Raica sara na lewena

Na Website ni iVakadinadina i Jiova

Digia na Vosa vakaViti

Cava e Kaya na iVolatabu me Baleta na Goneyalewa o Meri?

Cava e Kaya na iVolatabu me Baleta na Goneyalewa o Meri?

 Kena isau vakaivolatabu

E kaya na iVolatabu ni ka dokai dina nona lesi o Meri me vakasucumi Jisu ni se bera vakadua ni veiyacovi. A parofisaitaki qori ena ivola i Aisea qai volatukutukutaki na kena vakayacori ena Kosipeli i Maciu kei Luke.

A parofisaitaka o Aisea me baleta nona sucu na Mesaia: “Raica! Ena bukete e dua na goneyalewa, ena vakasucuma e dua na gonetagane.” (Aisea 7:​14) E uqeti vakalou na dauvola Kosipeli o Maciu me vakaibalebaletaka na parofisai i Aisea ena nona vakasucu o Meri. Oti na nona volatukutukutaka o Maciu nona bukete vakacakamana o Meri, e vola: “E yaco kece na ka qo me vakayacori kina na vosa e tukuna o Jiova vua na nona parofita ni kaya: “Raica! Ena bukete e dua na goneyalewa, * ena vakasucuma tale ga e dua na gonetagane, era na qai vakayacani koya me o Imanueli,” e kena ibalebale, ‘Sa Tiko Vata kei Keda na Kalou.’”​—Maciu 1:​22, 23.

E vola tale ga na dauvola Kosipeli o Luke nona bukete vakacakamana o Meri. E volatukutukutaka ni tala na Kalou na agilosi o Keperieli “vua e dua na goneyalewa sa musuki tu me wati Josefa ena vuvale i Tevita, e yaca ni goneyalewa o Meri.” (Luke 1:​26, 27) A vakadeitaka mada ga o Meri ni se sega ni veiyacovi. Qori ni oti nona rogoca ni na vakarau vakasucuma na Mesaia o Jisu, e taroga sara: “Ena yaco vakacava qori niu se sega ni veiyacovi kei na dua na tagane?”​—Luke 1:​34.

 E vakasucu vakacava e dua se sega ni veiyacovi?

E bukete o Meri ni vakayagataka na Kalou na nona kaukaua vuni na yalotabu. (Maciu 1:​18) E tukuni vei Meri: “Ena sobuti iko na yalo tabu, ena vakaruguti iko na kaukaua i koya e Cecere Duadua. Oya na vuna ena vakatokai kina o koya o na vakasucuma me yalosavasava, na Luve ni Kalou.” * (Luke 1:​35) E tokitaka vakacakamana na Kalou na bula i luvena ina katonigone i Meri me rawa kina ni vakasucuma na gone.

 Cava na inaki ni nona vakasucu?

Me vakarautaka kina na Kalou na yago uasivi i Jisu me vakabula na kawatamata mai na ivalavala ca kei na mate. (Joni 3:​16; Iperiu 10:5) E tokitaka na Kalou na bula i Jisu ina katonigone i Meri. E taqomaki Jisu mai na ivalavala ca na yalo tabu ni Kalou ni se kunekunetaki tiko ena katonigone i Meri.​—Luke 1:​35.

E yaga vakacava qori? E uasivi o Jisu ni sucu, qai tautauvata vinaka kei Atama ni se bera nona talaidredre. E kaya na iVolatabu me baleti Jisu: “E sega ni valavala ca.” (1 Pita 2:​22) Ni uasivi o Jisu, e rawa kina vua me sereki keda mai na ivalavala ca kei na mate.​—1 Korinica 15:21, 22; 1 Timoci 2:​5, 6.

 A sega ni veiyacovi o Meri ena nona bula taucoko?

E sega ni kaya na iVolatabu ni sega ni veiyacovi o Meri ena nona bula taucoko, e vakaraitaka ga ni qai vica tale na luvena.​—Maciu 12:46; Marika 6:3; Luke 2:7; Joni 7:5.

E kaya na iVolatabu ni ratou le vica toka na taci i Jisu

 E vakaibalebaletaki na sucu i Jisu na “Kunekunetaki ena Yalosavasava”?

Sega. E vakamacalataka na New Catholic Encyclopedia, ni ivakavuvuli ni Kunekunetaki ena Yalosavasava, “e vakaibalebaletaki ena vakabauta ni nona sega ni sucu IVALAVALA CA na Goneyalewa o Meri mai na ivakatekivu ni nona bula qori nona se kunekunetaki tiko. Era sucu ivalavala ca na vo ni kawatamata . . . Ia e sega ni sucukaya mai na ivalavala ca o Meri.” *

E sega ni tukuni ena iVolatabu ni uasivi o Meri. (Same 51:5; Roma 5:​12) A vakadinata mada ga o Meri na nona valavala ca ni lai cabora na isoro era vakaroti kina na tina ena lawa i Mosese mera dau cabora. (Vunau ni Soro 12:​2-8; Luke 2:​21-​24) E kaya na New Catholic Encyclopedia: “Na ivakavuvuli ni Kunekunetaki ena Yalosavasava e sega ni vakavuvulitaki ena iVolatabu . . . [Qori] e ivakavuvuli ga ni lotu.”

 Na rai cava me tiko vei keda me baleti Meri?

E ivakaraitaki vinaka o Meri ni vakabauta, talairawarawa, yalomalumalumu, qai veiwekani voleka kei na Kalou. E dua tale ga vei ira na tamata yalodina e bibi meda vakatotomuria na nona ivakaraitaki.​—Iperiu 6:​12.

O Meri na tinai Jisu ia e sega ni vakavulica na iVolatabu meda sokaloutaki koya se meda masu vua. A sega ni vakaraitaka o Jisu ni dodonu me dua na ivakarau me rokovi kina o tinana, e sega tale ga ni vakavulica qori vei ira na nona imuri. E volai na yaca i Meri ena va na Kosipeli qai volai vakadua ena ivola na Cakacaka, e sega ni qai cavuti tale na yaca i Meri ena vo ni 22 na ivola ena Veiyalayalati Vou.​—Cakacaka 1:​14.

E sega ni dua na ivakadinadina ena iVolatabu ni vakarokorokotaki o Meri, se me sokaloutaki vei ira na lotu vaKarisito ena imatai ni senitiuri. E vakavuvulitaka ga na iVolatabu ni dodonu me sokaloutaki ga na Kalou.​—Maciu 4:​10.

^ para. 10 Na vosa vakaIperiu e vakaibalebaletaki me “goneyalewa” ena parofisai i Aisea, e cavuti me ʽal·mahʹ. E rawa ni dusia e dua na goneyalewa sa veiyacovi oti se sega. Ia e uqeti vakalou o Maciu me vakayagataka na vosa vaKirisi par·theʹnos me vakamatatataka ni dua e se bera ni veiyacovi.

^ para. 13 Era sega ni duavata eso ni vakayagataki na yaca “Luve ni Kalou,” qori ena nanumi kina ni veiyacovi na Kalou kei na yalewa. E sega ni vakavuvulitaka qori na iVolatabu, ia e kaya ga ni o Jisu na “Luve ni Kalou,” kei na “ulumatua ni kabuli kece” baleta ni a vakaitavi duadua sara ga na Kalou ena nona buli. (Kolosa 1:​13-​15) E vakatokai tale ga na imatai ni tamata o Atama ena iVolatabu me “luve ni Kalou” baleta ni buli koya na Kalou. (Luke 3:38).

^ para. 20 Second Edition, Volume 7, tabana e 331.