Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE TINIKARUA

O Rawa Vakacava ni Veitokani kei na Kalou?

O Rawa Vakacava ni Veitokani kei na Kalou?

1, 2. O cei soti era itokani i Jiova?

O CEI o na vinakata me nomu itokani? E macala ga ni o na via veitokani kei na dua o taleitaka. E rawarawa na nomudrau veimaliwai kei koya qori, e dau yalovinaka qai vakaraitaka eso tale na itovo totoka.

2 Na Kalou o Jiova e digi ira eso na tamata mera nona itokani. Kena ivakaraitaki, e itokani i Jiova o Eparama. (Aisea 41:8; Jemesa 2:23) E taleitaki Tevita o Jiova, qai kaya ni ‘donu e lomana’ o koya. (Cakacaka 13:22) E “mareqeti vakalevu” tale ga vei Jiova na parofita o Taniela.—Taniela 9:23.

3. Na cava eratou itokani kina i Jiova o Eparama, Tevita, kei Taniela?

3 Na cava eratou itokani kina i Jiova o Eparama, Tevita, kei Taniela? E kaya vei Eparama o Jiova: “O vakarorogo ina domoqu.” (Vakatekivu 22:18) Era itokani i Jiova o ira era yalomalumalumu ra qai talairawarawa vua. E rawa mada ga ni veitokani kei koya e dua na matanitu taucoko. A kaya o Jiova ina matanitu o Isireli: “Moni muria na noqu vosa au na qai nomuni Kalou, oni na noqu tamata.” (Jeremaia 7:23) E bibi tale ga mo talairawarawa vei Jiova ke o via nona itokani.

TAQOMAKI IRA NONA ITOKANI O JIOVA

4, 5. E taqomaki ira vakacava na nona itokani o Jiova?

4 E kaya na iVolatabu ni vinakata o Jiova “me vakaraitaka na nona kaukaua vei ira e taucoko vua na lomadra.” (2 Veigauna 16:9) E yalataka tale ga o Jiova vei ira na nona  itokani ena Same 32:8: “Au na vakayalomatuataki iko qai vakavulici iko ena sala mo muria. Au na vakasalataki iko niu raici iko tiko e mataqu.”

5 E saga tiko vakaukaua e dua na meca me vakaleqa noda veitokani kei na Kalou. Ia e vinakata o Jiova me taqomaki keda. (Wilika Same 55:22.) Eda qaravi Jiova ena lomada taucoko nida nona itokani. Eda yalodina vua nida sotava mada ga na ituvaki dredre. Eda duavata tale ga kei na ka e vola na daunisame me baleti Jiova: “Ni tu e ligaqu imatau o koya, au na sega vakadua ni yavalati.” (Same 16:8; 63:8) E saga vakacava o Setani me vakaleqa noda veitokani kei na Kalou?

VEIBEITAKI I SETANI

6. Na cava e kaya o Setani me baleta na tamata?

6 E vakamacalataki ena Wase 11 nona saqati Jiova o Setani, e beitaki koya ni lasulasu qai iLiuliu ca ni sega ni solia na galala me rau lewa ga o Atama kei Ivi na ka e donu kei na ka e cala. E tukuni ena Jope ni o Setani e beitaki ira tale ga na tamata era via veitokani kei na Kalou. E kaya o Setani ni o ira qori era qarava ga na Kalou mera rawaka kina, ia era sega ni lomani koya. E kaya tale ga o Setani ni rawa ni vagolei ira tani kece na tamata mera kua ni qarava na Kalou. Meda raica mada na ka eda rawa ni vulica vei Jope, kei na sala e taqomaki koya kina o Jiova.

7, 8. (a) E duatani vakacava o Jope mai vei ira ena nona itabagauna? (b) Na cava e kaya o Setani me baleti Jope?

7 E turaga vinaka o Jope qai bula ena rauta ni 3,600 na yabaki sa oti. A kaya o Jiova ni sega ni dua e vuravura e tautauvata kei Jope ena nona itabagauna. E doka vakalevu na Kalou qai cata na ka ca. (Jope 1:8) Io, o Jope e itokani dina i Jiova.

8 E kaya o Setani ni qarava tiko na Kalou o Jope ena  vuku ni veika vinaka e rawata kina. E kaya vei Jiova o Setani: “Oni sega ni viribaiti koya moni taqomaki koya kina, na nona vale kei na ka kece e taukena? Oni vakalougatataka na cakacaka ni ligana, sa robota tale ga na vanua na nona manumanu. Ia qo, dodoka mada na ligamuni qai vakarusa na ka kece e taukena, ena vosavakacacataki kemuni dina e matamuni.”—Jope 1:10, 11.

9. Na cava e vakalaiva o Jiova me cakava o Setani?

9 E beitaki Jope o Setani ni qarava tiko ga na Kalou me rawaka kina. E kaya tale ga o Setani ni rawa ni vagolei Jope tani me kua ni qaravi Jiova. E kila o Jiova ni lasu o Setani, ia e vakalaiva me vakatovolei Jope me kilai kina ke yavutaka ena loloma o Jope na nona veitokani kei Jiova.

