Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE DUA

O Cei na Kalou?

O Cei na Kalou?

1, 2. Na cava eso na ka eda dau taroga?

E DAU levu nodra taro na gone. Ke o vakamacalataka vei ira e dua na ka, era na taroga, ‘Baleta?’ Ni o saga mo sauma nodra taro, era na rairai taroga tale, ‘Ia baleta?’

2 E dau tiko kece noda taro se da mani gone se qase. Eda na rairai taroga na cava meda kania, cava meda tokara, se volia. De dua eda dau vakataroga tale ga eso na ka bibi me baleta na bula kei na gauna se bera mai. Ke sega ni vakacegui keda na isau ni noda vakatataro, e rawa sara ga nida soro na vaqaqara.

3. Cava era nanuma kina e levu ni na sega ni saumi na veika bibi era dau taroga?

3 Vakacava e saumi ena iVolatabu na veika bibi eda dau taroga? Eso era vakabauta ni dina qori, ia era nanuma ni sa rui dredre me kilai na iVolatabu. De dua era nanuma nira kila ga na isaunitaro na qasenivuli, bete se italatala. Eso tale era madua na kaya nira sega ni kila na isaunitaro. Ia na cava o nanuma?

4, 5. Na cava eso na ka bibi o dau taroga? Na cava mo vaqara tiko ga kina na kena isau?

4 De dua o na via kila na isau ni taro va qo: Cava na inaki ni noqu bula? Cava ena yaco ena gauna au mate kina? Cava meu kila me baleta na Kalou? A kaya na qasenivuli rogo o Jisu: “Kerekere tiko ga, ena qai soli vei kemudou, vaqaqara tiko ga, dou na qai kunea, tukituki tiko ga, ena qai dolavi vei kemudou.” (Maciu 7:7) Kua sara ni soro, vaqaqara tiko ga mo rawa ni kunea na isau dodonu ni nomu taro.

 5 Io, ke o “vaqaqara tiko ga,” ena saumi ena iVolatabu nomu vakatataro. (Vosa Vakaibalebale 2:1-5) E sega ni dredre na isaunitaro o na kunea e kea. Ena vakamarautaki iko ena gauna qo na ka o vulica, o rawa ni marautaka tale ga na bula totoka ena gauna se bera mai. Meda veivosakitaka mada e dua na taro e sega tu ni matata vei ira e levu.

E KAUAITAKI KEDA NA KALOU?

6. Na cava era nanuma kina eso ni sega ni kauaitaki ira na Kalou?

6 Levu era nanuma ni sega ni kauaitaki keda na Kalou. Era vakabauta ni na sega ni va tu qo na ituvaki kei vuravura ke kauaitaki keda dina na Kalou! E yaco tu e veiyasa i vuravura na ivalu, veicati, kei na bula vakaloloma. Levu era tauvimate, rarawa, ra qai mate. Era veinanuyaka kina eso, ‘Ke kauaitaki keda na Kalou, cava e sega ni muduka kina na veika rarawa?’

7. (a) Era vakavuna vakacava na iliuliu ni lotu nodra vakabauta e levu ni sega ni veikauaitaki na Kalou? (b) Eda vakadeitaka vakacava ni sega ni vakavuna na Kalou na veika ca?

7 O ira sara ga na iliuliu ni lotu era vakavuna ena so na gauna nodra vakabauta na lewenivanua ni sega ni veikauaitaki na Kalou. Ni yaco na veika vakaloloma, era dau kaya ni inaki ni Kalou se ni vinakata o koya me yaco qori. Nira tukuna qori, era sa beitaka sara tiko ga na Kalou. Ia e kaya na iVolatabu ni sega ni vakavuna na veika ca na Kalou. E sega ni vakatovolea na Kalou e dua ena veika ca, e tukuni qori ena Jemesa 1:13: “Ni vakatovolei e dua me kua ni kaya: ‘E vakatovolei au na Kalou.’ Ni sega ni vakatovolei rawa na Kalou ena ka ca, e sega tale ga ni vakatovolea e dua o koya.” E se sega ni muduka na Kalou na veika ca, ia sega ni kena ibalebale  qori ni vakavuna mera yaco. (Wilika Jope 34:10-12.) Meda raica mada e dua na kena ivakaraitaki.

