Raica sara na lewena

Raica na lewenivola

 WASE ONO

Era tu e Vei na Mate?

Era tu e Vei na Mate?

1-3. Na cava eda dau vakataroga me baleta na mate? Era sauma vakacava na taro qori eso na lotu?

E YALATAKA na iVolatabu ni “na sega tale na mate.” (Vakatakila 21:4) Eda vulica ena Wase 5, nida rawa ni bula tawamudu ena vuku ni ivoli. Ia eda se mate tiko ena gauna qo. (Dauvunau 9:5) Oya na vuna eda dau vaqaqa kina se cava e yaco nida mate.

2 Eda dau via kila na isau ni taro qori ni mate e dua na wekada. Eda na rairai veinanuyaka ‘se vanua cava sa tu kina na wekada ya.’ Vakacava e vakaraici keda tiko mai? E rawa ni vukei keda? Eda na sota tale ena dua na gauna?’

3 E duidui na ka era tukuna na veimatalotu ena vica na taro qori. Eso era vakavulica ni o na lako i lomalagi ke o tamata vinaka, o na lai kama i eli ke o tamata ca. Eso era kaya ni o na vuki mo yalo, o na lai tiko kei ira na wekamu era sa mate. Eso tale era kaya ni o na lewai ena gauna o mate kina, o na qai sucu tale se o na veisau mo dua tale na tamata se manumanu.

4. Na vakasama cava era tautauvata kece kina na veimatalotu?

4 Ena rairai duidui na ka era vakavulica na veimatalotu. Ia e dua na vakasama era tautauvata kece kina. Era vakavulica ni bula tale tiko e dua na ka ni mate na tamata. Vakacava e dina qori?

ERA TU E VEI NA MATE?

5, 6. Na cava e yaco nida mate?

5 E kila o Jiova na ka e yacovi keda nida mate. Sa  tukuna rawa tu vei keda ni gauna e mate kina e dua sa cava sara ga e kea na nona bula. Na mate e veibasai ni bula. Kena ibalebale e sega ni vakila se vakasamataka tale e dua na ka o koya sa mate. * Eda sega ni rawa ni rai, rogo, se vakasama ena gauna eda mate kina.

6 E vola o Tui Solomoni ni “o ira na mate era sega sara ga ni kila e dua na ka.” Era sega ni rawa ni loloma se veicati ni sa “sega na cakacaka se na vakasama se na kilaka se na vuku ena iBulubulu.” (Wilika Dauvunau 9:5, 6, 10.) E tukuna tale ga na Same 146:4 ni mate e dua, sa takali “nona vakanananu.”

KA E KAYA O JISU ME BALETA NA MATE

E bulia na kawatamata na Kalou me bula tawamudu e vuravura

7. Na cava e tukuna o Jisu me baleta na mate?

7 Ni mate o Lasarusa, e tukuna o Jisu vei ratou na nona tisaipeli: “Sa moce na nodatou itokani o Lasarusa.” Ia e sega ni tukuna o Jisu ni vakacegu tiko o Lasarusa, ni tukuna tale o koya: “Sa mate o Lasarusa.” (Joni 11:11-14) E vakatauvatana o Jisu na mate ina moce. A sega ni tukuna o Jisu ni lako i lomalagi o Lasarusa se lai tiko kei ira na wekana era sa mate. A sega tale ga ni tukuna ni lai vakararawataki i eli o Lasarusa se sucu tale qai veisau me dua tale na tamata se manumanu. Kena ibalebale o Lasarusa e vaka ga e mocelutu. Eso tale na tikinivolatabu e vakatauvatana na mate ina moce. E kaya na iVolatabu ni “sa qai moce, oya ni sa mate” o Sitiveni ena gauna e vakamatei kina. (Cakacaka 7:60) E vola tale ga na yapositolo o Paula ni so na lotu vaKarisito “era sa moce, oya era sa mate.”—1 Korinica 15:6.

