Raica sara na lewena

Na Website ni iVakadinadina i Jiova

Digia na Vosa vakaViti

Vakacava Eda Rawa ni Vorata na Tevoro?

Vakacava Eda Rawa ni Vorata na Tevoro?

Kena isau vakaivolatabu

E veivakamuai tiko vakalevu nikua na Tevoro kei ira na timoni. Sa rauta me kaya na iVolatabu: “A sa koto ga vua na vu-ni-ca ko ira kecega na kai vuravura.” (1 Joni 5:​19, Ai Volatabu) E vakamacalataki ena iVolatabu na sala e dau veivakamuai kina na Tevoro.

  • Lawaki. E uqeti ira na lotu vaKarisito na iVolatabu mera “vorata nai lawaki ni tevoro.” (Efeso 6:​11, VM ) E dau lawakitaki ira na tamata na Tevoro mera vakabauta nira dauveiqaravi ni Kalou na nona italai.​—2 Korinica 11:13-​15.

  • Vakatevoro. E veivakacalai na Tevoro ena nona vakayagataki ira na dauvakacuru, o ira era dau tukuna na ka e se bera ni yaco, kei ira na daurairai. (Vakarua 18:10-​12) E rawa nira veivakamuai tale ga na timoni ena wainimate gaga, vakasesei ni vakasama (hypnotism), kei na so na iwalewale ni vakasama vakatitobu e nanumi ni na vakacegui kina e dua.​—Luke 11:24-​26.

  • Lotu lasu. E veivakacalai na ivakavuvuli ni lotu lasu, qai beci kina na Kalou. (1 Korinica 10:20) E vakatokai ena iVolatabu na ivakavuvuli lasu va qori me nodra “ivakavuvuli na timoni.”​—1 Timoci 4:1.

  • Curumi timoni. E volai tu ena iVolatabu eso na ivakaraitaki ni nodra veivakalolomataki na timoni. Na kaukaua ni nodra curumi timoni eso, era mataboko, galu, se mavoa sara ga kina.​—Maciu 12:22; Marika 5:​2-5.

Sala mo vorata kina na Tevoro

E sega ni dodonu mo rerevaki ira na timoni, ni vakaraitaka na iVolatabu na sala mo vorata kina na Tevoro:

  • E rawa ni kilai na iwalewale e dau vakayagataka na Tevoro nida “sega ni lecava na nona ilawaki.”​—2 Korinica 2:​11.

  • Vulica na iVolatabu, qai bulataka na ka o vulica. O na vorata na Tevoro ke o bulataka na ivakavuvuli ena iVolatabu.​—Efeso 6:​11-​18.

  • Vakarusa na ka kece era veivakamuai kina na timoni. (Cakacaka 19:19) E okati e keri na ivakatagi, ivola, mekesini, itaba, kei na vidio e uqeta na vakatevoro.