Raica sara na lewena

Na Website ni iVakadinadina i Jiova

Digia na Vosa vakaViti

BULA VAKAIDEWADEWA SE BULI?

Vakasavasavataki Koya ga na Kuli ni Tovuto

Vakasavasavataki Koya ga na Kuli ni Tovuto

E dau vakavuleqa vakalevu vei ira na itaukei ni waqa na kakabi ni dio, kei na so tale na manumanu somidi ena dago ni waqa. E dau vakabera na kena toso, kana waiwai vakalevu, oti ga e vica na yabaki sa na vakasa tale e vanua me vakasavasavataki. Era nanuma na saenitisi ni na walia ga na leqa qori na veikabula.

Vakasamataka mada: E laurai ena dua na vakadidike ni rawa ni savata ga na kuli ni yagona e dua na mataqali tovuto na pilot (yacana vakasaenisi na Globicephala melas). E tutubu e yagodra eso na ka e vaka na irairai ni ulunivanua lalai, e vakatokai me nanoridges. Nira sa rui ka lalai, dau dredre kina mera kabita yani na dio. E tiko ena ibulibuli lalai qori e dua na mataqali wai weliwelia e dau vakadredretaka nodra kakabi yani na lumilumi kei na manumanu somidi. Na gauna kece e vakavouya kina na yagona na tovuto qo, ena dau basika mai na wai weliwelia qori.

Era via vakatotomuria gona na saenitisi na nona dau vakasavasavataki koya va qori na tovuto me caka tale ga ena dago ni waqa. E liu e dau vakayagataki tiko e dua na mataqali iboro ni waqa e kaukaua sara na kena iboi. Sa vakatabui na kena dau vakayagataki ni rawa ni vagagai kina na veikabula e waitui. Me wali na leqa qori, era vakayagataka na dauvakadidike e dua na kaukamea e qaraqara tu me vakadrodroi kina e dua na mataqali wainimate, ni tara ga na waitui ena vuki me wai weliwelia vavaku qai robota na dago ni waqa kece. E rauta ni 0.7 na milimita na kena vavaku, ena qai takuli vata kei ira na manumanu somidi era kabita yani na dago ni waqa. Oti qori ena drodro tale mai e dua na iwasewase ni wai weliwelia me robota na dago ni waqa.

Era dau vakadredretaka na toso ni waqa na dio, dredre tale ga me vakasavasavataki

Ni vakadikevi na iwalewale qo e laurai ni rawa ni vakalailaitaka vakaduanadrau na kena dau kakabi na manumanu lailai, kei na veika bula tale eso ena dago ni waqa. Ena yaga vakalevu vei ira na kabani ni waqa ni dau saulevu na kena vakasa e vanua me vakasavasavataki.

Cava o nanuma? E bula vakaidewadewa na nona rawa ni vakasavasavataki koya ga na kuli ni tovuto?