8. Eda kila vakacava ni sega ni buli keda na Kalou meda mate?

 8 Vakacava e buli rau o Atama kei Ivi na Kalou me rau mate ena dua na gauna? Sega! E buli rau o Jiova me rau bula uasivi rau qai bula tawamudu. E biuta i lomada o Jiova na gagadre ni bula tawamudu ena gauna e buli keda kina. (Dauvunau 3:11) Era sega ni vinakata na itubutubu mera qase qai mate na luvedra. E va tale ga qori na rai nei Jiova me baleti keda. Ia na cava eda mate tiko kina ni a buli keda na Kalou meda bula tawamudu?

 CAVA EDA MATE KINA?

9. Na cava e sega ni dodonu kina me dredre nodrau muria o Atama kei Ivi na ivakaro i Jiova?

9 E tukuna o Jiova vei Atama ena were o Iteni: “E rawa ni o kana mai na vunikau kece ga e tu ena were, mo mamau kina. Ia mo kua ni kana mai na vunikau e kilai kina na ka vinaka kei na ka ca, ni o na mate dina ena siga o kania kina.” (Vakatekivu 2:9, 16, 17) E sega ni dodonu me dredre nodrau muria o Atama kei Ivi na ivakaro matata qori. E tu tale ga vei Jiova na dodonu me tukuna vei rau na cava e vinaka se ca. Na nodrau talairawarawa vei Jiova ena vakaraitaka ni rau doka na nona veiliutaki, rau qai vakavinavinakataka vakalevu na ka kece e solia vei rau.

10, 11. (a) E vakacalai rau vakacava o Atama kei Ivi o Setani? (b) Na cava e sega ni dua kina nodrau iulubale o Atama kei Ivi?

10 Ka ni rarawa ni rau digia o Atama kei Ivi me rau talaidredre vei Jiova. E kaya o Setani vei Ivi: “E kaya sara ga na Kalou mo drau kua ni kana mai na vunikau kece e tu ena were?” E sauma o Ivi: “E rawa ni keirau kania na vuata mai na vunikau ena were. Ia e kaya na Kalou me baleta na vuata mai na vunikau e tu ena lomadonu ni were: ‘Drau kua ni kana mai kina, kua, drau kua ni tara, de drau mate.’”—Vakatekivu 3:1-3.

11 E kaya o Setani: “Drau na sega dina ni mate. E kila na Kalou ni siga ga drau kana kina, ena rai na matamudrau, drau na vaka na Kalou, drau na kila na ka vinaka kei na ka ca.” (Vakatekivu 3:4-6) E vinakata o Setani me vakabauta o Ivi ni rawa ni vakatulewataka ga vakataki koya na ka e vinaka se ca. E lasutaka tale ga o Setani ni na sega ni mate o Ivi ke talaidredre, mani kania o Ivi na  vuanikau qai solia eso vei watina. Sa matata vinaka tu vei Atama kei Ivi na ivakaro i Jiova me rau kua ni kania na vuanikau. E sega ni dredre na ivakaro i Jiova ya, ia na nodrau kania e vakaraitaka ni rau nakita me rau talaidredre. Rau vakaraitaka tale ga ni rau sega ni doka na Tamadrau vakalomalagi e dauloloma. E sega sara ga ni dua nodrau iulubale!

12. Na cava e vakamosiyalo kina nodrau talaidredre vei Jiova o Atama kei Ivi?

12 E vakamosiyalo dina nodrau talaidredre vua na Dauveibuli na vuda! Qori tale ga na ka ena vakila e dua na itubutubu e solia na nona vinaka kece ena nona susugi luvena. Ia e qai talaidredre o gone, e cakava na veibasai ni ka kece e kerei vua me cakava.

A buli mai na kuvuniqele o Atama, a suka tale ina kuvuniqele

13. Ni tukuna o Jiova “o na suka mo kuvuniqele tale,” na cava e vakaibalebaletaka?

13 Erau sega ni bula tawamudu o Atama kei Ivi ni rau talaidredre. Sa tukuna oti o Jiova vei Atama: “Ni o kuvuniqele ga, o na suka mo kuvuniqele tale.” (Wilika Vakatekivu 3:19.) Kena ibalebale ena suka tale o Atama me kuvuniqele, qori na ituvaki ga a tu kina e liu ni bera ni buli. (Vakatekivu 2:7) A mani mate o Atama ena vuku ni nona valavala ca, sa cava tale ga e keri nona bula.

