O Keni na nodrau ulumatua na imatai ni veiwatini, a vakawatitaka ga e dua na ganena se wekana voleka. E rawa ni vakadinadinataki qori ena noda dikeva na ka e kaya na iVolatabu me baleti Keni kei na nona vuvale.

Ka dina me baleti Keni kei na nona vuvale

•   Eda kawa kece i Atama kei Ivi. Na Kalou e “bulia na matatamata kece mai na dua ga na tamata [Atama], mera tawana na yasa i vuravura kece.” (Cakacaka 17:26) A vakatokai kina o Ivi na wati Atama me “tinadra kece na bula.” (Vakatekivu 3:​20) E kena irairai ni wati Keni e dua ga na kawa i Atama kei Ivi.

•   Vakasucumi rau e liu o Keni kei Epeli o Ivi, ra qai sucu e muri eso tale na tacidrau. (Vakatekivu 4:​1, 2) Na gauna e vakatalai kina o Keni ni a vakamatei tacina, e kaya: “Ke dua e kunei au ena vakamatei au sara ga.” (Vakatekivu 4:​14) O cei e rerevaka o Keni? E kaya na iVolatabu ni a “so tale na luvena tagane kei na luvena yalewa” o Atama. (Vakatekivu 5:4) Kena ibalebale e leqataka o Keni nira na rawa ni cakava vua e dua na ka eso tale nodrau kawa o Atama kei Ivi.

•   E sega ni ka vou ena itekitekivu ni bula ni kawatamata na veiwatini vakaveiwekani. Kena ivakaraitaki, na turaga yalodina o Eparama a vakawatitaki ganena, erau tama vata ia erau duidui tina. (Vakatekivu 20:12) Oti e vica na senitiuri nona mate o Keni, sa qai vakatabui ena Lawa e soli vei Mosese na vakawati vakaveiwekani. (Vunau ni Soro 18:​9, 12, 13) E kena irairai ni leqataki vakalevu cake ena gauna qo na bula ni gone erau veiwekani voleka na nona itubutubu ni vakatauvatani kei na gauna makawa. E rawa ni bulicaki vakaca o gone ena gauna e sucu kina.

•   E donu vinaka na itukutuku makawa e vakamacalataki ena iVolatabu me baleta nodrau vuvale o Atama kei Ivi. E sega wale ga ni vola o Mosese ena Vakatekivu na yatukawa i Atama, erau a vakamacalataka tale ga qori na daunitukutuku makawa o Esera kei Luke. (Vakatekivu 5:​3-5; 1 Veigauna 1:​1-4; Luke 3:​38) Era cavuta eso tale na dauvola iVolatabu na itukutuku kei Keni.​—Iperiu 11:4; 1 Joni 3:​12; Juta 11.