Raica sara na lewena

Na Website ni iVakadinadina i Jiova

Digia na Vosa vakaViti

Au na Kila Vakacava na Lotu Dina?

Au na Kila Vakacava na Lotu Dina?

Kena iSau Vakaivolatabu

E vakamacalataki ena iVolatabu na duidui ni lotu dina kei na lotu lasu, e kaya: “Dou na kilai ira ena vuadra. E vakaevei, e dau beti na vaini mai na wavakavotona, se lolo mai na soni?” (Maciu 7:16) Me vaka ga ni duidui na vua ni vaini kei na vua ni wavakavotona, o na vakaduiduitaka tale ga na lotu dina kei na lotu lasu ena vuadra, se na ka e vakamacalataki e ra.

  1. Na lotu dina e vakavulica na ka dina ena iVolatabu, sega ni vakasama vakatamata. (Joni 4:24; 17:17) Qo e wili kina na ka dina me baleta na bula kei na inuinui ni bula tawamudu ena parataisi e vuravura. (Same 37:29; Aisea 35:5, 6; Isikeli 18:4) E sega tale ga ni tu vakasuka me vakaraitaka na ivakavuvuli lasu.—Maciu 15:9; 23:27, 28.

  2. Na lotu dina e vukei ira na lewenivanua mera kila na yaca ni Kalou o Jiova. (Same 83:18; Aisea 42:8; Joni 17:3, 6) E sega ni vakavulica ni dredre meda kilai koya se sega ni kauaitaki keda, ia e vakavulica ga ni vinakata meda toro volekati koya.—Jemesa 4:8.

  3. Na lotu dina e vakabibitaka ni Kalou e lesi Jisu Karisito me veivakabulai. (Cakacaka 4:10, 12) Era talairawarawa ena ivakaro i Jisu ra qai saga mera muria na nona ivakaraitaki.—Joni 13:15; 15:14.

  4. Na lotu dina e vakabibitaka ni inuinui ga ni kawatamata na Matanitu ni Kalou. Era gumatua ni wasea na itukutuku ni Matanitu ni Kalou.—Maciu 10:7; 24:14.

  5. Na lotu dina e uqeta na veilomani. (Joni 13:35) E vakavulica mera dokai ra qai ciqomi na duikaikai. (Cakacaka 10:34, 35) Era sega ni vakaitavi ena ivalu ni uqeti ira na loloma.—Maika 4:3; 1 Joni 3:11, 12.

  6. Na lotu dina e sega ni saumi na nodra italatala, era sega tale ga ni kacivi ena so na icavuti mera vakacerecerei kina.—Maciu 23:8-12; 1 Pita 5:2, 3.

  7. Na lotu dina e sega ni veitovaki ena ka vakapolitiki (Joni 17:16; 18:36) Ia era doka ra qai talairawarawa ina matanitu era tiko kina me salavata kei na ivakaro ena iVolatabu: “Ni solia vei Sisa na ka e nei Sisa [dusia na veiliutaki], vua na Kalou na ka e nona na Kalou.”—Marika 12:17; Roma 13:1, 2.

  8. Na lotu dina e laurai ena nodra bula e veisiga, sega ni vagauna ga. Era muria na ivakatagedegede savasava ena iVolatabu ena ka kece era cakava ena nodra bula. (Efeso 5:3-5; 1 Joni 3:18) Era marau nira sokaloutaka na “Kalou mamarau.”—1 Timoci 1:11.

  9. Era le lailai ga na lewe ni lotu dina. (Maciu 7:13, 14) Era beci, vakalialiai, era vakacacani tale ga nira vakayacora na loma ni Kalou.—Maciu 5:10-12.

Na lotu dina e sega ni vakatau ena noda ivakatagedegede

E rerevaki nida digia na lotu e vakatau ga ena noda ivakatagedegede. E parofisaitaki ena iVolatabu na gauna era na digia kina e levu “na nodra qasenivuli [ni lotu] me vakavulici ira ena ka e via rogoca na daligadra.” (2 Timoci 4:3) Ia e uqeti keda na iVolatabu meda muria na “lotu e savasava qai sega ni dukadukali ena mata ni noda Kalou na Tamada,” veitalia ke sevaki.—Jemesa 1:27; Joni 15:18, 19.