalou se nona igu tawarairai.—Kalatia 5:22, 23; 2 Pita 1:21.

24, 25. (a) Na cava na ibalebale ni papitaiso? (b) Na cava ena qai vakamatatataki ena wase tarava?

24 Ia e bibi dina na ibalebale ni nomu tabadromuci e wai. Na nomu dromu e loma ni wai e vaka ga ni o sa mate  vata kei na nomu ivakarau ni bula makawa. Ni o lamata mai, e vaka ga ni o sa tucake tiko ina dua na bula vou mo cakava na loma ni Kalou. Kua tale ga ni guilecava ni o sa yalataki iko sara ga vua na Kalou o Jiova. O sega ni yalataki iko ena dua na cakacaka, inaki, isoqosoqo, se vua e dua na tamata. Na nomu yalayala kei na papitaiso e itekitekivu sara ga ni nomu veiwekani voleka kei na Kalou.—Same 25:14.

25 Na nona papitaiso e dua e sega ni vakadeitaka ni sa na vakabulai. E vola na yapositolo o Paula: “Ni sasagataka tiko ga na nomuni bula ena rere kei na sautaninini.” (Filipai 2:12) Na papitaiso e itekitekivu wale ga. De dua o na via kila se cava mo cakava mo tiko ga kina ena loloma ni Kalou. Ena qai vakamatatataki qori ena iotioti ni wase.

^ para. 21 E veiyabaki, e dau vakayacori na papitaiso ena nodra soqo ni tabacakacaka kei na soqo ni veiwasewase na iVakadinadina i Jiova.