Levu nikua era tiko vata ni bera na vakamau. Eso era cakava qori, mera kila kina ke veiganiti mera vakawati se era nanuma ni na vakavinakataka nodra bula vakawati ke ra mani vakamau. E ka vakavuku me rau tiko vata e rua ni bera na vakamau?

Ena ulutaga qo

•  Cava e kaya na iVolatabu?

•  Ena vinaka me rau tiko vata e le rua ni bera na vakamau?

•  Ena wali na leqa vakailavo ni rau tiko vata e le rua ni bera na vakamau?

•  Ena digitaki na isa ni vakawati vinaka ni rau tiko vata e le rua ni bera na vakamau?

•  E tiko e dua na sala e vinaka cake?

 Cava e kaya na iVolatabu?

•   E vakacala na iVolatabu na veiyacovi ni bera na vakamau. Kena ivakaraitaki, e kaya: “Moni vakatabui kemuni mai na veiyacovi tawadodonu.” (1 Cesalonaika 4:3; 1 Korinica 6:18) Qori e okati kina nodrau veiyacovi e rua, erau nanuma tiko me rau qai vakamau. a Na ivakatagedegede ena iVolatabu e taqomaki rau mai na leqa e rawa ni yaco, me vaka nona bukete o yalewa ni bera na vakamau.

•   E tauyavutaka na Kalou na ituvatuva ni vakawati. E kaya: “Oya na vuna ena biuti tamana kina kei tinana o tagane, ena kabiti watina, erau na lewe dua ga.” (Vakatekivu 2:24) Nodrau veidinadinati ena gauna ni vakamau, ena dei kina na vuvale qai vakilai tale ga na loloma.

 Ena vinaka me rau tiko vata e le rua ni bera na vakamau?

 Eso era duavata kina. Era nanuma mera tiko vata me rawa nira veivuketaka na itavi e vale qai veikilai vinaka. Ia me rawa ni marautaki na vakawati, e bibi na veidinadinati.

 Rau na dei vakacava na veiwatini ena gauna vinaka kei na gauna ca? Ena sega ni dei na vakawati ke rau tiko vata e rua ena loma ni dua na gauna qai sega tu ni rau veidinadinati. Ia ena qaqaco nodrau ivau ni vakawati ke rau dei ena nodrau veidinadinati, rau qai cakacaka vata me wali kina na leqa.

 Bibi me nanumi: O ira na tiko vata ni bera na vakawati, ena dredre mera tuvanaka mera vakamau, ena rawarawa nodra veibiu.

 iVakavuvuli vakaivolatabu: “Na ka kece e kaburaka e dua ena tamusuka tale ga.”​—Kalatia 6:7.

 Ena wali na leqa vakailavo ni rau tiko vata e le rua ni bera na vakamau?

 Eso era duavata kina. Era vakadikeva na Pew Research Center ni 40 na pasede na uabula e Merika, era tiko vata ena vuku ni bula vakailavo. Ni oti e dua na gauna balavu nodra tiko vata, era kaya ni sega ni rawa nira vakamau ena vuku ni leqa vakailavo.

 Nodrau tiko vata e rua ni bera na vakamau, e vakavuna e levu tale na leqa, vakabibi vei ira na yalewa. Kena ivakaraitaki, ni biuti yalewa o tagane, ena qarava duadua ga o yalewa na luvedrau.

 Bibi me nanumi: Levu na leqa e rawa ni yaco ni rau tiko vata e rua ni bera na vakamau.

 iVakavuvuli vakaivolatabu: “O yau o Jiova na nomu Kalou, o koya e vakavulici iko mo vinaka kina.”​—Aisea 48:17.

 Ena digitaki na isa ni vakawati vinaka ni rau tiko vata e le rua ni bera na vakamau?

 Io eso era duavata kina. Ia e kaya na ivola na Fighting for Your Marriage “nira sega ni kila o ira na tiko vata ni bera na vakamau, ni na dredre me rau veitawasei ena vuku ni ka rau taukena vata.” Na vuna? Nira sa qai liaca nira sega ni tautauvata ena levu na ka. Ia e rau sa na vakatulewataka ga me rau tiko vata ena vuku ni ka erau taukena vata me vaka na manumanu, lisi, se sa bukete o yalewa. Era vakatoka qori na daunivakadidike me “inertia of cohabitation b. E tomana na ivola Fighting for Your Marriage ni so tale era nanuma tiko mera veitawasei, era sa dau vakamau ga baleta ni tu e levu na icolacola era na sega ni rawa ni qarava ga vakataki ira.”

 Bibi me nanumi: Nomudrau tiko vata ni bera na vakamau ena sega ni vukei iko, ena vakadredretaka ga nomu digia e dua na isa ni vakawati vinaka.

 iVakavuvuli vakaivolatabu: “O koya e yalomatua e raica na ca qai vunitaki koya, ia na yalowai e lako tu yani qai yacovi koya na leqa.”​—Vosa Vakaibalebale 22:3.

 E tiko e dua na sala e vinaka cake?

 O rawa ni levea na leqa e dau yaco mo marautaka kina nomu bula vakawati. Ena sala cava? Ni o muria na ivakatagedegede ni iVolatabu me baleta na vakawati. Saga mo drau veikilai vinaka ni bera ni drau vakamau. E vinaka cake mo digia e dua na kemu isa e tautauvata na nomudrau vakabauta kei na ka drau taleitaka, qori e bibi sara mai na kena irairai.

 E tu ena iVolatabu na ivakasala e rawa ni vukei iko me dei nomu vakawati qai marautaki tale ga. c Kena ivakaraitaki, e tu ena iVolatabu na ivakavuvuli e rawa ni vukei iko mo . . .

•   yalodina vei kemu isa

•   bulataka na itovo e vinakati vua e dua na isa ni vakawati vinaka

•   kila ke ganiti iko se sega

 Mo kila e levu tale na ka me baleta na ulutaga qo, rai ena iwasewase “Vakawati kei na Vuvale” ena jw.org.

 iVakavuvuli vakaivolatabu: “E vakavuna na Kalou na iVolatabu kece, e yaga me veivakavulici.”​—2 Timoci 3:16.