Raica sara na lewena

Na Website ni iVakadinadina i Jiova

Digia na Vosa vakaViti

IVAKASALA INA VUVALE

Ni Duidui na Rai

Ni Duidui na Rai

E sega ni ka rawarawa ni duidui na ka drau taleitaka vakaveiwatini, ivakarau, se nomudrau itovo. Ia eso na ka ena rawa ni duidui kina nomudrau rai me vaka qo:

  • Gauna e vakayagataki vei ira na weka

  • Vakabula ilavo

  • Vakaluveni

  • Cava o na cakava ke duidui na rai i watimu me baleta na tikina qori?

 Ka mo kila

Ni tautauvata na ka drau taleitaka, sega ni kena ibalebale ni drau sa tautauvata ena ka kece. Levu na veiwatini ke tautauvata na ka rau taleitaka, ena rawa ni duidui nodrau rai ke okati kina eso na vakatulewa bibi.

“Au susu ena vuvale e veimaliwai vakalevu. Ena muanimacawa, keitou na gadivi ratou na wekai keitou. Qori na ka ratou sega ni matau kina na vuvale i watiqu. E duidui gona neirau rai me baleta na levu ni gauna e vakayagataki vei ira na wekai keirau, se na gauna ni veivosaki ena talevoni.”—Tamara.

“E duidui na sala keirau tuberi kina kei watiqu me baleta na vakayagataki ni ilavo. Na imatai ni vica na vula ni neirau bula vakawati, keirau veiba vakavica me baleta na ilavo. E taura toka e dua na gauna me wali na leqa qori.”—Tyler.

E rawa ni duidui nodrau rai e le rua me baleta na irairai ni vanua. Ena duidui tale ga va qori nodrau rai na veiwatini me baleta e dua na ka rau sega ni duavata kina.

Sega ni wali ni leqa nomu vakuai iko ena dua na ka. Kena ivakaraitaki, vakacava ke tauvimate nona itubutubu o watimu qai vinakati me qaravi? Vakacava ke vinakata o kemu isa na vakaluveni, ia o sega ni duavata kina? *

“Taura toka e dua na gauna neirau veivosakitaka na vakaluveni. Levu na gauna ena vakasamataka tu ga o watiqu, e vakavuna me keirau sega ni duavata kina. Au sega tale ga ni via vakamalumalumu kina.”—Alex.

Sega ni vakatautaki na bula vakawati ena duidui rai. Era kaya eso na kenadau, ke so na veika bibi drau sega ni duavata kina vakaveiwatini mo cakava ga na ka e donu vei iko, ke okati mada ga mo veisere kina. Ia qori e vakaraitaka ni o kauaitaka ga nomu rai, sa sega ni bibi nomu yalayala vua na Kalou ni o na kabiti watimu tiko ga se mani cava e yaco.

 Ka mo cakava

Raica vakabibi nomu bubului ni vakawati. Qori ena vukei kemudrau mo drau cakacaka vata, drau walia tale ga na leqa.

iVakavuvuli Vakaivolatabu: “Na ka sa vauca vata na Kalou me kua ni tawasea na tamata.”—Maciu 19:6.

Cakacakataka rawa. Kena ivakaraitaki, vakacava ke vinakata o kemu isa me vakaluveni, ia o sega ni duavata kina? E vinaka me nanumi toka e vica na tikina qo:

  • E vakacava na qaqaco ni nomudrau bula vakawati?

    Drau rawa ni qarava na itavi ni susu gone?

  • iTavi vakaitubutubu.

    Vakarautaka na kakana, isulu, vale, levu tale ga na ka e okati kina.

  • Bula vakailavo.

    Rawa ni drau veiraurautaka na cakacaka, vuvale kei na so tale na itavi?

iVakavuvuli Vakaivolatabu: “O cei vei kemuni e via tara e dua na valececere ena sega ni dabe mada me cakacakataka na kena isau?”—Luke 14:28.

Dikeva vinaka na ka kece e vauca na vakatulewa qori. Ena rawa ni o walia na duidui drau sega ni duavata kina. Kena ivakaraitaki, ke sega ni duavata o kemu isa ena vakaluveni, e rawa ni vakasamataka na taro va qo:

  • ‘Keu kaya niu sega ni via vakaluveni, kena ibalebale niu sega sara ga ni vinakata, seu sega ga ni vinakata ena gauna qo?

  • ‘Au vakatitiqataka niu na dua na itubutubu vinaka?

  • ‘Au rerevaka ni na sega ni kauaitaki au o watiqu?’

Ena yasana adua, na isa ni vakawati e vinakata me vakaluveni me vakasamataka toka na taro qo:

  • ‘Drau sa tu vakarau mo drau colata na itavi vakaitubutubu?’

  • ‘E veirauti na ilavo mo drau susugi luvemudrau kina?’

iVakavuvuli vakaivolatabu: “Ia na vuku mai cake. . . e yalorawarawa.”—Jemesa 3:17.

Raica na veika vinaka me baleti kemu isa. E rawa ni duidui nodrau rai e le rua me baleta na irairai ni vanua. Ena duidui tale ga va qori nodrau rai na veiwatini me baleta e dua na ka. Kena ivakaraitaki, na sala me vakayagataki kina na ilavo. Ke dua na ka drau sega ni duavata kina, rawa ni drau veivosakitaka e dua na ka drau tautauvata kina.

  • Na isausau cava drau duavata kina?

  • O na doka vakacava nonamudrau dui rai?

  • Me vinaka na bula vakawati, vakacava rawa ni dua vei kemudrau se o kemudrau sara ga mo drau veisautaka nomudrau rai?

iVakavuvuli vakaivolatabu: “Me kua ni dua e qara na ka e yaga ga vua, me qara tale ga na ka e yaga vei ira tale eso.”—1 Korinica 10:24.

^ para. 14 Na veika bibi qori e dodonu me veivosakitaki ni bera na vakamau. Toso na gauna ena rawa ni basika na veika tawanamaki, se veisau na lomana e dua na isa ni vakawati.—Dauvunau 9:11.