14. Na cava eda mate kina?

14 Ke rau a talairawarawa vua na Kalou o  Atama kei Ivi, ke rau se bula tu ga nikua. Ia erau valavala ca rau qai mate ena vuku ni nodrau talaidredre. Na ivalavala ca e vaka e dua na mate vakadomobula rau vakadewa vei keda na vuda. Eda sucu ivalavala ca kece, oya na vuna eda mate kina. (Roma 5:12) Ia qori e sega ni inaki ni Kalou me baleta na kawatamata. E sega ni vinakata na Kalou meda mate, e vakatokai mada ga ena iVolatabu na mate me “meca.”—1 Korinica 15:26.

SEREKI KEDA NA KA DINA

15. E sereki keda vakacava na ka dina me baleta na mate?

15 Na ka dina e sereki keda mai na ivakavuvuli lasu me baleta na mate. E tukuna na iVolatabu nira sega ni vakila na mosi se rarawa o ira na mate. Eda sega ni rawa ni veivosaki kei ira. Eda sega ni rawa ni veivukei. Era sega tale ga ni rawa ni vakaleqai keda, meda kua gona ni rerevaki ira. Ia era tukuna e levu na lotu nira lai bula tale tiko na mate ena dua na vanua, eda na rawa ni vukei ira nida soli ilavo vei ira na bete se italatala. Eda sega ni vakacalai ena ivakavuvuli lasu qori nida kila na ka dina me baleta na mate.

16. Na lasu cava era vakavulica e levu na lotu me baleta na mate?

16 E vakayagataki lotu lasu o Setani me vakacalai keda me nanumi nira se bula tiko na mate. Kena ivakaraitaki, era vakavulica eso na lotu ni bula tale tiko e dua na ka nida mate. Vakacava nomu lotu, e vakavulica tale ga qori se vakavulica na ka e tukuna na iVolatabu me baleta na mate? E dau lasutaki ira na tamata o Setani mera kua kina ni qaravi Jiova.

17. Na cava e beci kina o Jiova ni tukuni nira na lai kama i eli na tamata?

17 E vakadomobula eso tale na ka era vakavuvulitaka e levu na lotu.  Kena ivakaraitaki, eso era vakavulica nira na lai kama tawamudu i elina tamata ca. Ia na lasu qori e beci kina o Jiova. Ena sega vakadua ni vakatara me vakararawataki va qori na kawatamata! (Wilika 1 Joni 4:8.) Kaya mada ke dua e totogitaka e dua na gone ena nona vakama na ligana ena buka. O na rairai kaya ni dauveivakalolomataki o koya qori. O na sega sara ga ni via kilai koya. E vinakata o Setani me va sara ga qori noda rai me baleti Jiova!

18. Na cava meda kua ni rerevaki ira kina na mate?

18 Era vakavuvulitaka eso na lotu ni mate na tamata, ena vuki me yalo. Era kaya ni dodonu mera rokovi o ira na sa mate nira rawa ni veivuke, mera rerevaki tale ga nira rawa ni veivakaleqai. Era vakabauta na lasu qori e levu. Era sega kina ni qaravi Jiova, era sokaloutaki ira ga na mate se vakalomavinakataki ira nira rerevaki ira. Ia e sega ni dodonu meda rerevaki ira na mate nira sa sega ni vakila e dua na ka. O Jiova na Dauveibuli, e Kalou dina qai dodonu meda sokaloutaki koya duadua ga.—Vakatakila 4:11.

19. E yaga vakacava noda kila na ka dina me baleta na mate?

19 Noda kila na ka dina me baleta na mate e sereki keda mai na ivakavuvuli lasu. E vakaibalebale tale ga kina vei keda na yalayala totoka i Jiova me baleta na veigauna se bera mai.

20. Na cava eda na raica ena wase tarava?

20 A se taroga makawa sara o Jope: “Ke mate e dua na tamata, ena bula tale?” (Jope 14:14) Vakacava ena rawa ni bula dina e dua sa mate? E veivakacegui na ka e tukuna na Kalou ena iVolatabu. Eda na qai raica qori ena wase tarava.

^ para. 5 Eso era vakabauta ni mate e dua, e bula tale tiko e dua na ka e nanumi ni yalona. Raica na iKuri ni iVakamacala 17 kei na 18.