Ena iotioti ni veisiga qo eda na “rogoca na ivalu, kei na itukutuku ni ivalu.” (Maciu 24:6) Ia dua na ka na veivuke e caka vei ira na tacida era sotava na ituvaki va qori. E veiuqeti dina na iKatolu ni iRogo Mai na iLawalawa Dauvakatulewa 2022, me baleta na nodra vukei na tacida era tiko ena Tokalou kei Urope ra vakaleqai ena ivalu e Ukraine. E vakarautaki vakacava na ka ni veivuke ni yaco tiko na ivalu? E yaga vakacava vei ira na tacida e Ukraine na veivuke qori?

Veika e Gadrevi kei na Sala e Vakau Kina

 A yaco na ivalu e Ukraine ena ika24 ni Feperueri 2022. E vakadonuya na Komiti ni Kodineita me vakayagataki eso na iwase ni lavo mera vukei kina na tacida e Ukraine. E volia sara na valenivolavola ni tabana e Ukraine na iyaya ni veivuke, qai lesia e 27 na Komiti ni Vakacoko mera veisoliyaka na iyaya qori.

 Era vakasamataka tale ga na tacida ena itikotiko liu e Merika na sala mera veivuke kina. Ratou kerea na Komiti ni Kodineita kei na Komiti ni Tabaivola ni iLawalawa Dauvakatulewa ena tabana e qarava na volivoli, me ratou cakacaka vata kei ira na tacida ena valenivolavola ni tabana e Ukraine kei Poladi ena veivuke me vakarautaki, kei na ka me caka ena ituvaki qori. Era bose vata e veisiga na tacida ena tabana ni Volivoli, tabana ni Vakau iYaya kei na tabana ni Lawa mai na rua na valenivolavola ni tabana qori, kei ratou na Komiti ni Tabana e Ukraine kei ratou na tabana ni Volivoli mera veivosakitaka na ka ni veivuke me caka.

 E kaya o Jay Swinney e tiko ena tabana ni volivoli: “Keitou na saga mada i liu me kilai na ka e gadrevi. Keitou vinakata me vakarautaki vei ira na tacida na kakana e matau vei ira, kei na iyaya ni tiko bulabula. Ia ena vinakati tale ga me keitou kila na sala me vakau kina na iyaya e Ukraine ni yaco tiko na ivalu. Me taqomaki vinaka, me veisoliyaki tale ga vakatotolo.”

 Ena ika9 ni Maji 2022, ratou sa kila na tacida qori na ka era vinakata na mataveitacini e Ukraine. E vakarautaki na kateni na kakana me vaka na tini ika kei na tini lewenimanumanu, na witi, raisi, bini, kei na iyaya ni tiko bulabula me vaka na sovu kei na pepa ni valelailai. Gauna qori, na vakau ni dua na kateni iyaya vua e dua na tacida, e rauta ni $65 na ilavo ni Merika ena loma ni va na macawa. E laurai gona ni vica vata na udolu na tacida era vinakata na iyaya va qori. E vakadonuya kina na Komiti ni Kodineita e vica na iwase ni ilavo me vakayagataki ena ka ni veivuke. Ia ena veisoliyaki vakacava vei ira na mataveitacini, ra qai kua ni vakaleqai kina na tacida era veivuke?

 Ena ika13 ni Maji, rau vakatovolea e rua na tacida tagane na veisoliyaki ni iyaya mai na valenivolavola ni tabana e Poladi ina valeniyaya e volekati e Lviv, e Ukraine. Ni vo e vica na siga me rau biubiu, era vukei rau eso na tacida mai na valenivolavola ni tabana e Poladi kei Ukraine ena nodrau ilakolako. Era vakarautaka na ka vakaivola me rawa ni rau takoso ena iyala ni vanua. Era raica tale ga me laurai vinaka ena nodrau lori na ivakatakilakila ni ka ni veivuke. Era veivosakitaka tale ga kei na so na tacida e Ukraine na sala rawarawa me rau takoso kina. Na vakavakarau vinaka qori kei na nona veivakalougatataki o Jiova, e soli rawa kina na ka ni veivuke vei ratou na Komiti ni Vakacoko e Lviv ena loma ga ni 24 na aua. Rau lesu tale i Poladi na tacida qai sega ni vakaleqai nodrau bula.

