Raica sara na lewena

Cava e Kaya na iVolatabu me Baleta na Veisausaumitaki ni Ca?

Cava e Kaya na iVolatabu me Baleta na Veisausaumitaki ni Ca?

Kena isau vakaivolatabu

Ena rairai nanuma e dua me sauma na ka ca e caka vua. Ia e vakacala qori na iVolatabu, ni tukuni kina: “Mo kua ni kaya: “Au na cakava vua me vaka ga e cakava vei au, au na sauma vua me vaka na nona ivalavala.” (Vosa Vakaibalebale 24:29) Na ivakasala ena iVolatabu sa vukei ira e levu mera kua ni veisausaumitaka na ca.

Ena ulutaga qo

 Cava e cala kina na veisausaumitaki ni ca?

Ni dua e veibeci se vakamavoataki iko, macala ga ni o na cudru qai vinakata me saumi na ca e caka vei iko. Ia e kaya na iVolatabu meda kua ni cakava qori. Na vuna?

E rarawataka na Kalou nida veisausaumitaka na ca e caka vei keda. E kaya na Kalou o Jiova * ena iVolatabu: “E noqu na veisausaumi, au na sauma.” (Roma 12:19) Ni caka vei keda na ka ca, e uqeti keda na iVolatabu meda walia ena sala malumu, meda kua ga ni veisausaumitaka. (Roma 12:18) Ia vakacava ke o cakava qori qai sega ga ni wali rawa? E uqeti keda na iVolatabu meda nuitaki Jiova ni na qai vakadodonutaka.—Same 42:10, 11.

 E dau veitotogitaki vakacava na Kalou?

Ena gauna qo, e vakatara na Kalou mera tauca na veiliutaki vakamatanitu na itotogi. (Roma 13:1-4) Toso na gauna na Kalou ena totogitaki ira kece na dau veivakalolomataki, qai vakaotia vakadua na rarawa.—Aisea 11:4.

 Au na qarauna vakacava meu kua ni sauma na ca?

  • Kua ni dau yalototolo. (Vosa Vakaibalebale 17:27) O ira na dau yalototolo era dau veivutunitaka tale na ka era cakava. Ia era dau vakatulewa vinaka o ira na dau vakasama rawa ni bera nira cakava e dua na ka.—Vosa Vakaibalebale 29:11.

  • Kila na kena dina. (Vosa Vakaibalebale 18:13) Ni dua e vakacudrui keda, e vinaka meda taroga, ‘Sa matata vei au na ka kece e rairai vakavuna me cakava kina ya? E curuoso beka nona vakasama? E sega beka ni nakita na ka e cakava?’ Eso na gauna eda rawa ni nanuma ni a nakita na ka e cakava, ia a rairai sega ni dina qori.

 Raicala me baleta na veisausaumitaki ni ca

Raicala: E vakadonuya na iVolatabu na veisausaumi ni kaya, “me isau ni mata na mata.”—Vunau ni Soro 24:20, Contemporary English Version.

Ka dina: Na lawa ni “isau ni mata na mata” era muria na Isireli ena gauna makawa, e sega ni uqeta na veisausaumitaki ni ca. E vukei ira ga na turaganilewa ena gauna ya mera tauca na itotogi veiganiti. *Vakarua 19:15-21.

Raicala: E sega ni vakadonuya na iVolatabu meda sauma na ca, kena ibalebale eda sega ni rawa ni taqomaki keda.

Ka dina: Ke dua e via vakamavoataki keda, e tu noda dodonu meda taqomaki keda se qara nodra veivuke na ovisa. Ia e kaya na iVolatabu meda qarauna ena noda vinaka kece na ituvaki e rawa ni lai tini ena veivakamavoataki.—Vosa Vakaibalebale 17:14.

^ para. 3 O Jiova na yaca ni Kalou ena iVolatabu.

^ para. 8 Mo kila eso tale na ka, raica na ulutaga Cava na iBalebale ni “iSau ni Mata na Mata?