Raica sara na lewena

Na Website ni iVakadinadina i Jiova

Digia na Vosa vakaViti

E Duavata na Ka Vakasaenisi kei na iVolatabu?

E Duavata na Ka Vakasaenisi kei na iVolatabu?

Kena iSau Vakaivolatabu

Io. E sega ni ivola vakasaenisi na iVolatabu, ia e donu ni vakamacala ena ka vakasaenisi. Raica mada eso na ivakaraitaki ni kena duavata na ka vakasaenisi kei na iVolatabu, e donu tale ga na ka e vakamacalataka ni vakatauvatani kei na ka era vakabauta e levu ena gauna e volai kina.

  • E buli na lomalagi kei na vuravura. (Vakatekivu 1:1) Levu na itukuni makawa era vakamacalataka ni sega ni buli na lomalagi kei na vuravura, e basika ga vakacalaka. Era vakabauta mai Papiloni ni rau lako mai na rua na wasawasa na kalou rau bulia na lomalagi kei na vuravura. E cavuti ena so tale na itukuni ni vu mai na dua na yaloka vakaitamera na lomalagi kei na vuravura.

  • Na ka era veitosoyaki ena maliwalala e tiko na kena lawa, e sega ni lewai ira na kalou. (Jope 38:33; Jeremaia 33:25) E vakamacalataki ena itukuni mai na veiyasa i vuravura nida malumalumu na tamata nira cudru na kalou.

  • E ciri wale tu na vuravura ena maliwalala. (Jope 26:7) Era vakabauta e levu ena gauna makawa ni rabaraba na vuravura qai tabea tiko e dua na tuawa se manumanu me vaka na bulumakau kila, se vonu.

  • E drodro ina uciwai lelevu se uciwai lalai na wai e cawa mai wasawasa kei na so tale na ivurevure ni wai qai tau tale i vuravura me uca, ucacevata, se ucaqereqere. (Jope 36:27, 28; Dauvunau 1:7; Aisea 55:10; Emosi 9:6) Era vakabauta mai Kirisi makawa ni lako mai wasawasa e botoniqele na wai ni uciwai, e vakabauti na vakasama qori me yacova na ika18 ni senitiuri.

  • E dau tubu qai lutu na veiulunivanua. Na veiulunivanua era tu nikua era basika mai wasawasa. (Same 104:​6, 8) Ia e vakamacalataki ena vica na itukuni nira bulia na kalou na veiulunivanua me vaka na kedra ibulibuli eda raica ena gauna qo.

  • Na bula savasava e taqomaka na bula. E vakarota na Lawa e soli vei ira na Isireli mera dau vuluvulu nira tara na yago mate, mera korotinitaki na tauvi matedewa, mera buluta tale ga nodra valelailai. (Vunau ni Soro 11:28; 13:​1-5; Vakarua 23:13) Qo e veicalati kei na wainimate e dau vakayagataka mai Ijipita me boro kina na mavoa, oya me wakivata kei na valelailai ni tamata.

E donu na ka vakasaenisi ena iVolatabu?

Ni dikevi vinaka na iVolatabu, e kena isau na io. Wilika eso na rai cala me baleta na ka vakasaenisi ena iVolatabu:

Lasu: E kaya na iVolatabu ni buli na lomalagi kei na vuravura ena loma ni 24 na aua ena 6 na siga.

Kena dina: E tukuni ena iVolatabu ni se bulia makawa na Kalou na lomalagi kei na vuravura. (Vakatekivu 1:1) Na gauna tale ga ni bulibuli e vakamacalataki ena Vakatekivu wase 1 e yaco tiko ena loma ni dua na gauna, e sega ni tukuni na kena balavu. Na gauna taucoko e buli kina na vuravura kei na lomalagi e tukuni tale ga me dua na “siga.”​—Vakatekivu 2:4.

Lasu: E tukuni ena iVolatabu ni buli e liu na co qai muri na matanisiga, ni vinakati na kena rarama me bula kina.​—Vakatekivu 1:​11, 16.

Kena dina: E tukuna na iVolatabu ni buli e liu na matanisiga, e dua na kalokalo e wili ena “lomalagi,” qai muri na co. (Vakatekivu 1:1) E cila na rarama malumu ni matanisiga e dela i vuravura ena imatai ni “siga,” se loma ni gauna ni bulibuli. Ni sa savasava na maliwalala ena ikatolu ni “siga” ni bulibuli, sa kaukaua na rarama me bula kina na co. (Vakatekivu 1:​3-5, 12, 13) Toso na gauna sa qai laurai levu ena dela i vuravura na matanisiga.​—Vakatekivu 1:​16.

Lasu: E tukuni ena iVolatabu ni cowiri wavokita na vuravura na matanisiga.

Kena dina: E tukuni ena Dauvunau 1:5: “E cabe na matanisiga, e dromu na matanisiga, e vakusakusa lesu ina vanua me cabe tale kina.” E dusia na tikinivolatabu qori na cowiri ni matanisiga me vaka e laurai mai vuravura. Nikua mada ga e dau cavuti na “icabecabe ni siga” kei na “idromudromu ni siga,” se macala tiko ga ni cowiri wavokita na matanisiga na vuravura.

Lasu: E tukuni ena iVolatabu ni rabaraba na vuravura.

Kena dina: E volai ena iVolatabu na matavosa “na iyalayala kei vuravura” me dusia na veivanua yawa sara kei vuravura; sega ni kena ibalebale qori ni rabaraba na vuravura. (Lu 11:31) Na matavosa tale ga na “tutu i vuravura vava” e ivosavosa wale ga me dusia na dela i vuravura taucoko; nikua sa vakayagataki na matanikabasi.​—Aisea 11:12; Luke 13:29.