Raica sara na lewena

IVAKASALA INA VUVALE | VEISUSU

Sala Mera Veivakasalataki Kina na iTubutubu

Sala Mera Veivakasalataki Kina na iTubutubu

 Ka mo kila

Eso na vanua, era dau veivolekati na gone kei na nodra itubutubu, ra dau kere ivakasala tale ga vei nodra itubutubu. Ia eso tale na vanua, era na kere ivakasala na gone vei ira nodra itokani.

Nira cakava qori na gone, era sa talaidredre tiko ina nodra veivakavulici na itubutubu. Nira yacova gona na bula vakaitabagone era na vakila na itubutubu ni sa sega ni yaga nodra veivakavulici. Sa rauta! Nira veimaliwai vakalevu na gone kei ira eso tale nodra itokani, era na veidusimaki ga vakataki ira, sega soti nodra veidusimaki na itubutubu.

Cava e vakavuna mera veivolekati kina na gone kei ira nodra itokani, sega soti nodra itubutubu? Qo eso na vuna.

  • Koronivuli. Na levu ni gauna era tiko vata kina kei ira nodra itokani, era na veitokani dredre sara. De dua era na raica tale ga vakabibi nodra veivakadonui kei na nodra veitokoni nodra itokani. Ena rawa ni ca sara na ivakarau qori nira sa itabagone.

    Dodonu mera vakamareqeta na gone nodra ivakasala nodra itubutubu, sega soti o ira era vuli vata

  • Lailai na gauna ni veimaliwai. E levu na vuvale ena dua vei rau na itubutubu e cakacaka, se rau cakacaka ruarua. Koya gona, nira suka mai na vuli na gone era na tu taudua ga e vale.

  • Bula vakaitabagone. Nira sa itabagone, era na vakatotomuria na ivakarau ni bula vakaitabagone me salavata na kena isulusulu, vosavosa, kei na itovo. E sega ni bibi vei ira nodra nanuma nodra itubutubu, era sa vakaliuci ira ga.

  • Buturara ni veivoli. Levu na ivoli era vakarautaka na daunibisinisi kei na ka ni veivakamarautaki, e vakatabakidua ga vei ira na itabagone. Qori e dua na vuna e dredre kina mera duavata ena so na ka o ira na gone kei nodra itubutubu. E vola o Dr. Robert Epstein: “Ke sega na ivakarau ni bula vakaitabagone, ena lusi e levu na bisinisi era rawata tiko qo e vica vata na bilioni.” *

 Ka o rawa ni cakava

  • Vaqaqacotaka nomudrau veivolekati kei luvemu.

    Kaya na iVolatabu: “Me dei e lomamu na vosa kece qo au vakarota tiko vei iko nikua, mo tugana qori vei luvemu, mo dau tukuna ni o dabe ena nomu vale, ni o taubale e gaunisala, ni o davo sobu, ni o duri cake tale ga.”—Vakarua 6:6, 7.

    Mera vakarautaka ga na itokani na veivuke ena yaga vei luvemu, ia mera kua ni siova nomu itavi vakaitubutubu. Kua ni yalolailai: Era kaya na kenadau ni levu na itabagone era dokai ira nodra itubutubu, ra via vakamarautaki ira tale ga. Ke o dau volekati ira vakalevu na luvemu, era na muria nomu veidusimaki, era na sega ni vakararavi vei ira nodra icaba.

    “Me levu na gauna mo dou cakava vata kina na ka, me vaka na vakasaqa, sasamaki, dou cakava vata tale ga nodra lesoni e koronivuli. Cakava vata eso na ka marautaki, me vaka na qito, sara iyaloyalo, se tivi. Kua ni nanuma mo vakayagataka ga e dua na ‘gauna sa rawa’ me caka kina qo se caka ya. O na sega ni veivolekati kei luvemu ke sega ni levu na gauna drau cakava vata kina eso na ka!”—Lorraine.

  • Mera kua ni veitokani ga kei ira era yabaki vata.

    E kaya na iVolatabu: “Na ka lialia e vauci ena lomana na gone.”—Vosa Vakaibalebale 22:15.

    Eso na itubutubu era taleitaka ni levu nodra itokani na luvedra. Ia me qarauni qori, e vinaka cake me levu nona itokani era duidui yabaki ni bula nira na rawa ni vukei koya me yalomatua. O ira nodra icaba era yabaki vata era na sega ni vakarautaka na ivakasala se veidusimaki ena yaga vei luvemu. O ira ga na itubutubu era rawa ni cakava vinaka na itavi qori.

    “De dua era na kila toka nodra icaba eso na ka, ia era sega ni kila vinaka na veika e vauca na bula ni veisiga, se mera matua, kei na vuku mera vukei ira eso tale na gone mera vakatulewa vakavinaka. Ia era na tubu mera lai matua ke ra muria nodra veidusimaki nodra itubutubu.”—Nadia.

  • Veidusimaki vakavuku.

    E kaya na iVolatabu: “O koya e vakailala kei ira na vuku ena vuku.”—Vosa Vakaibalebale 13:20.

    Nira sa qase na luvemu, ena yaga vakalevu vei ira nomu veimaliwai wasoma kei ira. Mo ivakaraitaki vinaka vei ira.

    “O ira na itubutubu era ivakaraitaki vinaka duadua vei ira na luvedra. Era na via vakataki ira ga nira sa uabula, ke ra vakavulici mera lomani ira nodra itubutubu, qai dokai ira.”—Katherine.

^ para. 13 Mai na ivola Teen 2.0—Saving Our Children and Families From the Torment of Adolescence.