Ena ulutaga qo

•  Cava nona itavi o tama?

•  E duatani vakacava na nona itavi o tama?

•  Tama kei na luvedra yalewa

•  iVakasala vei ira na tama

 Cava nona itavi o tama?

•   Ni bera ni sucu o luvemu. Na ka o cakava ena gauna qo ni o dua na tagane vakawati, ena dusia na ka o na cakava ni o dua na tama ena veigauna se bera mai. E kaya na ivola Do Fathers Matter?:

   “Na tama e vukei watina bukete ni volivoli, kauti koya vei vuniwai, raica na luvena e buketetaki tiko ena misini na ultrasound se rogoca na tavatukituki ni utona, ena dau tokoni watina ni sa sucu na luvena.”

   “Au sega ni vinakata me nanuma o watiqu ni sega ni dua e tokoni koya ena nona bukete, au saga gona meu vukei koya vakalevu. Keirau vakarautaka vata mada ga nona rumu o luvei keirau. Qori e gauna marautaki dina vei keirau.”—James.

   iVakavuvuli vakaivolatabu: “Oni sega ni kauaitaka ga na ka e baleti kemuni, ni kauaitaka tale ga na ka e baleti ira tale eso.”—Filipai 2:4.

•   Ni sa sucu o luvemu. O na rawa ni veivolekati kei luvemu gone dramidrami ni o keveti koya. Mo veivuke tale ga ena nona qaravi. Ena yaga vakalevu vei luvemu na veika o cakava ni o dua na tama. E vakaraitaka ni o mareqeti luvemu ni o saga mo veivolekati kei koya.

   “Mo biuti iko sara ga ena kena ituvaki o luvemu. Drau qito vata qai veilasamaki. Mo dredre qai veiwali. Mo nanuma ni na vulica duadua e liu vei iko o luvemu na sala e vakaraitaki kina na loloma.”—Richard.

   iVakavuvuli vakaivolatabu: “Na gone era isolisoli nei Jiova, na vua ni katonigone e isau ni ka vinaka.”—Same 127:3

•   Ni tubu tiko o luvemu. Era raica na daunivakadidike, ni o ira na gone era veivolekati kei tamadra, e dau vinaka nodra ka ni vuli, e sega ni tauvi ira na leqa ni vakasama se lomabibi. Era na sega tale ga ni vakayagataka na wainimate gaga se ca nodra itovo. Solia nomu gauna mo veivolekati kina kei luvemu.

   “Ni biubiu e vale o luvequ tagane e kaya ni na sega ni guilecava na neirau dau veitalanoa ena gauna keirau dau gole kina ena motoka se ena vakayakavi. Na gauna sara ga au sega ni namaka, keirau qai dau veitalanoataka eso na ka bibi. E rawa ga qori ni keirau dau veimaliwai vakalevu.”—Dennis.

   iVakavuvuli vakaivolatabu: “Ni qarauna matua na nomuni ilakolako, ni kua ni vakataki ira na lialia, ni vakataki ira ga na vuku, ni vakayagataka vakavinaka na nomuni gauna.”—Efeso 5:15, 16.

 E duatani vakacava na nona itavi o tama?

 Levu era namaki ira na tama mera vakarautaka na ka me bula kina na vuvale, mera veitaqomaki tale ga, era namaki na tina mera vakaceguya na lomadra na lewe ni vuvale. (Vakarua 1:31; Aisea 49:15) Ena so na vuvale era na rawa ni cakava na tina na itavi nei tama, se cakava o tama na itavi nei tina. Ia era kaya na daunivakadidike ni duidui na sala e yaga kina na nodrau dui itavi o tama kei tina ena vuvale. a

 E tukuna e dua na kena ivakaraitaki o Judith Wallerstein e dua e dauveivakasalataki ena bula vakavuvale. E talanoataka na ka e yacovi koya: “Ni coqa o luvequ yalewa yabaki 12, e vinakata me gole vata kei koya ena ambulance o tamana, e kila ni rawa ni taqomaki koya. Ia e valenibula, e vinakata meu tu ga e yasana meu rawa ni vakacegui koya.” b

 “E rawa nira taqomaka na vuvale na tama, qai vukea me dei. Ia e rawa ni dredre mera cakava duadua qori na tina. O ira na tina era dau vakacegui ira na luvedra nira lomani ira qai vakarogoci ira vinaka. Rau rawa gona ni cakacaka vata o tama kei tina me vaka e dua na timi.”—Daniel.

 iVakavuvuli vakaivolatabu: “Na luvequ, mo rogoca na ivakavuvuli nei tamamu, mo kua ni biuta na ivakasala nei tinamu.”—Vosa Vakaibalebale 1:8.

 Tama kei na luvedra yalewa

 Ni o dua na tama, o na vakavulica vei luvemu yalewa na itovo e namaka vei ira na tagane. Ena vulica qori ena rua na sala:

•   Ni raica na nomu itovo vei tinana. Ni o lomana na watimu qai dokai koya, ena raica o luvemu yalewa me va tale ga qori na nona itovo na tagane ena vinakata me vakawatitaka.—1 Pita 3:7.

•   Ni raica na nomu itovo vua. Ni o dokai luvemu yalewa, o vakavulica vua me kua ni dau beci koya. E namaka tale ga qori vei ira eso tale na tagane.

   Kena veibasai, ke dau vakalewai tu ga ena nanuma ni sega na kena yaga. Ena saga mera taleitaki koya eso tale na tagane, o ira mada ga era sega ni lomani koya dina.

   “Na goneyalewa e tokoni koya qai lomani koya o tamana, ena sega ni domona na tagane e sega ni tu vua na itovo me dua na tagane vakawati vinaka.”—Wayne.