1. O cei ga e rawa ni vakaraitaka vei keda na ivalavala ni sokalou e vakadonuya na Kalou?

ERA kaya e levu na lotu nira vakavulica na ka dina me baleta na Kalou. Ia e sega ni dina qori ni duidui na ka era vakavulica na veimatalotu me baleta na Kalou kei na sala me sokaloutaki kina. Eda na kila vakacava na ivalavala ni sokalou e vakadonuya na Kalou? O Jiova ga e rawa ni vakaraitaka vei keda na sala meda sokaloutaki koya kina.

2. Eda na vulica e vei na ivalavala ni sokalou e vakadonuya na Kalou?

² E vakarautaka o Jiova vei keda na iVolatabu meda vulica kina na ivalavala ni sokalou e vakadonuya. E kauaitaki iko dina o Jiova, e bibi gona mo vulica na iVolatabu me rawa ni dusimaki iko ena nona ivakavuvuli.—Aisea 48:17.

3. Na cava e vinakata na Kalou meda cakava?

³ Era kaya eso ni na vakadonuya na lotu kece na Kalou. Ia qori e veisaqasaqa kei na nona kaya o Jisu: “Era na sega ni curu kece ina Matanitu vakalomalagi o ira era tukuna vei au, ‘Turaga, Turaga,’ o koya ga e cakava na loma i Tamaqu.” Io, e bibi meda vulica na loma ni Kalou da qai cakava sara. Me kua ni raici vakamamada qori ni kaya o Jisu ni o ira na sega ni talairawarawa vua na Kalou era vakataki ira na daubasulawa, era “daucaka ca.”—Maciu 7:21-23.

4. Na cava e kaya o Jisu me baleta na noda cakava na loma ni Kalou?

⁴ Sa tukuna rawa o Jisu ni na sega ni rawarawa na noda cakava na loma ni Kalou. A kaya: “Dou curu ina mata mata qiqo, ni rabalevu na matamata qai galala na sala e basika ina rusa, e le levu tale ga era muria tiko, ia e qiqo na matamata qai rabalailai na sala e basika ina bula, e le lailai tale ga era kunea.” (Maciu 7:13, 14) Na sala rabalailai se na ivalavala ni sokalou e vakadonuya na Kalou e kena itinitini na bula tawamudu. Na sala rabalevu se na ivalavala ni sokalou e cata na Kalou e kena itinitini na mate. Ia ni sega ni vinakata o Jiova me mate e dua, e solia tiko kina na gauna vei ira e levu tale mera vulica na veika me baleti koya.​—2 Pita 3:9.

5. O na kilai ira vakacava e vakadonui na nodra ivalavala ni sokalou?

⁵ E kaya o Jisu nida na kilai ira e vakadonui nodra ivalavala ni sokalou nida dikeva na ka era vakabauta kei na ka era cakava. A kaya: “Dou na kilai ira ena vuadra,” qai tomana “ena vuataka ga na vua vinaka na kau vinaka.” (Maciu 7:16, 17) E sega ni kena ibalebale qori nira uasivi o ira era qarava na Kalou. Ia era saga e veigauna na tamata ni Kalou mera cakava na ka e dodonu. Meda raica mada na sala eda na kilai ira kina era qarava tiko na Kalou ena sala e vakadonuya.

6, 7. Na cava e yavutaki kina ena iVolatabu na ivakavuvuli e muri ena sokalou dina? Na cava eda vulica ena ivakaraitaki i Jisu?

⁶ Me yavutaki ena iVolatabu na noda sokalou. E kaya na iVolatabu: “E vakavuna na Kalou na iVolatabu kece, e yaga me veivakavulici, me veivunauci, me veivakadodonutaki, me veidusimaki ena ka e dodonu, me vakarautaki vinaka kina na tamata ni Kalou, me tu vakarau tale ga me vakayacora na cakacaka vinaka kece.” (2 Timoci 3:16, 17) A vola na yapositolo o Paula vei ira na tacina vaKarisito: “Gauna oni ciqoma kina na vosa ni Kalou oni rogoca vei keitou, oni sega ni raica me vosa ni  tamata, ia oni vakabauta ni vosa dina ni Kalou.” (1 Cesalonaika 2:13) Na ivakavuvuli e muri ena sokalou dina e yavutaki ga ena Vosa ni Kalou, na iVolatabu. E sega ni yavutaki ena dua tale na ka, me vaka na vakasama vakatamata kei na itovo vakavanua.

⁷ E yavutaki ena Vosa ni Kalou na ka kece e vakavulica o Jisu. (Wilika Joni 17:17.) E dau cavuqaqataka tale ga vakalevu na veitikinivolatabu. (Maciu 4:4, 7, 10) Era muria na ivakaraitaki i Jisu na tamata ni Kalou, nira yavutaka ena iVolatabu na ka kece era vakavulica.