 E rawa vinaka sara na imatai ni tirivu, ia e lailai mai na dua na tani na ka ni veivuke e veisoliyaki. E vinakati tale e 220 na tani na ka ni veivuke. Ena vakau qai veisoliyaki vakacava na ka ni veivuke qori?

“Era Yalorawarawa ni Cabori Ira na Nomuni Tamata”

 Oti na kena tabaki ena jw.org na irogo me baleti ira na tacida era vakaleqai ena ivalu mai Ukraine, era vinakata e levu e veiyasa i vuravura mera veivuke. Levu era tu e vanuatani era cau vakailavo ena cakacaka e vuravura raraba nira kila ena vakayagataki vinaka na ilavo qori. Eso tale era tiko ena iyala ni vanua era solia nodra gauna, kaukaua, kei na ka era taukena mera veivuke kina. Raica mada qo e vica na kena ivakaraitaki.

 Era vakarautaka na tacida era veivuke e vica vata na udolu na kateni na iyaya, kei na kad era droinitaka na gone. E kaya o Bartosz Kościelniak, e tiko ena tabana ni volivoli ena valenivolavola ni tabana e Poladi: “Au sa dau wilika vakalevu na Same 110:​3, e tukuni kina nira na ‘yalorawarawa na tamata i Jiova mera cabori ira.’ Qo au vakadinadinataka sara ga na nodra veitokoni na tacida. Era yalorawarawa ra qai tu vakarau mera veivuke. Au raica kina na dina ni tikinivolatabu qori.”

 E taukena tiko e dua na tacida e dua kabani ni vakau iyaya na international logistics company. E solia na nona lori lelevu kei na benisini me vakayagataki ena ka ni veivuke. E kaya: “Qo e dua na sala au vakaraitaka kina noqu lomani ira na tacida kei Jiova. Au marau niu veivuke.” E sivia ni 2,034 na qaloni na benisini e cautaka. Ra qai vakayagataka na tacida nodra gauna kei na kaukaua, mera draivataka e rauta ni 48,000 na kilomita mera veisoliyaka na iyaya ni veivuke!

 Ena ika28 ni Maji, e veisoliyaki rawa kina e Ukraine e rauta ni 110 na tani na kakana, iyaya ni tiko bulabula, kei na wainimate! E laurai kina na nodra loloma na tacida kei na nodra yalorawarawa ni veivuke. Na nodra cautaka tale ga na tacida kei ira na dauveivoli e levu na iyaya, e sega kina ni vakayagataki e levu na ilavo ena ka ni veivuke. Me yacova mai qo, era sa veisoliyaka na tacida e sivia e 209 na tani na ka ni veivuke e Ukraine. E yaga vakacava vei ira na tacida na ka ni veivuke qo?

“E Vakilai Kina na Nomuni Loloma!”

 Ni yaco yani na ka ni veivuke e Lviv, e veisoliyaka sara qori na Komiti ni Vakacoko vei ira era gadreva na veivuke. E vakau ena levu na siti, eso mada ga e sivia ni 1,300 na kilomita na kena yawa mai Lviv. E vakarautaki na ka ni veivuke ena kena ivakatagedegede e vinaka duadua, e taura tale ga na gauna. a

 E kaya o Markus Reinhardt, e lewe ni Komiti ni Tabana e Ukraine: “Na ituvaki qo era raica sara ga kina na tacida nona loloma o Jiova. Era raica tale ga na bibi ni kena muri na veidusimaki ena isoqosoqo i Jiova ni bera mada ga ni yaco na leqa tubukoso. Kena ivakaraitaki, era uqeti e levu mera maroroya e nodra vale na kakana kei na wai me tauri ira tu me vica na macawa. Me baleta na veidusimaki qori, e kaya kina o Anton e dua na qase ni ivavakoso e Kyiv: ‘Sa vakarautaki keimami rawa tu na isoqosoqo i Jiova ena ituvaki dredre keimami na sotava, keimami vakavinavinakataka tale ga vakalevu qori. E vakabulai keimami na kakana, wai kei na retio keimami maroroya tu.’ Keimami vakavinavinakataka nira muria na mataveitacini na veidusimaki qori, e rawa kina nira tuvanaka vinaka na valenivolavola ni tabana na ka ni veivuke.”

