Raica sara na lewena

Na Website ni iVakadinadina i Jiova

Digia na Vosa vakaViti

Na Cava e Kaya na iVolatabu me Baleta na Sasauni kei na Uku?

Na Cava e Kaya na iVolatabu me Baleta na Sasauni kei na Uku?

Kena isau vakaivolatabu

E sega ni vakamacalataka vakamatailalai na iVolatabu na ulutaga qo. E sega tale ga ni vakacala na sasauni kei na uku se so tale na ka eda cakava meda rairai vinaka kina. Ia meda kua ni kauaitaka vakalevu na irairai ni veiuqeti ga na iVolatabu ena “isulu e sega ni rusa rawa, oya na yalomalumalumu kei na yalomalua.”​—1 Pita 3:​3, 4.

E sega ni tabu na tokari ni iukuuku

  • Era dau sauni ira na yalewa era cavuti ena iVolatabu. A dara o Repeka na sauniucu koula, qatoniliga koula, kei na so tale na iukuuku saulevu a lolomataka vua o Eparama ni bera nodrau vakawati kei Aisake. (Vakatekivu 24:22, 30, 53) E vakadonuya tale ga o Esiteri me “sauni,” me vakarautaki koya ena itavi vakaranadi ena matanitu o Perisia. (Esiteri 2:​7, 9, 12) E okati e keri na vakayagataki ni “iyaya ni sasauni” se “na veimataqali iukuuku.”​—New International Version; Easy-to-Read Version.

  • Cavuti na iukuuku ena so na vosa vakatautauvata totoka ena iVolatabu. Kena ivakaraitaki, na daunivakasala vinaka e vaka na “saunidaliga koula . . . vua na daliga rogo.” (Vosa Vakaibalebale 25:12) E vakatauvatana tale ga na Kalou na ka e dau cakava ina matanitu o Isireli ina nona ukutaki watina na tagane vakawati ena qatoniliga, itaube, kei na sau. E “matavinaka sara” na matanitu o Isireli ni sauni vinaka.​—Isikeli 16:11-​13.

Rai cala me baleta na sasauni kei na uku

Rai cala: E vakacala na iVolatabu ena 1 Pita 3:3 “na tali drauniulu, na vakaiukuuku koula.”

Ka dina: Ni laurai na ikotokoto, e vakabibitaka na tikinivolatabu qori ni talei sara mai na irairai totoka kei na iukuuku na ivakarau ni lomada. (1 Pita 3:​3-6) E vakadinadinataki qori ena so tale na tikinivolatabu.​—1 Samuela 16:7; Vosa Vakaibalebale 11:22; 31:30; 1 Timoci 2:​9, 10.

Rai cala: A vakayagataka na ranadi ca o Jesepeli na “iboro” se “iboronimata,” e cala gona meda sauni keda.​—2 Tui 9:​30, ivakamacala e ra.

Ka dina: A lewai o Jesepeli ena vuku ni nona ivakarau ca me vaka na daurairai kei na laba, a sega ni lewai ena kena irairai.​—2 Tui 9:​7, 22, 36, 37.