Raica sara na lewena

Na Website ni iVakadinadina i Jiova

Digia na Vosa vakaViti

O Cei o Ira na Agilosi?

O Cei o Ira na Agilosi?

Kena iSau Vakaivolatabu

Era kabula kaukaua na agilosi, qai levu cake na ka era rawa ni cakava ni vakatauvatani kei keda. (2 Pita 2:​11) Era vakaitikotiko mai lomalagi, na bula e lomalagi e duatani sara mai na bula e vuravura. (1 Tui 8:​27; Joni 6:​38) E veiganiti kina mera vakatokai na agilosi mera kabula vakayalo.​—1 Tui 22:21; Same 18:10.

Era vu mai vei na agilosi?

Na Kalou a vakayagataki Jisu me buli ira na agilosi, e vakatokai o Jisu ena iVolatabu me “ulumatua ni kabuli kece.” E kaya na iVolatabu me baleta na nona vakayagataki o Jisu ena bulibuli: “E vakaitavi o koya [Jisu] ena buli ni ka kece tale eso mai lomalagi kei vuravura, na ka e laurai kei na ka e sega ni laurai,” wili kina o ira na agilosi. (Kolosa 1:​13-​17) Era sega ni vakawati se vakaluveni na agilosi. (Marika 12:25) Ia era buli na agilosi, era dau vakatokai tale ga mera “luve ni Kalou dina.”​—Jope 1:6.

Era se buli makawa sara na agilosi, qai buli e muri na vuravura. Gauna e bulia kina na vuravura na Kalou, era “tekivu kaila ena vakasausau” na agilosi.​—Jope 38:​4-7.

Era le vica na agilosi?

E sega ni cavuta sara ga na iVolatabu e dua na fika, e tukuna ga ni tiko e dua na iwiliwili vakaitamera ni agilosi. Kena ivakaraitaki, a raivotutaka na yapositolo o Joni e vica vata na drau na milioni na agilosi.​—Vakatakila 5:​11.

Era vakayacani na agilosi qai tiko na nodra itovo?

Io, e cavuti ena iVolatabu e rua na yaca ni agilosi, o Maikeli kei Keperieli. (Taniela 12:1; Luke 1:​26) * Eso tale na agilosi era vakadinata ni tiko na yacadra, ia era sega ni dau vakaraitaka.​—Vakatekivu 32:29; Dauveilewai 13:17, 18.

E tiko na nodra itovo na agilosi. E rawa nira veivosaki. (1 Korinica 13:1) E rawa nira vakasama, e rawa nira vakacaucautaka na Kalou. (Luke 2:​13, 14) E laurai tale ga ena nodra tokoni Setani eso na agilosi ena nona talaidredre vua na Kalou, ni soli vei ira na galala mera digia mera cakava na ka vinaka se ka ca.​—Maciu 25:41; 2 Pita 2:4.

E duidui na nodra itutu na agilosi?

Io. E agilosi kaukaua duadua o Maikeli na agilosi turaga, qai soli vua e levu na lewa. (Juta 9; Vakatakila 12:7) Dua na iwasewase ni agilosi cecere era vakatokai me serafimi, era tu wavokita na idabedabe vakaturaga i Jiova. (Aisea 6:​2, 6) Dua tale na iwasewase ni agilosi cecere era vakatokai me jerupi, era lesi tale ga ena so na itavi dokai. Kena ivakaraitaki, e yadrava na jerupi na icurucuru ina were o Iteni ni rau vakatalai oti mai kina o Atama kei Ivi.​—Vakatekivu 3:​23, 24.

Era dau veivuke na agilosi?

Io, e vakayagataki ira na nona agilosi yalodina na Kalou mera dau veivuke ena gauna qo.

Vakacava e lesi e dua na agilosi me taqomaka na tamata yadua?

Era kauaitaka na agilosi na nodra bula vakayalo na tamata ni Kalou, ia e sega ni lesia na Kalou e dua na agilosi me taqomaka vakatabakidua e dua na lotu vaKarisito. * (Maciu 18:10) Era sega ni taqomaki ira na tamata ni Kalou na agilosi mai na veivakatovolei se veitemaki kece. E kaya na iVolatabu ni levu na gauna ena vakarautaka na Kalou “na sala” me vosota rawa kina o koya e vakatovolei, qori ena nona veivakavukui kei na nona veivakaukauataki.​—1 Korinica 10:12, 13; Jemesa 1:​2-5.

Rai cala me baleta na agilosi

Rai cala: Era vinaka kece na agilosi.

Ka dina: Era cavuti ena iVolatabu “na yalo ca tawarairai,” kei “ira na agilosi era a valavala ca.” (Efeso 6:​12; 2 Pita 2:4) Era vakatokai me timoni na agilosi ca qori, era tokoni Setani ena nona talaidredre vua na Kalou.

Rai cala: Era tawamate na agilosi.

Ka dina: Era na vakarusai na agilosi ca, wili kina o Setani na Tevoro.​—Juta 6.

Rai cala: Era vuki me agilosi na tamata nira mate.

Ka dina: A buli ira sara ga na agilosi na Kalou, era sega ni tamata tu e liu, gauna era mate kina ra qai vakaturi mera lai bula e lomalagi. (Kolosa 1:​16) Na Kalou e solia na bula tawamate vei ira era na vakaturi mera lai bula e lomalagi. (1 Korinica 15:53, 54) Na nodra itavi o ira qori e cecere mai na nodra itavi na agilosi.​—1 Korinica 6:3.

Rai cala: Era cakava na agilosi na ka e vinakata na tamata.

Ka dina: Era talairawarawa na agilosi ina ivakaro ni Kalou, sega ni ka eda tukuna o keda. (Same 103:20, 21) O Jisu mada ga e kaya ni na sega ni kere veivuke vei ira na agilosi, ena kere veivuke ga vua na Kalou.​—Maciu 26:53.

Rai cala: E rawa nida masu vei ira na agilosi mera vukei keda.

Ka dina: Na masu e tiki ni sokalou e dodonu me nona duadua ga na Kalou o Jiova. (Vakatakila 19:10) E dodonu meda masu ga vua na Kalou, ena vuku i Jisu.​—Joni 14:6.

^ para. 10 Era vakayagataka e vica na vakadewa ni iVolatabu na vosa “Lusefa” ena Aisea 14:12, ra qai nanuma eso ni yacana na agilosi a qai vuki me o Setani na Tevoro. Ia na vosa taumada vakaIperiu e vakayagataki e keri e kena ibalebale “kalokalo ramase.” E laurai ena ikotokoto ni sega ni vakaibalebaletaki vei Setani na Lusefa. Ia e vakaibalebaletaki ina matanitu o Papiloni, a vakamadualaka na Kalou ena vuku ni nona dokadoka. (Aisea 14:​4, 13-​20) A vakayagataki na matavosa “kalokalo ramase” me vakalialiai kina na matanitu o Papiloni ni oti na kena vakabalei.

^ para. 21 Eso era nanuma ni nona sereki mai valeniveivesu o Pita e vakaraitaka ni a lesi vakatabakidua e dua na agilosi me taqomaki koya. (Cakacaka 12:​6-​16) Na cava ga eratou cavuta kina na tisaipeli na matavosa “agilosi [i Pita]”? De dua eratou nanuma cala ni sega ni rawa ni lako yani o Pita, sa talai ga yani e dua na agilosi me matataki koya.