Raica sara na lewena

Ena Yaga Vakacava na iVolatabu Nira Lomaocaoca na Tagane?

Ena Yaga Vakacava na iVolatabu Nira Lomaocaoca na Tagane?

Ni dua e lomaocaoca o na rairai nanuma ni rere vakalevu, * e sega ni cakava rawa e dua na ka, qai wewenigusuna tu ga na ka e lomaleqataka.

Qori na ka era cakava eso ena gauna era lomaocaoca kina. Ia era kaya na dauvakadidike ni duatani na ka era cakava na tagane nira lomaocaoca. Kena ivakaraitaki, e kaya e dua na ripote, “e levu vei ira era na gunu alakaolo, se vakayagataka na wainimate gaga nira lomaocaoca. De dua eda nanuma nira sa gunu tiko vakasivia, ia eda sega ni kila nira lomaocaoca tiko. Ra qai vakaraitaka qori nira cudrucudru.”

Macala ga ni duidui na sala era vakaraitaka kina na tagane nodra lomaocaoca. Ia e levu era vakila na leqa e vu mai ena lomaocaoca ena “iotioti ni veisiga qo e vakilai kina e levu na ka dredre.” (2 Timoci 3:1) Ia ena vukei iko vakacava na iVolatabu ke o dau lomaocaoca?

iVakasala Yaga ena iVolatabu me Baleta na Lomaocaoca

E tu ena iVolatabu na ivakasala nuitaki ena vukei keda nida lomaocaoca. Qo e tolu na kena ivakaraitaki.

  1. 1. “Kua vakadua ni lomaocaocataka na siga nimataka, ni siga nimataka e tu vata kei na kena lomaocaoca. Na siga kece sa dui tu ga na kena ca.”—Maciu 6:34.

    Kena ibalebale: E ka vakavuku meda kua ni leqataka vakasivia na ka ena rairai yaco, se na ka ena rairai sega ni yaco ena gauna se bera mai. Levu na gauna e sega ni dau yaco na ka eda leqataka. Ia eso na gauna eda kidacala ga sa vinaka cake na ituvaki.

    Tovolea qo: Vakasamataka lesu na gauna o nanuma kina ni na yaco na ka ca, ia e qai sega ni yaco. Oti dikeva na ka o lomaocaocataka tiko ena gauna qo, qai vakasamataka ena dua na leqa levu sara se sega.

  2. 2. “E vagatara na kaukamea na kaukamea, e vaka kina na tamata ni vagatara na wekana.”—Vosa Vakaibalebale 27:17.

    Kena ibalebale: Ke da ciqoma nodra veivuke eso tale, qori ena vukei keda meda vosota na lomaocaoca. De dua era na tukuna vei keda na ka e vukei ira mera vosota na lomaocaoca. Era na rawa tale ga ni vukei keda meda veisautaka noda ivakarau ni rai.

    Tovolea qo: Vakasamataka e dua ena rawa ni yaga vei iko nona ivakasala. Kena ivakaraitaki, e dua nomu itokani a sotava tale ga na ituvaki va qori, qai tarogi koya eso na ka yaga e muria kei na ka e sega ni cakava.

  3. 3. “Biuta vua na nomuni lomaocaoca kece, ni kauaitaki kemuni o koya.”—1 Pita 5:7.

    Kena ibalebale: Na Kalou e kauaitaki ira vakalevu era rarawa tu. E vinakata meda masu vua, qai talaucaka na ka kece eda lomaleqataka tu.

    Tovolea qo: Vola na ka kece e vakavuna tiko nomu lomaocaoca. Mo masulaka vua na Kalou, vakamacalataka nomu leqa kece, qai kerei koya me vukei iko.

Gauna ena Sega Tale Kina na Lomaocaoca

Levu na ivakasala yaga e tu ena iVolatabu ena vukei keda meda vosota kina na lomaocaoca. E yalataka tale ga ni sa voleka sara na gauna eda na sega ni vakila tale kina na lomaocaoca me vaka eda vakila tiko qo. Ena rawati vakacava qori?

Na Matanitu ni Kalou ena vakaotia na ka kece e vakavuna na lomaocaoca. (Vakatakila 21:4) Ni sa na veiliutaki eda na sega ni nanuma tale tiko na ka e vakavuna noda lomaocaoca nikua. Ena sega tale ga ni vakararawataki keda.—Aisea 65:17.

E vinakata “na Kalou ni vakacegu” meda vakila qori ena gauna se bera mai. (Roma 16:20) E yalataka vei keda: “Au kila vinaka na ka au nanuma tiko me baleti kemuni, . . . na nanuma moni tiko vakacegu, moni kua ni rarawa, meu solia vei kemuni na inuinui kei na ka moni namaka ena gauna se bera mai.”—Jeremaia 29:11.

^ para. 1 Na vosa “lomaocaoca” ena ulutaga qo, e sega ni dusia e dua e tauvimate bibi. Ia e vakaibalebaletaka ga na nona lomaleqa se lomaocaocataka e dua nona bula e veisiga. O ira era tauvimate era rawa ni kerea nodra veivuke na vuniwai.—Luke 5:31.