8, 9. Na cava me kua ni beitaki kina na Kalou ena leqa eda sotava? Tukuna na kena ivakaraitaki.

8 Vakasamataka mada e dua na cauravou e se tiko voli ga kei rau na nona itubutubu e vale. Dua na ka nona lomani koya o tamana, e vakavulici koya tale ga me dau vakatulewa vinaka. Toso na gauna, e talaidredre vei tamana o cauravou qai biubiu mai vale. E lai cakava na veika ca qai sotava kina na leqa. Vakacava o na beitaki tama ni sega ni tarova nona biubiu o luvena? Sega! (Luke 15:11-13) Me vaka ga na tama ya, na Kalou e sega tale ga ni tarovi ira era vakatulewataka mera talaidredre ra qai cakava na ka ca. Ni yaco gona e dua na ka ca, meda kua ni nanuma ni vakavuna na Kalou. E sega ni dodonu me beitaki na Kalou.

9 E tiko na vuna vinaka e vakalaiva kina na Kalou me se yaco tiko na veika ca. O na qai vulica ena Wase 11 na ka e kaya na iVolatabu ena tikina qori. Ia dua na ka mo vakadeitaka, e lomani keda na Kalou qai sega ni vakavuna na leqa eda sotava. O koya duadua ga e rawa ni vakaotia qori.—Aisea 33:2.

10. Na cava eda nuidei kina ni na vakaotia kece na Kalou na ka ca?

10 E savasava na Kalou. (Aisea 6:3) Na ka kece e cakava e sega ni vakamelei rawa, e savasava, qai vinaka. Eda rawa gona ni nuitaki koya. E sega ni rawa ni tukuni qori me baleti keda na kawatamata nida dau cala ena so na gauna. Ke saga mada ga ena nona vinaka kece e dua na iliuliu ena gauna qo, e sega ni tu vua na kaukaua me vakaotia kece na ka ca. Na Kalou ga e sega ni vakaiyalayala na nona kaukaua. E rawa ni vakaotia kece na ka ca, ena sega ni tarovi rawa tale ga nona cakava qori. Sa na  yali vakadua na veika ca ni na kauta laivi kece na Kalou.—Wilika Same 37:9-11.

RAI NI KALOU ME BALETA NODA RARAWA

11. Na cava na rai ni Kalou me baleta na veika rarawa o sotava?

11 Na cava na rai ni Kalou ena veika e yaco tu e vuravura, kei na veika o sotava tiko? E tukuna na iVolatabu ni “taleitaka na lewadodonu” na Kalou. (Same 37:28) Kena ibalebale e kauaitaka vakalevu o koya na ka e donu kei na ka e cala. E sega ni vinakata meda rarawa. E kaya na iVolatabu ni ‘rarawa na lomana’ ni raica na levu ni ka ca e vuravura ena veigauna sa oti. (Vakatekivu 6:5, 6) E se sega ni veisau na Kalou. (Malakai 3:6) E kaya na iVolatabu ni kauaitaki iko dina na Kalou.—Wilika 1 Pita 5:7.

E kaya na iVolatabu ni o Jiova na Dauveibuli dauloloma ni lomalagi kei vuravura

12, 13. (a) Na cava eda dauloloma kina qai veikauaitaki? Cava noda rai me baleta na veika rarawa e vuravura? (b) Eda kila vakacava ni na vakaotia kece na Kalou na rarawa kei na veika ca?

12 E kaya tale ga na iVolatabu ni buli keda na Kalou meda ucui koya. (Vakatekivu 1:26) Kena ibalebale e buli keda na Kalou meda vakaraitaka tale ga nona itovo vinaka. Ke dau mositi iko gona nodra vakararawataki o ira e sega nodra cala, sa qai wacava sara na kena mosi vua na Kalou! Eda kila vakacava qori?

