Raica sara na lewena

O na Rawa Vakacava ni Veitokani kei na Kalou?

O na Rawa Vakacava ni Veitokani kei na Kalou?

Kena isau vakaivolatabu

O na rawa ni veivolekati kei na Kalou ni o vulica na veika me baleti koya, kei na sala mo vakamarautaki koya kina. Ena “qai toro voleka mai” vei iko koya. (Jemesa 4:8) Ni kaya na iVolatabu “ni sega ni yawa o koya vei keda yadua.”—Cakacaka 17:27.

 Ka mo cakava mo kilai koya kina na Kalou

Wilika na iVolatabu

  • Ka e kaya na iVolatabu: “E vakavuna na Kalou na iVolatabu kece.”—2 Timoci 3:16.

  • Kena ibalebale: E vakavuna na Kalou na iVolatabu. E uqeti ira na dauvola iVolatabu mera vola na nona rai. E vakayagataka na iVolatabu meda kila kina na ka e vinakata vei keda. Eda rawa tale ga ni vulica kina na nona itovo, me vaka na loloma, lewadodonu, kei na yalovinaka.—Lako Yani 34:6; Vakarua 32:4.

  • Ka o rawa ni cakava: Wilika e veisiga na iVolatabu. (Josua 1:8) Dau vakasamataka vakatitobu na ka o wilika, qai taroga: ‘Na cava au vulica eke me baleta na Kalou?’—Same 77:12.

    Kena ivakaraitaki, wilika na Jeremaia 29:11, qai taroga: ‘Na cava e vinakata vei au na Kalou? Meu vakila na vakacegu se meu sotava na leqa? E Kalou dau sauma na ca, se e vinakata meu marautaka na veigauna se bera mai?’

Dikeva na veika buli

  • Ka e kaya na iVolatabu: “Tekivu mai na gauna a buli kina na vuravura e kilai na veika tawarairai me baleti koya [na Kalou]. . .ena veika e buli.”—Roma 1:20.

  • Kena ibalebale: Me vaka ga na noda rawa ni vulica na veika me baleta e dua na daudroini ena ka e droinitaka, se e dua na misini vereverea vei koya e bulia, eda na rawa tale ga ni kila na itovo ni Kalou ena veika e bulia. Me kena ivakaraitaki, eda na rawa ni kila na vuku ni Kalou nida vulica na levu ni ka e rawa ni katona na noda mona kei na kena vereverea. Se eda na kila na nona kaukaua nida vulica na veirauti ni katakata ni matanisiga, kei na so tale na kalokalo.—Same 104:24; Aisea 40:26.

  • Ka o rawa ni cakava: Dau vakayagataka na gauna mo dikeva qai vulica kina na veika buli. Ni o cakava qori, mo taroga, ‘Na cava au vulica me baleta na Kalou ena nona ibulibuli vakasakiti qo?’ * Ia eda na sega ni vulica na veika kece me baleta na Kalou ena veika e bulia, ya na vuna e vakarautaka tale ga kina na iVolatabu.

Vakayagataka na yaca ni Kalou

  • Ka e kaya na iVolatabu: “Au na taqomaki koya ni kila na yacaqu. Ena kacivi au, au na qai rogo yani vua.”—Same 91:14, 15.

  • Kena ibalebale: Na Kalou na yacana o Jiova, e dau rogoci ira na kila qai doka na yacana. * (Same 83:18; Malakai 3:16) O Jiova e vakatakilai koya vei keda ni vinakata meda vakayagataka na yacana. E kaya, “O yau o Jiova. Qori na yacaqu.”—Aisea 42:8.

  • Ka o rawa ni cakava: Dau vakayagataka na yacana.

Vosa vei Jiova ena masu

  • Ka e kaya na iVolatabu: “E voleka o Jiova vei ira kece na kacivi koya.”—Same 145:18.

  • Kena ibalebale: O Jiova e voleka vei ira na masu vua ena vakabauta. Na masu e tiki ni sokalou, e vakaraitaka nida doka vakalevu na Kalou.

  • Ka o rawa ni cakava: Dau masu wasoma vua na Kalou. (1 Cesalonaika 5:17) Talaucaka vua na lomamu kei na veika o leqataka.—Same 62:8. *

Vaqaqacotaka na nomu vakabauta na Kalou

  • Ka e kaya na iVolatabu: “Ke sega na vakabauta eda na sega ni vakamarautaka rawa na Kalou.”—Iperiu 11:6.

