Raica sara na lewena

Na Cava na iBalebale ni Lomalagi?

Na Cava na iBalebale ni Lomalagi?

Kena isau vakaivolatabu

E tolu na ka e vakaibalebaletaka na vosa “lomalagi” ni cavuti ena iVolatabu: (1) na maliwalala, (2) nodra itikotiko na kabula vakayalo, se (3) dua na itutu cecere. Ena vakatau ena ikotokoto na ibalebale ni lomalagi e vinakati me vakavotui. *

  1. Na maliwalala. Na “lomalagi” e rawa ni vakaibalebaletaka na maliwalala e dau liwa kina na cagi, vuka kina na manumanuvuka, tau mai kina na uca se ucacevata, tibi tale ga kina na liva. (Same 78:26; Vosa Vakaibalebale 30:19; Aisea 55:10; Luke 17:24) E rawa tale ga ni vakaibalebaletaka na vanua e veitosoyaki voli kina “na matanisiga, na vula kei na kalokalo.”​—Vakarua 4:​19; Vakatekivu 1:1.

  2. Nodra itikotiko na kabula vakayalo. Na vosa “lomalagi” e rawa ni vakaibalebaletaki ina vanua vakayalo era tiko kina na kabula era cecere sara vei keda na bula e vuravura. (1 Tui 8:​27; Joni 6:​38) E “yalo” na Kalou o Jiova, qai vakaitikotiko kei ira na nona agilosi ena vanua vakayalo e dau vakaibalebaletaki me lomalagi. (Joni 4:​24; Maciu 24:36) E dau vakayagataki ena so na gauna “na lomalagi” me vakatakarakarataka na “ivavakoso ni yalosavasava,” se o ira na agilosi yalodina.​—Same 89:​5-7.

    Ni cavuti ena iVolatabu na “lomalagi,” e rawa ni vakaibalebaletaki tale ga ina “itikotiko” i Jiova. (1 Tui 8:​43, 49; Iperiu 9:​24; Vakatakila 13:6) Kena ivakaraitaki, a parofisaitaka na iVolatabu ni na kolotaki tani mai lomalagi o Setani kei ira na timoni. Era se kabula vakayalo tiko ga o ira qori, sa tabu ga mera butuka yani na itikotiko i Jiova.​—Vakatakila 12:​7-9, 12.

  3. Dua na itutu cecere. Na iVolatabu e dau vakaibalebaletaka tale ga na “lomalagi” ina dua na itutu cecere se veiliutaki. Qori e rawa ni:

E vanua vakacava o lomalagi?

E vanua vakayalo ra qai ogaoga voli ena veiqaravi e oba vakaoba na kabula vakayalo era ‘vakayacora na vosa i Jiova.’​—Same 103:20, 21; Taniela 7:​10.

E kaya na iVolatabu ni ramase vinaka tu o lomalagi. (1 Timoci 6:​15, 16) A raivotutaka na parofita o Isikeli na “ramase ni rarama” e lomalagi, o Taniela a raivotutaka na “uciwai bukawaqa.” (Isikeli 1:​26-​28; Taniela 7:​9, 10) E savasava o lomalagi qai rairai totoka.​—Same 96:6; Aisea 63:15; Vakatakila 4:​2, 3.

E vakatubuqoroqoro na ka e vakamacalataka na iVolatabu me baleti lomalagi. (Isikeli 43:​2, 3) Ni vanua vakayalo, eda sega gona ni kila na tamata na ka kece me baleti lomalagi.

^ para. 3 Na vosa vakaIperiu e vakadewataki me “lomalagi” e tiko kina na vakasama ni “cecere” se “dokai.” (Vosa Vakaibalebale 25:3) Raica na ivola The New Brown, Driver, and Briggs Hebrew and English Lexicon of the Old Testament, tabana e 1029.

^ para. 9 E tukuni ena ivola na McClintock and Strong’s Cyclopedia ni lomalagi vou ena Aisea 65:17 e dusia “e dua na veiliutaki vou, matanitu vou.”​—Volume IV, tabana e 122.