Raica sara na lewena

Na Website ni iVakadinadina i Jiova

Digia na Vosa vakaViti

Cava sa Rui Levu Kina na Lotu vaKarisito?

Cava sa Rui Levu Kina na Lotu vaKarisito?

Kena isau vakaivolatabu

Levu era tauyavutaka na veimataqali lotu “vaKarisito” nira muria na ivakavuvuli nei Jisu. Ia e vakaraitaka na iVolatabu ni dua ga na lotu vaKarisito dina. Dikeva e tolu na vuna eda kaya kina qori.

  1. E kaya o Jisu ni vakavulica na “ka dina,” ra qai vakadeitaka na lotu vaKarisito taumada ni “dina” na nodra lotu. (Joni 8:​32; 2 Pita 2:2; 2 Joni 4; 3 Joni 3) Kena ibalebale era sega ni lotu vaKarisito dina o ira na tokona na ivakavuvuli e veicalati kei na ivakavuvuli i Jisu.

  2. E tukuni ena iVolatabu mera ‘duavata ena ka era tukuna’ o ira kece na lotu vaKarisito. (1 Korinica 1:​10) Ia e levu na lotu vaKarisito era sega ni duavata kei na ivakavuvuli rawarawa me kilai kina na lotu vaKarisito dina. Era sega ni dina na lotu va qori.​—1 Pita 2:​21.

  3. E parofisaitaka o Jisu nira na kaya e levu nira lotu vaKarisito, ia era sega ni muria na nona ivakaro. Ena sega gona ni vakadonui ira. (Maciu 7:​21-​23; Luke 6:​46) O ira na iliuliu ni lotu era vakacalai ira eso nira vakatanitaka na sokalou dina mera rawaka kina. (Maciu 7:​15) Eso tale era taleitaka na lotu va qori nira rogoca kina na ka ga era taleitaka, era sega ni via rogoca na ka dina ena iVolatabu.​—2 Timoci 4:​3, 4.

E tukuna o Jisu ena nona vosa vakatautauvata ni witi kei na co ca, nira na basika na vukitani ra qai saqati ira na lotu vaKarisito dina. (Maciu 13:24-​30, 36-​43) Ena loma ni dua na gauna, ena sega ni kilai na duidui ni lotu vaKarisito dina kei na lotu lasu. Me vaka e parofisaitaka o Jisu e qai tete na vukitani ni ratou sa mate na yapositolo. (Cakacaka 20:29, 30) E levu na ivakavuvuli ni vukitani, ia era “gole tani mai na ka dina.”​—2 Timoci 2:​18.

E parofisaitaka tale ga o Jisu ni toso na gauna ena qai matata mai na kedrau duidui na lotu vaKarisito dina kei na lotu lasu. Sa yaco sara tiko ga qori ena noda gauna, donuya na “ivakataotioti ni veika vakavuravura.”​—Maciu 13:30, 39.