Raica sara na lewena

Na Website ni iVakadinadina i Jiova

Digia na Vosa vakaViti

Na Cava Soti na “ki ni Matanitu Vakalomalagi”?

Na Cava Soti na “ki ni Matanitu Vakalomalagi”?

Kena iSau Vakaivolatabu

“Na ki ni Matanitu vakalomalagi” e dau kilai tale ga me “ki ina matanitu,” e dusia na veiliutaki e dolava na sala vei ira na kawatamata mera “curu ina Matanitu ni Kalou.” (Maciu 16:19; The New American Bible; Cakacaka 14:22) * E solia o Jisu vei Pita “na ki ni Matanitu vakalomalagi.” E kena ibalebale ni a soli vei Pita na lewa ena veidusimaki ni yalo tabu me vakasavuya kina na itukutuku me baleti ira na tamata yalodina era na vakalougatataki nira curu ina Matanitu vakalomalagi.

O cei ena yaga vua na ki?

Ena lewa e lesia vua na Kalou, e dolava kina o Pita e tolu na ilawalawa tamata mera curu ina Matanitu ni Kalou:

  1. O ira na Jiu kei ira era tavuki mera Jiu. Ni oti toka ga nona mate o Jisu, e uqeti ira e dua na ilawalawa Jiu o Pita mera vakabauti Jisu ni digitaki ni Kalou me veiliutaki ena Matanitu vakalomalagi. E vakaraitaka o Pita na ka e dodonu mera cakava mera vakabulai kina. E dolava tale ga na sala mera curu kina ina Matanitu, era mani “ciqoma . . . na nona vosa.”​—Cakacaka 2:38-41.

  2. O ira na kai Samaria. A qai talai o Pita vei ira na kai Samaria. * E vakayagataka kina o Pita kei na yapositolo o Joni na ki ni Matanitu vakalomalagi vei ira na kai Samaria, ni “rau masulaki ira me sobuti ira na yalo tabu.” (Cakacaka 8:14-17) E dolavi kina na sala vei ira na kai Samaria mera curu ina Matanitu vakalomalagi.

  3. O ira na kai Veimatanitu. Ni oti ga e tolu veimama na yabaki nona mate o Jisu, e vakaraitaka vei Pita na Kalou ni o ira na kai veimatanitu (era sega ni Jiu) era na rawa tale ga ni curu ina Matanitu ni Kalou. E vakayagataka sara o Pita e dua vei ira na ki qori me vunau kina vei ira na kai veimatanitu. E dolava na sala me dusimaki ira na yalo tabu ra vakatokai tale ga mera lotu vaKarisito. E rawa kina nira lewe ni Matanitu ni Kalou.​—Cakacaka 10:30-35, 44, 45.

Na cava na ibalebale ni “curu ina Matanitu vakalomalagi”?

O ira era “curu ina Matanitu vakalomalagi” era na lai veiliutaki kei Jisu i lomalagi. E yalataka tu na iVolatabu nira na “dabe ena idabedabe vakatui” mera “veiliutaki vakatui, mera liutaka na vuravura.”​—Luke 22:29, 30; Vakatakila 5:​9, 10.

Rai cala me baleta na ki ni Matanitu vakalomalagi

Rai cala: E lesi o Pita me lewa o cei me lako i lomalagi.

Ka Dina: E kaya na iVolatabu ni o Jisu Karisito “ena lewai ira na bula kei ira na mate,” sega ni o Pita. (2 Timoci 4:​1, 8; Joni 5:​22) Ni kaya mada ga o Pita ni ‘lesi Jisu na Kalou me nodra turaganilewa na bula kei na mate.’​—Cakacaka 10:34, 42.

Rai cala: Era waraka voli o ira mai lomalagi na gauna me vakayagataka kina o Pita na ki ni Matanitu vakalomalagi.

Ka Dina: Ena gauna e vakamacalataka kina o Jisu na veika me baleta na ki ni Matanitu vakalomalagi, a kaya vei Pita: “Na ka kece o vauca e vuravura sa na vauci oti mai lomalagi, na ka kece o sereka e vuravura sa na sereki oti mai lomalagi.” (Maciu 16:19, The New American Bible) Era na rairai nanuma eso ni vosa e cavuti qori me baleti lomalagi e dusia ni tu vei Pita na lewa. Ia na vu ni vosa taumada vaKirisi e dusia ni muria, sega ni veisautaka o Pita na vakatulewa e sa vakayacori oti mai lomalagi. *

E vakaraitaka na iVolatabu ni o Pita e sega ni lewa ia e muria ga na veidusimaki mai lomalagi me baleta na vakayagataki ni ki ni Matanitu vakalomalagi. Kena ivakaraitaki, e muria na ivakaro e solia vua na Kalou me baleta na vakayagataki ni ikatolu ni ki.​—Cakacaka 10:19, 20.

^ para. 3 Ena so na gauna, e vakayagataka na iVolatabu na vosa “ki” me vakatakarakarataka na lewa se na itavi.​—Aisea 22:20-22; Vakatakila 3:7, 8.

^ para. 7 E tu na ka era vakabauta na kai Samaria. E duidui nodra vakabauta vei ira na Jiu nira bosoka vata na ka era vakabauta kei na so na ivakavuvuli ena Lawa i Mosese.

^ para. 15 Raica na ivakamacala ni Maciu 16:19 ena New World Translation of the Holy Scriptures (Study Edition).