8. Na cava e kaya o Jisu me baleta na noda sokaloutaki Jiova?

⁸ Meda sokaloutaki Jiova duadua ga. E kaya na Same 83:18: “Na yacamuni ga o Jiova, o kemuni ga oni Cecere Duadua e vuravura taucoko.” E vinakata o Jisu mera kila na Kalou dina na lewenivanua, e vakavulica tale ga na yaca ni Kalou. (Wilika Joni 17:6.) E kaya o Jisu: “E dodonu mo sokalou vei Jiova na nomu Kalou, me vakatabakidua vua na nomu veiqaravi tabu.” (Maciu 4:10) Eda muria gona na ivakaraitaki i Jisu na tamata ni Kalou. Eda sokaloutaki Jiova duadua ga, eda vakayagataka na yacana qai vakavulici ira eso tale ena yaca qori kei na veika ena cakava ena vukuda.

9, 10. Eda vakaraitaka vakacava nida veilomani?

⁹ Me laurai ena keda maliwa na loloma dina. A vakavulici ratou na nona tisaipeli o Jisu me ratou dau veilomani. (Wilika Joni 13:35.) Se mani vanua cava eda cavutu mai kina, noda itovo vakavanua, vutuniyau se dravudravua, na loloma e vakaduavatataki keda vakamataveitacini. (Kolosa 3:14) Qori na vuna eda sega ni vakaitavi kina ena ivalu meda lai veivakamatematei. E kaya na iVolatabu: “Na ka qo era na kilai kina na luve ni Kalou kei ira na luve ni Tevoro: O koya e sega ni cakava  tiko na ka dodonu e sega ni tovata kei na Kalou, e vaka kina o koya e sega ni lomani tacina . . . meda veilomani, meda kua ni vakataki Keni, o koya e tovata kei na vunica, ni labati tacina.”​—1 Joni 3:10-12; 4:20, 21.

¹⁰ Eda vakayagataka na noda gauna, noda igu, kei na noda iyau meda veivukei qai veivakayaloqaqataki. (Iperiu 10:24, 25) Eda “caka vinaka vei ira na tamata kece.”—Kalatia 6:10.

11. Na cava eda vakabauta kina ni rawa ga na bula ena vuku i Jisu?

¹¹ Meda vakabauta ni rawa ga na bula ena vuku i Jisu Karisito. E kaya na iVolatabu: “E sega tale ni dua ena veivakabulai, ni sega tale ni dua na yaca e ruku i lomalagi e soli vei keda meda vakabulai kina.” (Cakacaka 4:12) A vakamacalataki ena Wase 5 ni a talai Jisu mai o Jiova me solia na nona bula me kedra ivoli na tamata talairawarawa. (Maciu 20:28) Sa digitaki Jisu o Jiova me Tui ena lewa na vuravura. Qori na vuna e tukuni kina ena iVolatabu meda talairawarawa vei Jisu ke da via bula tawamudu.—Wilika Joni 3:36.

12. Na cava eda sega ni siova kina na veika vakapolitiki?

¹² Meda kua ni siova na veika vakapolitiki. A sega ni vakaitavi o Jisu ena politiki. Ena gauna e lewai kina, a kaya vei Pailato na iliuliu ni Roma: “E sega ni vakavuravura na noqu Matanitu.” (Wilika Joni 18:36.) Eda muria na ivakaraitaki i Jisu meda yalodina ina Matanitu vakalomalagi ni Kalou. Oya na vuna eda sega ni siova kina na veika vakapolitiki, se mani vanua cava eda tiko kina. Ia e vakaroti keda na iVolatabu meda talairawarawa “vei ira na iliuliu cecere,” se na matanitu vakatamata. (Roma 13:1) Eda na muria na lawa ni vanua eda tiko kina. Ia ke veisaqasaqa kei na lawa ni Kalou na lawa vakatamata, eda na muria na nodratou ivakaraitaki na  yapositolo ni ratou kaya: “E dodonu me keitou talairawarawa ga vua na Kalou ni iliuliu, sega vua na tamata.”—Cakacaka 5:29; Marika 12:17.

13. Na cava eda dau vunautaka me baleta na Matanitu ni Kalou?

¹³ Meda vakabauta ni iwali duadua ga ni leqa e vuravura na Matanitu ni Kalou. E kaya o Jisu ni na vunautaki e veiyasa i vuravura na “itukutuku vinaka . . . ni Matanitu ni Kalou.” (Wilika Maciu 24:14.) E sega ni cakava rawa na matanitu vakatamata na ka ena cakava ena vukuda na Matanitu ni Kalou. (Same 146:3) A vakavulici keda o Jisu meda masulaka na Matanitu ni Kalou ni kaya: “Me yaco mai na nomuni Matanitu. Me caka na lomamuni e vuravura me vaka e caka tiko mai lomalagi.” (Maciu 6:10) E tukuni ena iVolatabu ni na vakarusa na matanitu kece vakatamata na Matanitu ni Kalou, qai “tu ga me tawamudu.”—Taniela 2:44.

