Raica sara na lewena

E Tiko e “Vitu na iValavala ca Bibi”?

E Tiko e “Vitu na iValavala ca Bibi”?

Kena isau vakaivolatabu

E sega ni vakamatatataka na iVolatabu ni tiko e “vitu na ivalavala ca bibi.” Ia e kaya na iVolatabu ni na sega vakabulai o koya e cakava tiko na ivalavala ca bibi. Kena ivakaraitaki, e vakaibalebaletaka na iVolatabu ni ivalavala ca bibi na veiyacovi tawadodonu, qaravi matakau, qaravi tevoro, cudru, kei na daumateni. Qori na “vua ni itovo vakayago. E tomana “o ira na cakava na ka kece qo era na sega ni rawata na Matanitu ni Kalou.”​—Kalatia 5:​19-​21. *

Vakacava e cavuti ena iVolatabu e ‘vitu na ka e vakasisila vua na Turaga?

Io. E kaya na Vosa Vakaibalebale 6:​16 ni King James Version: “E ono na ka e cata na Turaga: io, e vitu e vakasisila vua.” Ia e sega ni okati kece kina na ivalavala ca e cavuti ena Vosa Vakaibalebale 6:​17-​19. E vakamacalataka ga eso na ka me vaka na kena vakasamataki, vosataki, kei na kena vakayacori lai vakavuna na ivalavala ca. *

Na cava e vakaibalebaletaka na “ivalavala ca bibi”?

Era vakadewataka eso na daunivakadewa na vosa qori ena 1 Joni 5:​16. Kena ivakaraitaki, e kaya The New American Bible: “E tiko na ivalavala ca bibi.” E rawa tale ga ni vakadewataki na “ivalavala ca bibi me “ivalavala ca e vakavuna na mate.” Na cava na kedrau duidui na “ivalavala ca e vakavuna na mate” kei na “ivalavala ca e sega ni vakavuna na mate”?​—1 Joni 5:​16.

E vakamatatataka na iVolatabu ni ivalavala ca kece e tini ina mate. Ia na yavu ni isoro i Jisu Karisito eda vakabulai kina ena ivalavala ca kei na mate. (Roma 5:​12; 6:​23) E sega ni bokoci ena isoro i Karisito na “ivalavala ca e vakavuna na mate.” O koya e cakava na ivalavala ca qori e nakita dei me cakava tiko ga, ena sega ni veisautaka na ivakarau ni nona rai se nona itovo. E vakatoka qori na iVolatabu me ivalavala ca ena “sega ni vosoti.”​—Maciu 12:31; Luke 12:10.

^ para. 1 E laurai ena Kalatia 5:​19-​21 e 15 na ivakaraitaki ni ivalavala ca bibi, ia e sega ni tukuni kece sara. E tukuni ena tikina e tarava na “veika va ya.” Kena ibalebale na yalomatua ena uqeti keda meda kila rawa na “veika va ya” e sega ni cavuti tiko ena tikina qori.

^ para. 2 E vakabibitaki ena Vosa Vakaibalebale 6:​16 na ivosavosa vakaIperiu ni vakaduiduitaki na ikarua ni naba kei na kena imatai. E basika vakalevu ena iVolatabu na ivosavosa va qori.​—Jope 5:​19; Vosa Vakaibalebale 30:15, 18, 21.