Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 IKURI

Na Yaca ni Kalou—Kena Vakayagataki kei na Kena iBalebale

Na Yaca ni Kalou—Kena Vakayagataki kei na Kena iBalebale

E VAKADEWATAKI vakacava na Same 83:18 ena nomu iVolatabu? E va qo na kena vakadewa ena iVolatabu Vakaviti: “Mera kila na tamata ni o kemuni, na yacamuni ga o Jiova, o kemuni ga oni Cecere Duadua e vuravura taucoko.” E vica na iVolatabu e va tale ga qo na kena vakadewa. Ia e levu ga era biuta laivi na yaca i Jiova, ra qai sosomitaka ena icavuti me vaka na “Turaga” se “O Koya sa Tawamudu.” Ia na cava e dodonu me tiko ena tikinivolatabu qo? Me dua na icavuti se na yaca sara ga Jiova?

Yaca ni Kalou ena matanivola vakaIperiu

Ena vosa vakaIperiu, na vosa e volai kina e dua na iwase levu ni iVolatabu, a volai sara ga ena tikinivolatabu qo e dua na yaca. E volai toka na yaca qo me יהוה (YHWH) ena matanivola vakaIperiu. Ena vosa vakaViti, e dau vakadewataki na yaca qo me o “Jiova.” E volai beka na yaca qo ena dua ga na vanua ena iVolatabu? Sega. Na yaca qo e voleka ni basika vaka7,000 ena ilavelave taumada ni iVolatabu a volai ena vosa vakaIperiu!

E vakacava sara mada na bibi ni yaca ni Kalou? Vakasamataka mada na Masu ni Turaga a cavuta o Jisu. E tekivu va qo na masu oya: “Tamai keimami mai lomalagi, me vakarokorokotaki na yacamuni.” (Maciu 6:9) E muri, e qai masu o Jisu vua na Kalou ena nona kaya: “Tamaqu, moni vakalagilagia na yacamuni.” Sa qai vosa mai lomalagi na Kalou: “Au sa vakalagilagia oti, au na vakalagilagia tale.” (Joni 12:28) E matata e ke ni bibi dina na yaca ni Kalou. Ia na cava era sa kauta laivi kina na yaca qo eso na dauvakadewa mai na nodra vakadewa ni iVolatabu, ra qai sosomitaka ena so na icavuti?

E rua na vuna levu. Kena imatai, era kaya e levu ni sega ni dodonu me taurivaki tale na yaca ni Kalou baleta ni sa lecavi ena gauna qo na kena icavucavuti dodonu. Na vosa vakaIperiu makawa e sega na kena votu (a, e, i, o, u). O koya gona, e sega ni dua nikua e rawa ni tukuna se ra vakarogotaka vakacava o ira ena gauna vakaivolatabu na YHWH. Ia me tarovi keda beka qo mai na noda vakayagataka na yaca ni Kalou? Ena gauna vakaivolatabu, a rairai vakarogotaki na yaca i Jisu me o Yeshua se Yehoshua—e sega ni dua nikua e rawa ni vakadeitaka se cavuti dina vakacava. Ia era sa vakayagataka raraba tu na lewenivanua e veiyasa i vuravura nikua e levu sara na vakadewa ni yaca i Jisu. Na nodra sa lecava na kena icavucavuti dina ena imatai ni senitiuri e sega ni tarovi ira ena nodra vakayagataka na yaca era sa kila ena gauna qo. E va tale ga qo na yacamu. Kaya mada ke o lako i vanua tani, o na kidacala ni nodra cavuta na yacamu ena vanua oya e rawa ni duatani sara mai na icavucavuti dina ni yacamu. O koya gona, na lecavi ni icavucavuti dina ni yaca ni Kalou e sega ni dodonu me tarovi keda mai na noda vakayagataka.

Na ikarua ni vuna era kauta laivi kina eso na yaca ni Kalou ena iVolatabu e vu mai na dua na nodra vakabauta makawa na Jiu. Levu era vakabauta ni sega ni dodonu me cavuti na yaca ni Kalou. Na vakabauta qo e yavutaki ena nodra taura cala na ka e kaya na iVolatabu: “Mo kua ni vakayagataka vakaveitalia na yaca i Jiova na nomu Kalou, ni o Jiova ena totogitaki koya e vakayagataka vakaveitalia na yacana.”Lako Yani 20:7.

