O Cei se Cava na Vosa ni Kalou?
Kena isau vakaivolatabu
Na “vosa ni Kalou” e dau vakaibalebaletaka na itukutuku vakalou se na veika e vauca na itukutuku qori. (Luke 11:28) E vakayagataki vakalevu ena iVolatabu na icavuti, “Na Vosa ni Kalou” se “na Vosa.”—Vakatakila 19:13; Joni 1:14.
iTukutuku vakalou. Era dau tukuna na parofita ni itukutuku era vakasavuya e vosa ni Kalou. Kena ivakaraitaki, e tekivutaka o Jeremaia na ka e parofisaitaka ni vakayagataka na matavosa “e vosa vei au o Jiova.” (Jeremaia 1:4, 11, 13; 2:1) Ni bera ni vakasavui vei Saula ni digi koya na Kalou me tui, a kaya na parofita o Samuela: “Mo tu vakadua, meu vakarogoya vei iko na vosa ni Kalou.”—1 Samuela 9:27.
Na icavuti. E kune ena iVolatabu na matavosa “na Vosa.” Qori na icavuti e vakatokai kina o Jisu Karisito, ena nona bula vakayalo mai lomalagi kei na nona bula vakatamata e vuravura. Dikeva eso na ivakamacala e tokona na vakasama qori:
E se bula sara na Vosa ni bera nira buli na vo ni kabula. E kaya kina na iVolatabu: “Ena ivakatekivu a bula na Vosa. . . . A tiko vata kei na Kalou o koya qo mai na ivakatekivu.” (Joni 1:1, 2) O Jisu e “ulumatua ni kabuli kece. . . . A bula tale ga ni bera na ka kece tale eso.”—Kolosa 1:13-15, 17.
E mai bula vakatamata i vuravura na Vosa. E kaya na iVolatabu: “E mai tamata na Vosa, e tiko vata kei keda.” (Joni 1:14) ‘E vakadravudravuataki koya o Jisu, e okati koya me vaka na bobula ni mai bula vakatamata.’—Filipai 2:5-7.
E Luve ni Kalou na Vosa. Ni tukuna oti ga na yapositolo o Joni “e mai tamata na Vosa,” e kaya sara: “Eda raica tale ga nona lagilagi, na lagilagi qo e solia o tamana vua na luvena duabau.” (Joni 1:14) E vola tale ga o Joni: “Ni Luve ni Kalou o Jisu.”—1 Joni 4:15.
E tu vua na Vosa na itovo vakalou. “E dua na kalou na Vosa,” se “vakalou.” (Joni 1:1; An American Translation) O Jisu e “vakaraitaka vinaka sara ga na lagilagi ni Kalou, e ucui koya vinaka.”—Iperiu 1:2, 3.
E veiliutaki vakatui na Vosa. E vakamacalataka na iVolatabu ni toka e ulu i koya na Vosa ni Kalou e “levu na ivauniulu vakatui.” (Vakatakila 19:12, 13; vakamacala e ra) E vakatokai tale ga na Vosa me “nodra Tui na tui, nodra Turaga na turaga.” (Vakatakila 19:16) E kilai tale ga o Jisu me “nodra Tui o ira na veiliutaki vakatui, e nodra Turaga tale ga o ira na veiliutaki vakaturaga.”—1 Timoci 6:14, 15.
E matanivanua ni Kalou na Vosa. Na icavuti “na Vosa” e dusi koya e vakayagataka na Kalou me vakadewataka nona itukutuku se nona ivakaro. A cakava o Jisu nona itavi, ni a kaya: “O Tamaqu e talai au mai e vakaroti au ena ka meu tukuna kei na ka meu vakavulica. . . . O koya gona, au tukuna ga na veika e tukuna vei au o Tamaqu.”—Joni 12:49, 50.
Rawa ni o Wilika Tale ga
VAKAMACALATAKI NA TIKINIVOLATABU
iVakamacala ni Joni 1:1—“Ena iVakatekivu a Bula na Vosa”
E vakamacalataka na tikinivolatabu qo na veika me baleti Jisu ni bera ni mai bula e vuravura.
IVAKAVUVULI YAGA VAKAIVOLATABU
E Kalou o Jisu Karisito?
O Jisu Karisito ga na Kalou Kaukaua Duadua? Se rau duidui?
SAUMI NA TARO VAKAIVOLATABU
Cava e Vakatokai Kina o Jisu me Luve ni Kalou?
Ke sega ni susugi Jisu na Kalou me vaka ga e cakava e dua na tama ni susugi luvena, ia e rawa vakacava me Luve ni Kalou?
ESSENTIAL BIBLE TEACHINGS
E Tiko na Yaca ni Kalou?
E levu na kena icavuti na Kalou me vaka, o koya e Kaukaua Duadua, Dauveibuli, kei na Turaga. Ia e volai na yaca ni Kalou ena sivia ni 7,000 na vanua ena iVolatabu.
SAUMI NA TARO VAKAIVOLATABU
O Cei o Jiova?
E nodra Kalou beka ga e dua na matatamata, me vakataki ira na Isireli?
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.