13 Eda vulica ena iVolatabu ni “Kalou ga na loloma.” (1 Joni 4:8) Na ka kece e cakava e yavutaki ena loloma. Eda dau loloma gona ni dau loloma na Kalou. Vakasamataka mada qo: Ke tu vei iko na kaukaua, vakacava o na vakaotia na rarawa kei na veika ca e vuravura? Io, o na cakava qori ni o lomani ira na lewenivanua. Na Kalou tale ga ena muduka na rarawa kei na veika ca baleta e tu vua na kaukaua qai lomani keda.  Ena vakayacori kece na yalayala ni Kalou e cavuti ena itekitekivu ni ivola qo! Ia e bibi mo kila e levu tale na ka me baleta na Kalou, mo rawa ni qai nuitaka nona yalayala.

VINAKATA NA KALOU MO KILAI KOYA

Ke o via veitokani kei na dua, o na tukuna vua na yacamu. E vakatakila vei keda ena iVolatabu na Kalou na yacana

14. O cei na yaca ni Kalou? Eda kila vakacava ni dodonu meda vakayagataka na yacana?

14 Ke o via veitokani kei na dua, na imatai ni ka o na tukuna vua na yacamu. Vakacava na Kalou, e tiko na yacana? Levu na lotu era kaya ni yacana na Kalou se Turaga, ia e sega ni yaca qori. E icavuti wale ga me vaka na “tui” se “peresitedi.” Sa vakatakila vei keda na Kalou ni yacana o Jiova. E kaya na Same 83:18: “Mera kila na tamata ni o kemuni, na yacamuni ga o Jiova, o kemuni ga oni Cecere Duadua e vuravura taucoko.” Era vakayagataka vakavica na udolu na dauvola iVolatabu na yaca ni Kalou. E vinakata o Jiova mo kila na yacana, mo vakayagataka tale ga. E vakatakila vei iko na yacana mo rawa ni nona itokani.

15. Na cava na ibalebale ni yaca, Jiova?

15 E titobu na ibalebale ni yaca ni Kalou, Jiova. E tiko kina na vakasama ni nona  rawa ni cakava kece na Kalou na nona yalayala kei na nona inaki. Sega ni dua na ka e rawa ni tarovi koya. O Jiova duadua ga e rawa ni vakatokai ena yaca ya. *

16, 17. Na cava na ibalebale ni: (a) “Kaukaua Duadua”? (b) “Tui ni veitabagauna”? (c) “Dauveibuli”?

16 Eda sa raica oti mai ni tukuna na Same 83:18 me baleti Jiova: “O kemuni ga oni Cecere Duadua.” E kaya  tale ga na Vakatakila 15:3: “E cecere qai veivakurabuitaki na nomuni cakacaka, Jiova na Kalou, oni Kaukaua Duadua. E dodonu, e dina na nomuni sala, na Tui ni veitabagauna.” Na icavuti “Kaukaua Duadua” e dusia ni sega tale ni dua e lomalagi se vuravura e kaukaua me vakataki Jiova. Eda kila tale ga ena icavuti “Tui ni veitabagauna” ni tawamudu nona bula. E kaya na Same 90:2 ni Kalou tu ga o koya mai na gauna tawamudu ina gauna tawamudu. Dua dina na ka vakatubuqoroqoro ya!

17 O Jiova ga na Dauveibuli. E kaya na Vakatakila 4:11: “E ganiti kemuni Jiova, na neimami Kalou, me nomuni na lagilagi, na vakarokoroko, kei na kaukaua, ni oni bulia na ka kece, ena nomuni lewa era bula, era buli kina.” Io, na agilosi mai lomalagi, na kalokalo, veimataqali vuata, na ika ni wasawasa kei na cava ga o vakasamataka rawa, qori e bulia kece o Jiova!

 RAWA MO ITOKANI I JIOVA

18. Na cava era nanuma kina eso ni sa na sega tu ga ni rawa mera veitokani kei na Kalou? Ia na cava e tukuna na iVolatabu?

18 Nira vulica eso na itovo qoroi i Jiova, era rere ra qai nanuma, ‘Sa rui kaukaua, cecere, qai tu sara mai vakayawa na Kalou, e rawa gona vakacava ni kauaitaki au?’ E sega ni vinakata na Kalou me va qori nomu rai. E vinakata o Jiova mo drau veitokani. E kaya mada ga na iVolatabu ni “sega ni yawa o koya vei keda yadua.” (Cakacaka 17:27) Kena ibalebale e vinakata na Kalou mo toro voleka vua, ena qai ‘toro voleka mai vei iko’ me vaka ga e yalataka.—Jemesa 4:8.

