IVAKASALA INA VUVALE | SUSU GONE
Ka Era Vakila na Gone ni Yaco na Veisere
Era kaya eso na isa ni vakawati e sega ni vinaka nodra bula vakawati, ni vinaka na veisere me rawa ni yaga vei ira na gone. Vakacava e tiko na kena ivakadinadina?
Cava era na vakila na gone ni yaco na veisere?
E laurai ena dua na vakadidike ni vakavu rarawa vei ira na gone na veisere. O ira na gone e veisere nodra itubutubu era na rairai:
cudru, lomaocaoca, qai yalolailai
cakava eso na ka mera vakaleqai kina, se so tale
lutu ena ka ni vuli se biu vuli
tautauvimate
Kuria ya, e levu na gone era dau beitaki ira ga ni yaco na veisere. Era nanuma nira vakavuna se rawa nira tarova na veisere.
Na ka dredre era sotava nira se gone, era na rairai vakila tiko ga nira sa uabula. Era na rairai nanuma ni sega na kedra yaga, dredre tale ga mera nuitaki ira eso tale. Era na rawa tale ga ni veisere ke basika na duidui ena nodra bula vakawati.
Nanuma tiko: De dua era na kaya eso ni na vinaka vei ira na gone na veisere. Ia ni laurai na kena ivakadinadina e sega ni dina qori. E vola o Penelope Leach, a e kenadau nodra qaravi na gone: “Na veisere e vakalolomataki ira na gone.”
iVakavuvuli vakaivolatabu: “Kua ni kauaitaka ga na ka e baleti kemuni, ni kauaitaka tale ga na ka e baleti ira tale eso.”Filipai 2:4.
Ena marau o luvequ keu veisere?
Eso era na kaya io. Mo nanuma tiko ni duidui na ka era vinakata na itubutubu kei ira na gone. O koya e veisere, e vinakata me veisau nona ivakarau ni bula. Ia ena vinakata o gone me tiko ga kei rau nona itubutubu.
Ni dikevi oti e vica vata na udolu na veisere, ratou vola na dauvolaivola ni ivola The Unexpected Legacy of Divorce: “E matata na ivakaro qo: era na sega ni kaya na gone nira marau. Ia era na kaya ga vakadodonu, ‘E seavu vakadua noqu marau ena siga rau veisere kina noqu itubutubu.’” E tomana nira vakila na gone ni rerevaki qai sega ni nuitaki na vuravura qo, ni sega ni dei nodrau veiwekani e rua era dau nuitaka.”
Nanuma tiko: Era na sega ni marau na gone nira sa veisere na itubutubu.
iVakavuvuli vakaivolatabu: “Na yalorarawa e vakaotia na igu.”—Vosa Vakaibalebale 17:22.
Ka meu kila ni ratou susugi na gone
Eso era veisere era saga mera susugi ira na gone me vaka ga ni rau se vakawati tiko. Ia e dredre dina mera cakava qori. E laurai ena vakadidike o ira na isa ni vakawati era veisere, ena rairai:
lailai nodra gauna vei ira na gone
duidui na ivakarau ni veivakavulici
vakalaivi ira na gone mera cakava ga na ka era vinakata ena vuku ni cala, se wawale
Na gone e veisere nona itubutubu ena dau talaidredre vei rau. Ni rau sega ni dina na itubutubu ena bubului me rau tiko vata ga. De dua ena kaya o gone ‘Cava meu vakarorogo kina vei rau?’
Nanuma tiko: Dau dredre vei ira na itubutubu era veisere na veisusu duadua. Ena dredre sara qori vei ira na gone.
iVakavuvuli vakaivolatabu: “Kua ni vakacudrui ira na luvemuni, de ra yalolailai kina.”—Kolosa 3:21.
E tiko e dua tale na sala e vinaka cake me wali kina na leqa ni bula vakawati?
Oti na veisere ena cakacaka levu toka me tekivutaki e dua tale na ivakarau ni bula. E kaya na ivola The Case for Marriage: “Levu na veiwatini era sega ni mamarau ra qai tiko vata ga, era dau marau vakalevu ni toso na gauna.” Kena ibalebale, ena vinaka nodra ivakarau na gone ke ra tiko vata ga na itubutubu.
E cala na veisere. Ia e kaya na iVolatabu ni yavu duadua ga ni veisere na veibutakoci. (Maciu 19:9) E kaya tale ga “o koya e yalomatua ena vakasamataka nona ilakolako kece.” (Vosa Vakaibalebale 14:15) O ira kece na veiwatini era vakila tiko na dredre ena nodra bula vakawati, e dodonu mera kauaitaka na vakatulewa kece era cakava. E okati kina na ka era na vakila na gone ni yaco na veisere.
Me kua ni yaco na ituvaki qori ena vinakati kina na vosota. E tu ena iVolatabu na ivakasala yaga ena vukei ira na veiwatini mera bulataka na itovo mera vosota, qai marautaka nodra vakawati. E sega ni kurabuitaki qori, ni o koya e vakavuna na iVolatabu, o Jiova, e tauyavutaka na bula vakawati.—Maciu 19:4-6.
iVakavuvuli vakaivolatabu: “O yau o Jiova na nomu Kalou, o koya e vakavulici iko mo vinaka kina.”—Aisea 48:17.
a Mai na ivola Your Growing Child—From Babyhood Through Adolescence.