Raica sara na lewena

Raica na lewenivola

Na Nodra Taqomaki na Yalewa​—Cava e Kaya na iVolatabu?

Na Nodra Taqomaki na Yalewa​—Cava e Kaya na iVolatabu?

 E vica vata na milioni na marama kei na goneyalewa era vakalolomataki e veiyasa i vuravura. Vakacava o dua vei ira? Raica mada na vuna e kauaitaka kina na Kalou na nodra taqomaki na yalewa, kei na ka ena cakava ena nodra vakalolomataki.

 “Niu se gone, e vakalolomataki au e veisiga o ganequ qai dau tauca na vosa mosimosi. E cakava tale ga qori vei au o noqu nei ena gauna au vakawati kina. Rau dau vakabobulataki au, o koya kei noqu momo. Au sa dau vakasamataka ga meu vakamatei au.”​—Madhu, a Idia.

 E vakadeitaka na World Health Organization ni “yaco vakalevu e veiyasa i vuravura na nodra vakalolomataki na yalewa.” E kaya ni rauta ni dua mai na tolu na yalewa sa vakayacori vua na itovo kaukaua e vale se kucuvi.

 Ke sa dau yacovi iko qori, de dua o na leqataka ni o na sega ni taqomaki ena vanua cava ga o gole kina. O na rawa sara ga ni nanuma ni levu era dau ‘beci ira na yalewa.’ Ia vakacava e kauaitaki ira na yalewa na Kalou?

E tukuni ena iVolatabu ni kauaitaka na Kalou na nodra taqomaki na yalewa

Cava nona rai na Kalou me baleti ira na yalewa?

 Tikinivolatabu: “E bulia [na Kalou] na tagane kei na yalewa.”​—Vakatekivu 1:27.

 Kena ibalebale: Na Kalou e bulia na tagane kei na yalewa. E vinakata me rau dokai. E vinakata tale ga vei tagane me ‘lomani watina me vaka ga nona lomani koya’. Me kua ni vakasaurarataki watina, cakava na itovo kaukaua se tauca vua na vosa mosimosi. (Efeso 5:33; Kolosa 3:19) Io, na Kalou e kauaitaka nodra taqomaki na yalewa.

 “Niu se gone, era vaqaseni au eso na wekaqu. Niu yabaki 17, e vakarerei au na noqu boso niu na vakasakei keu sega ni veiyacovi kei koya. Niu sa uabula, e dau vakalewai au o watiqu, rau noqu itubutubu, kei ira keimami tiko veitikivi. Ia toso na gauna, au vulica na veika me baleti Jiova, b na Dauveibuli. E dau dokai ira na yalewa. Au vakadeitaka ni lomani au, au ka talei tale ga e matana.”​—Maria, Argentina.

Cava ena vukei iko mo vakila na lomavakacegu?

 Tikinivolatabu: “E tiko na itokani eda veivolekati sara, e yawa na tacida dina.”​—Vosa Vakaibalebale 18:24.

 Kena ibalebale: Ena tokoni iko na itokani dina. Rawa ni o talaucaka na lomamu vua e dua o nuitaka.

 Au sega vakadua ni tukuna vua e dua na itovo vakasisila e caka vei au rauta ni 20 na yabaki. Au dau rarawa, nuiqawaqawa qai lomabibi. Ia au lomavakacegu sara ga niu tukuna vua e dua e tu vakarau me rogoci au.”​—Elif, Türkiye.

 Tikinivolatabu: ‘Biuta na nomu lomaocaoca kece vua [na Kalou], ni kauaitaki iko o koya.’​—1 Pita 5:7.

 Kena ibalebale: Na Kalou e rogoci iko ni o masu vua. (Same 55:22; 65:2) Ena vukei iko mo kila ni o mareqeti vakalevu vua, baleta ni kauaitaki iko.

 “Noqu vulica na veika me baleti Jiova, e vakacegui au mai na rarawa kei na mosi au sotava. Qo au sa rawa ni talaucaka kece vua na lomaqu ena masu. E vaka ga e noqu itokani e kila vinaka na ka au sotava.”​—Ana, Belize.

Vakacava ena vakaotia na Kalou na nodra vakalolomataki na yalewa?

 Tikinivolatabu: “Jiova . . . na vakaraitaka na lewadodonu vei ira na sega ni vakatamani kei ira na bibivoro, me kua tale ni vakarerei ira tiko na tamata e vuravura.”​—Same 10:​17, 18.

 Kena ibalebale: Ena vakarau vakaotia kece na Kalou na veika tawadodonu, okati kina na veivakalolomataki kei na itovo kaukaua e dau caka vei ira na yalewa.

 E veivakacegui niu kila ni sa voleka na gauna me vakaotia kina o Jiova na nodra vakalolomataki na yalewa kei na goneyalewa lalai. Au vakila sara ga kina na vakacegu ni vakasama.”​—Roberta, Mexico.

 Yalovinaka, ke o via kila eso tale na inuinui e tukuni ena iVolatabu, na vuna mo nuitaka na ka e yalataka, kei na sala era veivakacegui kina ena iVolatabu na iVakadinadina i Jiova, kerea mo sikovi.

 Download na kena e tabaki.

a Sa veisau eso na yaca.

b Na yaca ni Kalou o Jiova. Raica na ulutaga “O Cei o Jiova?