Raica sara na lewena

Na Website ni iVakadinadina i Jiova

Digia na Vosa vakaViti

Meu Masu Vei Ira na Sanito?

Meu Masu Vei Ira na Sanito?

Kena iSau Vakaivolatabu

Sega. E tukuni ena iVolatabu meda masu duadua ga vua na Kalou ena yaca i Jisu. E kaya o Jisu vei ratou na nona tisaipeli: “Mo dou masu gona va qo: Tama i keimami mai lomalagi, me vakarokorokotaki na yacamuni.” (Maciu 6:9) A sega ni vakavulici ratou na nona tisaipeli me ratou masu vei ira na sanito, agilosi, se dua tale.

E tukuna tale ga o Jisu vei ira na nona imuri: “O yau na sala, na dina, kei na bula. Ena vukuqu ga ena qai torovi Tamaqu rawa kina e dua.” (Joni 14:6) O Jisu duadua ga e vakadonuya na Kalou me matataki keda.—Iperiu 7:25.

Vakacava keu masu vua na Kalou kei ira na sanito?

Qo na ka e kaya na Kalou, e wili tale ga ena Vunau e Tini: “O yau na TURAGA, na nomu Kalou, niu sa Kalou vuvu.” (Lako Yani 20:5, NAB) Na sala cava e “vuvu” kina na Kalou? E volai ena ivakamacala e ra ni vakadewa na New American Bible, ni vinakata meda “vakarorogo ga” vua. E vinakata na Kalou me vakayacori duadua ga vua na sokalou, wili kina na masu.—Aisea 48:11.

Eda vakacudruya na Kalou ke da masu vua e dua tale, se vei ira na sanito se agilosi yalosavasava. Ni cuva na yapositolo o Joni me vakarokoroko vua na agilosi, e tarovi koya na agilosi qai kaya: “Qarauna! Kua ni cakava qori! O yau na nomu itokani dauveiqaravi ga, au nodra itokani dauveiqaravi tale ga na tacimu era dau tukuni Jisu. Qarava na Kalou.”—Vakatakila 19:10.