 Cava nodra rai na tacida nira taura na iyaya ni veivuke? Rau tiko e Kharkiv o Mykola kei Zinaida, qo na ka rau tukuna: “E tarai keirau dina na nomuni veinanumi. Vinaka vakalevu na kakana kei na wainimate. Keirau vakadinadinataka ni taqomaki keirau tiko o Jiova.” E tiko tale ga ena yasayasa qori o Valentyna, e kaya: “Ni tekivu na ivalu, dua na ka na laini balavu ni tamata mera volivoli. E dredre me keimami volia na ka keimami vinakata. Ia e kila vinaka tu qori o Jiova qai vukei keimami kina. E lesi ira na tacida mera veisoliyaka ena neimami vale na ka ni veivuke. Era tu kina na ka sara ga keimami gadreva! Ena ituvaki leqataki va qori, ena rawa ni vakila e dua na nona veivuke o Jiova kei na nona isoqosoqo ena sala e sega ni namaka. . . . E ka marautaki ni yaco donu mai na ka ni veivuke, keimami gadreva tale ga.”

 Ratou dro laivi mai Mariupol o Yevhen kei Iryna, ratou kaya: “Keitou marautaka nomuni veivuke kei na nomu tokoni keitou vakavuvale. Kila na cava, e yaco donu sara ga mai. Ni keitou raica na kateni, keitou nanuma ga ni na tiko e loma na iyaya, ia ni keitou dolava e vakilai kina na nomuni loloma!”

 Eda raica ni o Jiova e vakayagataka nona yalo tabu me dusimaki ira na tacida mera veisoliyaka na iyaya ni veivuke ni yaco tiko na “ivalu, kei na itukutuku ni ivalu.” E yaga tale ga vakalevu na nomuni lomasavu na cau ena cakacaka e vuravura raraba, e levu na cau qori e caka ena donate.jw.org. Vinaka vakalevu nomuni lomasavu ena cau!

Vakarautaki Vakatotolo Qai Taqomaki Vinaka na iYaya ni Veivuke

1. 24 ni Feperueri, 2022: Vakadonuya na Komiti ni Kodineita me vakayagataki e dua na wase ni ilavo me rawa ni vakarautaka kina na valenivolavola ni tabana na ka ni veivuke e Ukraine

2. 24 ni Feperueri–8 Maji, 2022: Volia na valenivolavola ni tabana e Ukraine eso na iyaya, ra qai veisoliyaka na Komiti ni Vakacoko. E ciqoma qai veisoliyaka tale ga na iyaya ni veivuke e kau mai Poladi

3. 9 Maji, 2022: Vakadonuya na Komiti ni Kodineita me vakau na iyaya ni veivuke e Ukraine

4. 10–12 Maji, 2022: Tuvanaki me vakatovotovotaki na vakau ni iyaya, kei na kakana e Ukraine

5. 13 Maji, 2022: Vakatovotovotaki me kau na kakana kei na iyaya e Lviv e Ukraine

6. 14–16 Maji, 2022: Era vakarautaka na bolecakacaka ena Local Design/Construction, na kateni na kakana kei na iyaya ni tiko bulabula ena Vale ni Soqoni Lelevu, e volekati Poznan e Poladi

7. 17 Maji, 2022: Oti e va na siga na kena vakatovolei na imatai ni tirivu, sa ra qai vakauta na tacida e 14 na tani na ka ni veivuke ra qai takosova na iyala ni vanua e Ukraine

8. 21–27 Maji, 2022: Vakarautaki na vo ni iyaya ni veivuke e Poladi, oti qai vakau e Ukraine. E veisoliyaki tale ga ena veivanua qori ena loma ga ni 24 na aua

9. 28 Maji, 2022: Oti na kena vakadonui, e vakau sara e Ukraine e 110 na tani na kakana, iyaya ni tiko bulabula kei na wainimate

 Me yacova mai qo, era sa vakauta na tacida e sivia ni 209 na tani na ka ni veivuke e Ukraine.