Raica sara na lewena

Cava e Kaya na iVolatabu me Baleta Nomu Lomani Iko?

Cava e Kaya na iVolatabu me Baleta Nomu Lomani Iko?

Kena isau vakaivolatabu

E vakaraitaka na iVolatabu ni donu qai veiganiti nomu lomani iko, ia e tiko na kena iyalayala. Kena ivakaraitaki, na nomu lomani iko e vakaraitaka ni o kauaitaka nomu bula, o sega tale ga ni beci iko. (Maciu 10:31) E sega ni tautauvata na nomu lomani iko kei na nomu nanumi iko ga. E sega tale ga ni kaya na iVolatabu meda sa lomani keda tu ga e veigauna.

O cei meda lomana eliu?

  1. Noda lomana na Kalou e dodonu me liu duadua. E kaya na iVolatabu me baleta na ivakaro levu duadua: “Mo lomani Jiova na nomu Kalou ena lomamu taucoko.”​—Marika 12:28-​30; Vakarua 6:5.

  2. Na ikarua ni ivakaro: “Mo lomana na kainomu me vaka nomu lomani iko.”​—Marika 12:31; Vunau ni Soro 19:18.

  3. E sega ni dua na ivakaro ena iVolatabu me baleta na nomu lomani iko. Ia na ivakaro mo “lomana na kainomu me vaka nomu lomani iko” e dusia ni sega ni cala, e yaga tale ga noda lomani keda se noda dokai keda ena so na gauna.

O cei e lomana eliu o Jisu?

E vakaraitaka o Jisu na sala meda veiraurautaka kina noda lomana na Kalou, lomana na kainoda, kei na noda lomani keda. E vakavulici ratou nona tisaipeli me ratou vakatotomuria nona ivakaraitaki.​—Joni 13:34, 35.

  1. E lomana eliu na Kalou, qai cakava na ka e vinakata o Jiova, ni kaya: “Au na vakayacora na ka e vakarota vei au o Tamaqu meu cakava, me kila kina o vuravura niu lomani Tamaqu.”​—Joni 14:31.

  2. E lomani ira na kainona o Jisu, e laurai qori ena nona kauaitaka na ka era vinakata eso tale, e solia mada ga na nona bula ena vukuda.​—Maciu 20:28.

  3. E veiganiti tale ga nona lomani koya ni tiko na gauna me cegu kina, kana, qai marautaka nona veimaliwai kei ratou nona imuri kei ira nona tisaipeli.​—Marika 6:​31, 32; Luke 5:​29; Joni 2:​1, 2; 12:2.

Ke liu nomu lomani ira eso tale qai muri nomu lomani iko, kena ibalebale ya ni o na rarawa qai beci kina?

Sega. Eda buli meda ucuya na Kalou, na ivurevure ni loloma. (Vakatekivu 1:​27; 1 Joni 4:8) Kena ibalebale eda buli meda dau veilomani. E rawa nida lomani keda ena so na gauna, e sega ni cala qori. Ia e vakavu marau vakalevu noda lomana e liu na Kalou qai caka vinaka vei ira eso tale. E kaya na iVolatabu: “E marau vakalevu o koya e solia na ka, vakalailai o koya e taura na ka.”​—Cakacaka 20:35.

E levu era kaya nida na marau ke da vakaliuci keda ga. Era sa veisautaka na matavosa “lomana na kainomu” me “lomani iko.” Ia e levu era vakadinadinataka nira bulabula qai mamarau o ira na muria na ivakasala vakaivolatabu: “Me kua ni dua e qara na ka e yaga ga vua, me qara tale ga na ka e yaga vei ira tale eso.”​—1 Korinica 10:24.