VAKATOVOLEI JOPE O SETANI

10. E vakatovolei Jope vakacava o Setani? Na cava e cakava o Jope?

10 A butakoca se vakamatea kece o Setani na manumanu i Jope. E vakamatea e levu na nona dauveiqaravi, oti sa qai vakamatei ratou na tini na luvena ena dua na cava. Sega tale ni dua na ka e vo, ia e yalodina tu ga vei Jiova o Jope. “Ena ka kece qo, e sega ni valavala ca o Jope se beitaka na Kalou ni cakacala.”—Jope 1:12-19, 22.

Vakalougatataki Jope o Jiova ena nona yalodina

11. (a) Na cava tale e cakava vei Jope o Setani? (b) Na cava e qai cakava o Jope?

11 E sega ni cegu o Setani. E kaya tale vua na Kalou: “Tara sara na suina kei na lewena, ena vosavakacacataki kemuni e matamuni.” E mani vakavuna o Setani me tauvi Jope e dua na mate mosi. (Jope 2:5, 7) Ia e yalodina tale o Jope vei Jiova qai kaya: “Me yacova niu mate, au na sega ni soro ena noqu yalodina!”—Jope 27:5.

12. E vakadinadinataka vakacava o Jope ni lasulasu o Setani?

12 E sega ni kila o Jope na veibeitaki i Setani se na vuna e sotava kina e levu na ka rarawa. E nanuma ni vakavuna  o Jiova na leqa e sotava. (Jope 6:4; 16:11-14) Ia e yalodina tiko ga o Jope vei Jiova. Qori e vakadinadinataka ni sega ni nanumi koya ga o Jope. E itokani ni Kalou ni lomani koya. Kena ibalebale e lasu na veibeitaki i Setani!

13. Na cava e yaco ena vuku ni yalodina i Jope?

13 E sega ni kila o Jope na veika e yaco voli mai lomalagi, ia e yalodina vua na Kalou qai vakadinadinataka ni o Setani ga e ca. A qai vakalougatataki Jope o Jiova ena vuku ni nona yalodina.—Jope 42:12-17.

EDA OKATI TALE GA ENA VEIBEITAKI I SETANI

14, 15. Na veibeitaki cava e cakava me baleti keda kece o Setani?

14 E yaga vei keda na ivakaraitaki i Jope ni beitaki keda tale ga nikua o Setani nida qaravi Jiova ga meda rawaka kina. E volatukutukutaki ena Jope 2:4 ni kaya o Setani: “Ena solia na tamata na ka kece e tu vua me bula kina.” E sega ni beitaki Jope ga o Setani, ia e beitaki keda kece nida nanumi keda ga. Ni oti mada ga e vica vata na drau na yabaki mai na mate i Jope, se vosa vakacacataki Jiova tiko ga o Setani qai beitaki ira na nona dauveiqaravi. E vakadinadinataki qori ena Vosa Vakaibalebale 27:11: “Mo vuku na luvequ mo vakamarautaka na lomaqu, me dua na vosa meu tauca vua sa beitaki [se, vosa vakacacataki] au.”

15 O rawa ni digia mo vakalasui Setani ena nomu talairawarawa vei Jiova o qai yalodina vua. De dua ena gadrevi mo cakava eso na veiveisau lelevu ena nomu bula mo veitokani kina kei na Kalou. Ia qori na vakatulewa vinaka duadua o rawa ni cakava, e vakatulewa bibi tale ga. E kaya o Setani ni o na tawayalodina vua na Kalou ke o sotava na leqa. E dau saga me bacani keda meda kua kina ni yalodina vua na Kalou. E vakayacora vakacava qori?

16. (a) Na iwalewale cava e vakayagataka o Setani me tarova kina noda qaravi Jiova? (b) Na cava e rawa ni cakava vei iko na Tevoro me tarova kina nomu qaravi Jiova?

 16 E vakayagataka o Setani e levu na iwalewale me vakaleqa kina noda veitokani kei na Kalou. Nona sasaga e rawa ni “vaka na laione e tagi, e vakasaqara tiko e dua me tiloma.” (1 Pita 5:8) Kua gona ni kurabui ke ra saga nomu itokani, lewe ni vuvale, kei na so tale mera tarova nomu vulica na iVolatabu kei na nomu cakava na ka e dodonu. O rawa mada ga ni vakacacani. * (Joni 15:19, 20) E dau vukici koya tale ga o Setani “me agilosi ni rarama.” Kena ibalebale e rawa ni vakacalai keda meda talaidredre vei Jiova. (2 Korinica 11:14) E vinakata o Setani meda vakabauta nida tawayaga, eda na sega ni qarava rawa kina na Kalou. Qori e dua tale na iwalewale e vakayagataka me tarova kina noda qaravi Jiova.—Vosa Vakaibalebale 24:10.