Na lawa qo e vakatabuya na kena beci se vakayagataki cala ni yaca ni Kalou. Ia kena ibalebale qori ni sa na vakatabuya na vakayagataki ni yaca ni Kalou ena kena ivakavakayagataki e dokai? Sega sara ga. O ira na vola na iVolatabu vakaIperiu (na “Veiyalayalati Makawa”), era dauveiqaravi yalodina kece ni Kalou, era dau muria tale ga na Lawa a solia na Kalou vei ira na Isireli. Ia era vola sara vakalevu na yaca ni Kalou. Kena vakaraitaki, era vola na yaca qo ena levu sara na same era dau lagata vakadomoilevu na lewe i Isireli ena nodra qaravi Kalou. O Jiova sara mada ga a vakaroti ira nona tamata mera masuta na yacana, era vakayacora qo o ira era yalodina tiko ga vua. (Joeli 2:32; Cakacaka 2:21) O koya gona, era sega ni tu vakasuka na lotu vaKarisito ena gauna qo ena nodra vakayagataka ena veidokai na yaca ni Kalou, me vaka ga a cakava o Jisu.Joni 17:26.

E dua na cala levu sara era sa vakayacora e levu na dauvakadewa ena nodra sosomitaka na yaca ni Kalou ena so na icavuti. E vaka mera kaya tiko nida sega ni rawa ni volekati koya na Kalou, ia e duatani na ka e uqeti keda kina na iVolatabu, oya meda saga meda “veitokani voleka kei Jiova.” (Same 25:14) Vakasamataka mada e dua drau dau veivolekati. Rawa beka ni o kaya ni drau veivolekati kei na nomu itokani ke o sega tu mada ga ni kila na yacana? Ena vakasama vata ya, vakacava o keda, ena rawa nida veivolekati dina kei Jiova ke vunitaki tiko vei keda na yacana? Kena ikuri, ni sa sega ni vakayagataki na yaca ni Kalou, sa sega tale ga ni kilai na kena ibalebale totoka. Na cava sara mada na ibalebale ni yaca ni Kalou?

A tukuna sara ga na Kalou na ibalebale ni yacana vua na nona tamata yalodina o Mosese. Ni taroga o Mosese na yaca ni Kalou, e qai sauma o Jiova: “Au na Cakava na ka ga au Vinakata.” (Lako Yani 3:14) O koya gona, e sega ni dua na kena dredre vei Jiova me cakava na nona inaki, e okati tale ga kina na ka e vinakata me cakava ena veika e bulia kei na vakayacori ni nona inaki.

Kaya mada ke tu vei iko na kaukaua mo cakava kina na ka ga o vinakata. Na cava o na cakava ke tauvimate bibi o nomu itokani? O na vakabulai koya se vakacava? Vakacava ke dua e leqa vakailavo? O na vakarautaka na ka me bula kina. Ia kena seva ni o na sega ni rawata na veika kece qo. O keda kece e vakaiyalayala ga na ka eda rawata. Ni o vulica na iVolatabu, o na druka mo kila ni o Jiova e rawa ni cakava na ka ga e vinakata me vakayacori kina na nona vosa ni yalayala. E marautaka tale ga me vakayagataka na nona kaukaua me vakacegui ira kina era lomani koya. (2 Veigauna 16:9) Na kaukaua vakasakiti qo i Jiova era lecava o ira era sega ni kila na yacana.

E matata vakasigalevu ni yaca, Jiova, e dodonu ga me tiko ena iVolatabu. Noda kila na kena ibalebale kei na noda vakayagataka ena noda sokalou, ena vukei keda sara vakalevu ena noda toro voleka vua na Tamada vakalomalagi o Jiova. *

^ para. 3 Raica na brochure, The Divine Name That Will Endure Forever, tabaka na iVakadinadina i Jiova, mo raica kina eso tale na ivakamacala me baleta na yaca ni Kalou, kena ibalebale, kei na vuna meda vakayagataka kina ena sokalou. Raica tale ga na Vakadewa ni Vuravura Vou, itabataba ni 2013, iKuri A4.