19. (a) O rawa vakacava ni veitokani kei na Kalou? (b) Na idivi cava kei Jiova o taleitaka vakalevu?

19 O rawa vakacava ni veitokani kei na Kalou? E kaya o Jisu: “Ena rawata na bula tawamudu, o koya e vulica tiko ga na veika me baleti kemuni na Kalou dina duadua ga, kei Jisu Karisito oni tala mai.” (Joni 17:3) Saga mo kilai rau o Jiova kei Jisu ena nomu vulica tiko ga na veika me baleti rau. O na rawa ni bula tawamudu kina. Eda sa raica oti mai ni “Kalou ga na loloma.” (1 Joni 4:16) Ia e levu tale tu na kena idivi. E kaya na iVolatabu ni o Jiova e “dauyalololoma qai dauveinanumi, e berabera ni cudru, qai vuabale ena loloma e dei kei na dina.” (Lako Yani 34:6) E ‘vinaka qai tu vakarau me veivosoti’ o Jiova. (Same 86:5) E dau vosovoso qai yalodina. (2 Pita 3:9; Vakatakila 15:4) O na vulica e levu tale na itovo totoka i Jiova ni o wilika na iVolatabu.

20-22. (a) Eda rawa vakacava ni toro voleka vua na Kalou nida sega ni raici koya? (b) Na cava mo cakava ke ra saga eso mera tarova nomu vulica na iVolatabu?

 20 O rawa vakacava ni toro voleka vua na Kalou ni o sega ni raici koya? (Joni 1:18; 4:24; 1 Timoci 1:17) O na kilai Jiova vinaka ni o wilika na kena itukutuku ena iVolatabu. (Same 27:4; Roma 1:20) Na levu ga ni nomu vulici Jiova, na levu tale ga ni nomu lomani koya kei na nomu vinakata mo toro voleka vua.

Na levu ni nona lomani keda na Tamada vakalomalagi, e lailai tale nona lomani ira na luvena e dua na tama

21 Ni o vulica na veika me baleti Jiova, o na kila ni Tamada o koya. (Maciu 6:9) E buli keda qai vinakata meda marautaka na noda bula. Qori na ka e vinakata e dua na tama dauloloma vei ira na luvena. (Same 36:9) Io, e kaya na iVolatabu ni o rawa ni itokani i Jiova. (Jemesa 2:23) Vakasamataka mada, e vinakata o Jiova na Dauveibuli ni lomalagi kei vuravura mo nona itokani!

22 Era na saga eso mera tarova nomu vulica na iVolatabu. De dua era leqataka ni o sa na veisautaka nomu lotu. Ia me kua sara ni dua e tarova nomu veitokani kei Jiova. Qori ga na nomu itokani vinaka duadua.

23, 24. (a) Na cava mo taro tiko ga kina? (b) Na cava ena tasereki ena ulutaga e tarava?

23 Ke o sega ni taura rawa eso na ka o vulica ena iVolatabu, kua ni madua na taro se kere veivuke. E kaya o Jisu meda dau yalomalumalumu me vakataki ira na gonelalai. (Maciu 18:2-4) E bibi tale ga meda dau taro me vakataki ira na gone. E vinakata na Kalou mo kila na isau ni nomu vakatataro. Vulica gona vagumatua na iVolatabu mo vakadeitaka kina na dina ni veika o vulica.—Wilika Cakacaka 17:11.

24 Na sala vinaka duadua mo kilai Jiova kina, oya mo vulica na iVolatabu. Ena tasereki ena ulutaga e tarava na vuna e duatani duadua kina na iVolatabu.

^ para. 15 Ke yali ena nomu iVolatabu na yaca, Jiova, se o via kila eso tale na ka me baleta na ibalebale kei na icavucavuti ni yaca ni Kalou, yalovinaka raica na iKuri ni iVakamacala 1.