Raica sara na lewena

Na Website ni iVakadinadina i Jiova

Digia na Vosa vakaViti

Na Cava na Lakosivia?

Na Cava na Lakosivia?

Kena isau vakaivolatabu

Na Lakosivia e dua nodra solevu na Jiu, era dau vakananuma kina na Isireli nona sereki ira na Kalou ena 1513 B.G.V., ena nodra vakabobulataki tu e Ijipita. A vakaroti ira na Isireli na Kalou mera vakananuma qori e veiyabaki ena ika14 ni Epipi, na vula vakaJiu a qai kilai e muri me Naisani.​—Lako Yani 12:42; Vunau ni Soro 23:5.

Na cava e vakatokai kina me Lakosivia?

Na “Lakosivia” e vakaibalebaletaka na gauna a vakabulai ira kina na Isireli na Kalou, mai na kuita a vakamatei ira na ulumatua kece e Ijipita. (Lako Yani 12:27; 13:15) Ni bera ni tauca na kuita qori na Kalou, a kaya mera vakamatea na Isireli e dua na lami se me ra qai vakamirika na kena dra ena nodra matanikatuba. (Lako Yani 12:21, 22, ivakamacala e ra) Ni raica na Kalou na ivakatakilakila ni dra ena matanikatuba, ena ‘lako sivita’ nodra vale qai vakabula nodra ulumatua.​—Lako Yani 12:​7, 13.

E dau solevutaki vakacava ena gauna vakaivolatabu na Lakosivia?

A vakaroti ira na Isireli na Kalou ena sala me solevutaki kina na imatai ni Lakosivia. * Qo eso na ivakamacala ni Lakosivia e cavuti ena iVolatabu.

  • iSoro: Ena ikatini ni Epipi (Naisani), era digia na vuvale e dua na lami gone (se me) ra qai vakamatea ena ika14 ni siga. Ena imatai ni Lakosivia, era kaburaka na Jiu na dra ena duru ni katuba kei na tikina i cake ni icurucuru ni vale. Oti era tavuna na manumanu qai kania.​—Lako Yani 12:​3-9.

  • Kakana: Era kania vata na Isireli na lami (se me), na madrai sega ni vakaleveni, kei na kakana draudrau gaga ena kanavata ni Lakosivia.​—Lako Yani 12:8.

  • Soqo: Oti na Lakosivia, era qai solevutaka na Isireli na Soqo ni Madrai Sega ni Vakaleveni me vitu na siga. Era sega ni kania ena gauna qori na madrai e vakaleveni.​—Lako Yani 12:17-​20; 2 Veigauna 30:21.

  • Vuli: Era dau vakavulici luvedra na itubutubu ena gauna ni Lakosivia ena veika me baleta na Kalou o Jiova.​—Lako Yani 12:25-27.

  • Vanua: Dua na gauna e muri, era lako i Jerusalemi na Isireli mera lai solevutaka na Lakosivia.​—Vakarua 16:​5-7; Luke 2:​41.

  • So tale na ka e caka: Ena gauna i Jisu, a vakayagataki na waini ena solevu ni Lakosivia, caka tale ga na lagasere.​—Maciu 26:19, 30; Luke 22:15-​18.

Rai cala me baleta na Lakosivia

Rai cala: Era kanavata ni Lakosivia na Isireli ena ika15 ni Naisani.

Ka dina: E vakarota na Kalou mera vakamatea na Isireli na lami ni dromu na siga ena ika14 ni Naisani, ra qai kania ena bogi ga ya. (Lako Yani 12:​6, 8) E tekivu nodra siga na Isireli ni dromu na siga ena dua na yakavi ina dromu ni siga ena yakavi tarava. (Vunau ni Soro 23:32) Era vakamatea gona na Isireli na lami ra qai kanavata ni Lakosivia ena ika14 ni Naisani.

Rai cala: E dodonu mera solevutaka na lotu vaKarisito na Lakosivia.

Ka dina: Ni solevutaka oti o Jisu na Lakosivia ena ika14 ni Naisani 33 G.V., a tauyavutaka sara e dua na solevu vou: na iVakayakavi ni Turaga. (Luke 22:19, 20; 1 Korinica 11:20) Na ivakayakavi qori e sosomitaka na Lakosivia, ni vakananumi kina na isoro i “Karisito, na . . . lami ni Lakosivia.” (1 Korinica 5:7) Na isoro i Jisu e uasivia na isoro ni Lakosivia ni sereki keda kece mai na veivakabobulataki ni ivalavala ca kei na mate.​—Maciu 20:28; Iperiu 9:​15.

^ para. 7 Toso na gauna e vakayacori eso na veisau. Kena ivakaraitaki, era solevutaka “vakatotolo” na Isireli na imatai ni Lakosivia mera kua kina ni vuki bera ke vinakati mera sa biubiu. (Lako Yani 12:11) Ia nira yaco ena Vanua Yalataki na Isireli, sa sega ni gadrevi mera solevutaka vakatotolo na Lakosivia.