Raica sara na lewena

Na Website ni iVakadinadina i Jiova

Digia na Vosa vakaViti

Eda na Raica e Dua na ka Nida Voleka ni Mate?

Eda na Raica e Dua na ka Nida Voleka ni Mate?

Kena iSau Vakaivolatabu

Era kaya e levu ni gauna era voleka ni mate kina sa lako na yalodra ina dua tale na vanua se ra raica e dua na rarama se dua na vanua totoka. E kaya na ivola Recollections of Death ni ‘so era raica qori me ka dokai nira veisau ina dua tale na ka.’ E sega ni tukuni ena iVolatabu na ka ena yaco nida voleka ni mate, e vakamacalataka ga na ka e yaco dina nida sa mate.

Era sega ni vakila e dua na ka na mate.

E kaya na iVolatabu ni o ira na mate “era sega sara ga ni kila e dua na ka.” (Dauvunau 9:5) Nida mate eda sega ni lai bula tale ina dua na vanua se meda vakasama tale tiko, eda na yali ga vakalekaleka. E sega ni yavutaki ena iVolatabu na ivakavuvuli ni na bula tale tiko e dua na ka nida sa mate. (Isikeli 18:4) E sega ni kena ibalebale gona nida na lako i lomalagi, eli, se bula tale tiko e dua na ka.

Cava e kaya o Lasarusa ni vakaturi mai?

Na italanoa vakaivolatabu me baleti Lasarusa e vakamacalataka vakavinaka na keda ituvaki nida mate: A vakaturi koya o Jisu ni sa mate tu me va na siga. (Joni 11:38-​44) Ke a lai bula tale tiko ena dua na vanua o Lasarusa ena gauna e mate kina, ena ka vakalialia me na vakabulai koya tale o Jisu. Ia e sega ni tukuna na iVolatabu ni lai bula tale tiko o Lasarusa ina dua na vanua. Ke mani yaco mada ga vei Lasarusa, ena talanoataka sara ga na ka e yaco. A vakamacalataka o Jisu ni mate i Lasarusa e vaka ga e moce. Kena ibalebale ni sega ni vakila o koya e dua na ka ena gauna e mate kina.​—Joni 11:11-​14.