Raica sara na lewena

Na Website ni iVakadinadina i Jiova

Digia na Vosa vakaViti

Na Cava na iBalebale ni Savasava?

Na Cava na iBalebale ni Savasava?

Kena isau vakaivolatabu

Na savasava e vakaibalebaletaka e dua na ka e sega ni tauvi duka. Na vosa vakaIperiu e vakadewataki me “savasava” e tiko kina na vakasama ni dua na ka e “duatani.” Kena ibalebale na ka e savasava se ka tabu, e sega ni vakayagataki vakalevu, vakauasivi ke vauca na ka e kilikili qai taucoko.

E uasivi na savasava ni Kalou. E kaya na iVolatabu: “E sega ni dua e savasava me vakataki Jiova.” * (1 Samuela 2:2) E tu gona vua na dodonu me kotora na ivakatagedegede ni ka e savasava.

Na vosa “savasava” e rawa ni vakayagataki ina dua na ka e sema vua na Kalou, vakabibi na ka era vauca na sokalou. Kena ivakaraitaki, e kaya na iVolatabu:

  • Qele tabu: E kaya na Kalou vei Mosese ena yasa ni vunikau kama: “Na vanua o butuka tu e qele tabu.”​—Lako Yani 3:2-5.

  • Soqoni tabu: E dau vakatokai me “soqoni tabu” nodra gauna ni solevu na Isireli mera sokaloutaki Jiova kina.​—Vunau ni Soro 23:37.

  • iYaya vakatabui: Na iyaya era vakayagataki ena sokalou vua na Kalou ena valenisoro e Jerusalemi e dau vakatokai me “iyaya vakatabui.” (1 Tui 8:4) Na iyaya e vakatabui qori e dau raici me ka tabu, dina nira sega ni sokaloutaki. *

Vakacava e rawa ni savasava e dua na tamata ivalavala ca?

Io. E vakarota na Kalou vei ira na lotu vaKarisito: “Moni savasava niu savasava o yau.” (1 Pita 1:​16) Nida kawa ivalavala ca, eda na sega ni rawa ni vaka na Kalou ena nona ivakarau ni ivakatagedegede ni savasava. Ia o ira ga era talairawarawa ina lawa ni Kalou era na okati mera ‘savasava, ena vakadonui ira tale ga na Kalou.’ (Roma 12:1) O koya e savasava ena laurai ena na ka e tukuna se ka e cakava. Kena ivakaraitaki, ena muria o koya na ivakasala ena iVolatabu ‘me vakasavasavataki koya, oya me vakatabui koya mai na veiyacovi tawadodonu,’ me ‘savasava tale ga na nona ivalavala kece.’​—1 Cesalonaika 4:3; 1 Pita 1:​15.

Vakacava e rawa ni vakayalia e dua na nona itutu savasava vua na Kalou?

Io. Ni dua e biuta na ivakatagedegede ni Kalou me baleta na itovo, sa na sega ni okati koya na Kalou me savasava. Kena ivakaraitaki, ena ivola na Iperiu era vakaroti na ‘mataveitacini yalosavasava’ era vakasalataki tale ga, me kua ni laurai vua e dua ni “ca na lomana ni sega vua na vakabauta ni yawaka tiko na Kalou bula.”​—Iperiu 3:​1, 12.

Rai cala me baleta na savasava

Rai cala: Ena rawati na savasava ke da vakatabui keda ena levu na ka.

Ka dina: E vakaraitaka na iVolatabu ni o ira “era vakararawataka na yagodra,” se vakatatabutaka e levu na ka, e “sega ni yaga” vua na Kalou. (Kolosa 2:​23) Ia e vinakata na Kalou meda marautaka na veika vinaka. E kaya na iVolatabu: “Mera kana. . .mera gunu na tamata yadua, me marautaka na nona cakacaka kaukaua kece. Qo na isolisoli ni Kalou.”​—Dauvunau 3:​13.

Rai cala: O na savasava ga ke o dawaitabu.

Ka dina: Ke ra digia mada ga na lotu vaKarisito mera kua ni vakawati, na dawaitabu e sega ni vakaraitaki ni nona savasava e dua ena mata ni Kalou. E dina ni tukuni ni o ira era dawai era na rawa ni solia na nodra vinaka kece ena sokalou. (1 Korinica 7:​32-​34) Ia e vakaraitaka na iVolatabu ni o ira mada ga era vakawati era savasava tale ga. Kena ivakaraitaki, o Pita e dua na yapositolo i Jisu a vakawati.​—Maciu 8:​14; 1 Korinica 9:5.

^ para. 4 O Jiova na yaca ni Kalou. E laurai vakavica na drau ena iVolatabu na yaca qori, e toka kina na vakasama ni dua na ka e “savasava” se “ka tabu.”

^ para. 8 E vakacala na iVolatabu na kena sokaloutaki na iyaya makawa ni sokalou.​—1 Korinica 10:14.