  • Kena ibalebale: Eda na rawa ga ni vakabauta na Kalou ke da vakabauti koya. E kaya na iVolatabu, ni levu tale na ka e okati ena noda vakabauta mai na noda kila wale tu ga ni bula dina tiko na Kalou. E kena ibalebale tale ga meda nuitaki koya vakaoti, wili kina na ka e yalataka kei na nona ivakatagedegede. E bibi na veinuitaki me dei kina na veitokani.

  • Ka o rawa ni cakava: E bibi na kila me rawa ni dei na vakabauta. (Roma 10:17) Ni o vulica na iVolatabu, mo vakadeitaka ni o nuitaka na Kalou kei na nona ivakasala. Era na marau na iVakadinadina i Jiova mera vakavulici iko ena iVolatabu. *

Cakava na ka e vakamarautaka na Kalou

  • Ka e kaya na iVolatabu: “Qo na ibalebale ni noda lomana na Kalou, meda muria na nona ivunau.”—1 Joni 5:3.

  • Kena ibalebale: O Jiova e volekati ira na vakaraitaka na nodra lomani koya nira saga ena nodra vinaka kece mera muria na nona ivakaro.

  • Ka o rawa ni cakava: Ni o vulica tiko na iVolatabu, saga mo kila na ka e vinakata na Kalou kei na veika e cata. Mo taroga, ‘Na veiveisau cava au rawa ni cakava meu vakamarautaka kina na Kalou?’—1 Cesalonaika 4:1.

Vakila na loloma ni Kalou ni o muria na ka e tukuna

  • Ka e kaya na iVolatabu: “O na raica na vinaka ni Kalou ena ka o sotava.”—Same 34:8, The Bible in Basic English.

  • Kena ibalebale: E vinakata na Kalou mo vakila sara ga na nona vinaka. Ni o vakila na nona loloma kei na nona veitokoni, o na via volekati koya sara ga.

  • Ka o rawa ni cakava: Ni o wilika na iVolatabu, muria na ka e tukuna mo qai vakila na kena yaga ena nomu bula. (Aisea 48:17, 18) Mo dau vakasamataka tale ga nodra ivakaraitaki na tamata ni Kalou ena gauna qo ni tokoni ira na Kalou era vosota kina na dredre, era veisautaka na nodra itovo, mamarau na nodra lewenivuvale, ra qai vakila na marau dina. *

 Rai cala me baleta na nona kilai na Kalou

Rai cala: E sega ni rawa ni volekati keda mai na Kalou ni sa rui kaukaua qai cecere.

Kena dina: E kaukaua na Kalou qai cecere sara vei keda, ia e vinakata meda toro voleka yani vua. E tu ena iVolatabu na kedra italanoa na tagane kei na yalewa era veitokani kei na Kalou.—Cakacaka 13:22; Jemesa 2:23.

Rai cala: Sa rui dredre na noda kila na Kalou.

Kena dina: E dredre meda kila eso na ka me baleta na Kalou, kena ivakaraitaki ni o koya e dua na kabula vakayalo tawarairai. Ia eda se rawa tiko ga ni kilai koya. E tukuna mada ga na iVolatabu nida na rawata na bula tawamudu ke da kila na Kalou. (Joni 17:3) E vakamatatataka na iVolatabu na veika me baleta na Dauveibuli, nona inaki vei keda kei na vuravura, kei na nona ivakatagedegede. (Aisea 45:18, 19; 1 Timoci 2:4) Me vaka eda sa raica mai, e vakaraitaka tale ga na iVolatabu na yaca ni Kalou. (Same 83:18) Kena ibalebale, eda na rawa ni kila na Kalou da toro volekati koya tale ga.—Jemesa 4:8.

^ para. 10 Kena ivakaraitaki, mo kila na vuku ni Kalou ena veika e bulia, raica na ulutaga “Bula Vakaidewadewa se Buli?

^ para. 13 E levu era kila na ibalebale ni yaca ni Kalou ni “O Koya e Vakavuna me Yaco.” Ni vakatakila vei keda na yacana, vaka ga me kaya tiko vei keda: ‘Au na cakava na noqu inaki kei na ka au vinakata.’

^ para. 22 Ke o via kila eso tale na ka, sarava na vidio Na Cava e Caka ena Vuli iVolatabu