Raica sara na lewena

Na Website ni iVakadinadina i Jiova

Digia na Vosa vakaViti

Na Cava e Yaco Nida Mate?

Kena iSau Vakaivolatabu

E kaya na iVolatabu: “Era kila na bula tiko nira na mate, ia o ira na mate era sega sara ga ni kila e dua na ka.” (Dauvunau 9:5; Same 146:4) Koya gona e sega ni dua tale na ka e bula tiko nida sa mate. E sega na vakasama, cakacaka, se vakilai e dua na ka.

“O na suka mo kuvuniqele tale”

E vakamatatataka na Kalou na ka e yaco nida mate ena gauna e vosa kina vei Atama. Ni talaidredre o Atama, e tukuna na Kalou: “O kuvuniqele ga, o na suka mo kuvuniqele tale.” (Vakatekivu 3:19) A sega ni bula tu o Atama me yacova ni sa buli koya “mai na kuvuniqele” na Kalou. (Vakatekivu 2:7) Ena gauna e mate kina, e sega ni bula tale tiko ni sa suka ina kuvuniqele.

Qori tale ga na ka e yaco nida mate ena gauna qo. E kaya na iVolatabu me baleti keda kei ira na manumanu: “Era kuvuniqele kece, era na lesu kece ina kuvuniqele.”​—Dauvunau 3:19, 20.

E sega ni itinitini ni ka kece na mate

Na iVolatabu e dau vakatauvatana na mate me vaka ga na moce. (Same 13:3; Joni 11:11-14; Cakacaka 7:60) O koya e moce lutu e sega ni kila na veika e yaco wavoliti koya. E vaka kina o ira na mate, era sega ni vakila e dua na ka. Ia e tukuna na iVolatabu ni Kalou e rawa ni vakabulai ira mai na mate, me vaka nona vakayadrati ira mai na moce. (Jope 14:13-15) E sega ni itinitini ni ka kece na mate vei ira na vakaturi ira na Kalou.