14. O cei o nanuma nira qarava tiko na Kalou ena sala e vakadonuya?

¹⁴ Ni o vakasamataka na veika eda se qai dikeva oti, e bibi mo taroga: ‘Na lotu cava e yavutaka na kena ivakavuvuli ena iVolatabu? O cei era dau vunautaka na yaca ni Kalou? O cei era dau veilomani dina ra qai vakabauta ni talai Jisu mai na Kalou me vakabulai keda? O cei era sega ni siova na veika vakapolitiki? O cei era vunautaka tiko ni iwali duadua ga ni noda leqa na Matanitu ni Kalou? Sega tale ni dua, o ira ga na iVakadinadina i Jiova.—Aisea 43:10-12.

15. Na cava meda cakava me vakadonuya kina na Kalou na noda sokalou?

¹⁵ E sega ni rauta meda vakabauta ga ni bula tiko na Kalou. O ira mada ga na timoni era vakabauta ni bula tiko na Kalou, ia era sega ni talairawarawa vua. (Jemesa 2:19) Ke da vinakata me vakadonuya na Kalou na noda  sokalou, meda kua wale ga ni vakabauta ni bula tiko, ia meda cakava tale ga na ka e tukuna.

16. Na cava meda cata kina na lotu lasu?

¹⁶ E bibi meda cata na lotu lasu me rawa ni vakadonuya na Kalou na noda sokalou. E vola na parofita o Aisea: “Ni lako tani mai vua, moni savasava tiko ga.” (Aisea 52:11; 2 Korinica 6:17) Io, e bibi meda cata na ka kece e sema ina lotu lasu.

17, 18. O cei o “Papiloni na Ka Levu”? Na cava meda vagalalataki keda totolo kina mai vua?

¹⁷ O cei o lotu lasu? Qori na lotu cava ga e vakavulica na ivalavala ni sokalou e veisaqasaqa kei na Vosa ni Kalou. Era vakatokai ena iVolatabu na lotu lasu kece me o “Papiloni na Ka Levu.” (Vakatakila 17:5) E veiganiti na yaca qori baleta e levu na ivakavuvuli lasu e basika ni oti na Waluvu, e tekivu sara ga mai Papiloni. Sa ra qai tete na ivakavuvuli lasu qori e veiyasa i vuravura. Kena ivakaraitaki, e takalevu e Papiloni na ivakavuvuli ni letoluvakalou. E levu tale ga na lotu nikua era vakavulica na letoluvakalou, ia e vakamatatataka na iVolatabu ni dua ga na Kalou dina, o Jiova, e Luvena o Jisu. (Joni 17:3) Era vakabauta tale ga na kai Papiloni ni gauna e mate kina na tamata, e bula tiko e dua tale na ka e nanumi ni yalona qai rawa ni lai vakararawataki i eli. Ia e sega ni dina qori.—Raica na iKuri ni iVakamacala 14, 17, kei na 18.

¹⁸ E parofisaitaka na Kalou nira sa vakarau vakarusai na lotu lasu kece. (Vakatakila 18:8) O sa raica rawa na vuna e bibi kina vua e dua me vagalalataki koya mai vei lotu lasu? E vinakata na Kalou o Jiova mo cakava qori ni se soli tiko na gauna, de o bera.—Vakatakila 18:4.

19. Ena karoni iko vakacava o Jiova ni o vakatulewataka mo qaravi koya?

¹⁹ Ke o vakatulewataka mo biubiu mai na lotu lasu mo  qaravi Jiova, era na rairai lomatarotarotaka nomu vakatulewa eso na nomu itokani se wekamu. E rawa sara ga nira tusaqati iko. Ia ena karoni iko o Jiova ni o na mai lewena e dua na vuvale e veiyasa i vuravura era dau veilomani dina. E rawa ni o vakanuinui tale ga mo bula tawamudu ena vuravura vou ni Kalou. (Marika 10:28-30) O cei e kila, de dua era na qai vulica na iVolatabu na nomu itokani se wekamu era tusaqati iko ni o vakatulewataka mo qaravi Jiova.

20. Na cava e bibi kina mo qarava na Kalou ena kena ivalavala e vakadonuya?

²⁰ Sa voleka sara ni muduka na Kalou na ka ca kece, me qai lewa na vuravura na nona Matanitu. (2 Pita 3:9, 13) Sa na dua dina na gauna totoka ya! O ira kece na bula era na sokaloutaki Jiova ena kena ivalavala e vakadonuya. E bibi gona mo vakatulewataka sara ga ena gauna qo mo qarava na Kalou ena kena ivalavala e vakadonuya.