MURIA NA IVUNAU I JIOVA

17. Na cava eda talairawarawa kina vei Jiova?

17 Eda vakalasui Setani nida talairawarawa vei Jiova. Na cava ena uqeti keda meda talairawarawa? E kaya na iVolatabu: “Mo lomani Jiova na nomu Kalou ena lomamu taucoko, ena nomu vinaka taucoko, kei na nomu kaukaua taucoko.” (Vakarua 6:5) Eda talairawarawa vei Jiova nida lomani koya. Na levu ga ni noda lomani Jiova, na levu tale ga ni noda via cakava na ka kece e tukuna vei keda. E vola na yapositolo o Joni: “Qo na ibalebale ni noda  lomana na Kalou, meda muria na nona ivunau, ia e sega ni icolacola bibi na nona ivunau.”—1 Joni 5:3.

18, 19. (a) Na cava eso na ka e tukuna o Jiova ni cala? (b) Eda kila vakacava ni na sega ni tukuna o Jiova meda cakava na ka eda na sega ni rawata?

18 Na cava eso na ka e tukuna o Jiova ni cala? Eso na ivalavala e cavuti ena kato “ Cata na Veika e Cata o Jiova.” De dua o nanuma ni so na itovo qori era sega ni ca sara. Ia ni o wilika na kedra tikinivolatabu o qai vakasamataka vakabibi, o na vakadinata ni na yaga vei keda noda talairawarawa ina lawa i Jiova. O na rairai liaca ni dodonu mo cakava eso na veiveisau ena nomu bula. Ke o cakava na veiveisau qori ke mani dredre mada ga ena so na gauna, o na vakila na vakacegu kei na marau ena vuku ni nomu yalodina vua na Kalou. (Aisea 48:17, 18) Eda kila vakacava nida rawa ni cakava na veiveisau e gadrevi ena noda bula?

 19 E sega ni dau tukuna o Jiova meda cakava na ka eda na sega ni rawata. (Vakarua 30:11-14) E kila vinaka cake na keda ituvaki o Jiova ni noda itokani dina. E kila na veika eda vinaka kina, kei na noda malumalumu. (Same 103:14) E uqeti keda na yapositolo o Paula: “E dau dina na Kalou ena nona vosa, oya ni na sega ni vakalaiva moni sotava na ka ni veivakatovolei oni na sega ni taqea rawa. Ni oni vakatovolei, ena vakarautaka tale ga na sala moni vosota rawa kina.” (1 Korinica 10:13) Meda nuidei ni na vakaukauataki keda tu ga o Jiova meda cakava na ka dodonu. Ena solia vei iko na “kaukaua e uasivia na kaukaua ni tamata” mo vosota kina na ituvaki dredre. (2 Korinica 4:7) E dau vakadinadinataka o Paula na veivuke i Jiova ni sotava na veika dredre, e rawa kina ni kaya: “Au rawata na ka kece ena vuku i koya e vakaukauataki au.”—Filipai 4:13.

 TALEITAKA NA KA E TALEITAKA NA KALOU

20. Na itovo cava mo vakatotomuria? Na vuna?

20 E bibi meda kua ni cakava na ka e cata o Jiova meda veitokani kina kei koya, ia eso tale na ka meda cakava. (Roma 12:9) Era taleitaka na itokani ni Kalou na ka e taleitaka o koya. E vakamacalataki eso na ka qori ena Same 15:1-5. (Wilika.) Era vakatotomuria na itovo i Jiova na nona itokani ra qai vakaraitaka “na loloma, marau, vakacegu, vosovoso, yalololoma, yalovinaka, vakabauta, yalomalua, lewai koya vinaka.”—Kalatia 5:22, 23.

21. O na vulica vakacava na itovo e taleitaka na Kalou mo rawa ni vakatotomuria?

21 O na vulica vakacava na itovo totoka i Jiova mo rawa ni vakatotomuria? O na kila na ka e taleitaka o Jiova ena nomu wilika kei na nomu vulica wasoma na iVolatabu. (Aisea 30:20, 21) O na lomani Jiova vakalevu ni o cakava qori. Na levu ga ni nomu lomani Jiova, na levu tale ga ni nomu via talairawarawa vua.

22. Na cava na yaga ni nomu talairawarawa vei Jiova?

22 Na veiveisau ena rairai gadrevi mo cakava ena nomu bula, e rawa ni vakatauvatani ina nomu luvata tani na isulu makawa qai tokara na isulu vou. E kaya na iVolatabu ni bibi mo “luvata tani na tamata makawa,” mo qai sulumaka “na itovo vou.” (Kolosa 3:9, 10) E yalataka o Jiova me solia vei keda e “dua na icovi levu,” ke da cakava na veiveisau qori ke dredre mada ga ena so na gauna da qai talairawarawa vua. (Same 19:11) Io, digia mo qaravi Jiova qai vakalasui Setani. Kua ni qaravi Jiova ga ena vuku ni kena veivakalougatataki, ia cakava qori ni o lomani koya dina. O na itokani dina ni Kalou ke o cakava qori!

^ para. 16 Sega ni kena ibalebale qo ni o Setani e vakamuai ira era saga tiko mera tarova nomu vulica na iVolatabu. Ia o Setani “na kalou ni veika vakavuravura qo,” qai ‘lewa tu na vuravura taucoko.’ E sega gona ni kurabuitaki nodra saga eso mera tarova noda qaravi Jiova.—2 Korinica 4:4; 1 Joni 5:19.