Raica sara na lewena

Na Cava e Kaya na iVolatabu me Baleta na Lolo?

Na Cava e Kaya na iVolatabu me Baleta na Lolo?

Kena isau vakaivolatabu

A vakadonuya na lolo na Kalou ena gauna vakaivolatabu ke donu na kena inaki. E cata ga na lolo e cala na kena inaki. Ia e sega ni vakarota se vakatabuya na iVolatabu me caka nikua na lolo.

Na ituvaki cava era lolo kina eso era cavuti ena iVolatabu?

  • Ni kerei na veivuke kei na veidusimaki ni Kalou. Era lolo na ilala era gole tiko i Jerusalemi, me vakaraitaka ni vu mai lomadra nodra kerea na veivuke ni Kalou. (Esera 8:​21-​23) Erau lolo ena so na gauna o Paula kei Panapasa ni bera ni rau lesi ira na qase ni ivavakoso.​—Cakacaka 14:23.

  • Vakaliuci na inaki ni Kalou. Ni papitaiso oti o Jisu, a lolo me 40 na siga me vakarautaki koya ina nona cakava na loma ni Kalou ni tekivu nona cakacaka vakaitalatala.​—Luke 4:​1, 2.

  • Me ivakaraitaki ni veivutuni ni valavala ca e dua. Ni vosa ena vukuna na Kalou na parofita o Joeli, a kaya vei ira na Isireli tawayalodina: “Ni lesu mai vei au ena lomamuni taucoko, ena lolo, ena tagi, kei na tagilagalaga.”​—Joeli 2:​12-​15.

  • Ena Siga ni Veisorovaki. E wili ena Lawa a solia na Kalou vei ira na Isireli, na ivakaro mera lolo ena Siga ni Veisorovaki e veiyabaki. * (Vunau ni Soro 16:29-​31) E veiganiti ena ituvaki qori na lolo mera kua ni guilecava kina na Isireli nira ivalavala ca ra qai vinakata na veivosoti ni Kalou.

Na lolo vakacava e cala na kena inaki?

  • Mera vakadrukai kina eso tale. A vakavulica o Jisu ni dodonu me lolo e dua vua na Kalou, sega vei ira na tamata.​—Maciu 6:​16-​18.

  • Me ivakaraitaki ni yalododonu. Na lolo e sega ni kena ibalebale ni yalododonu vakalevu cake e dua vei ira na kena vo.​—Luke 18:​9-​14.

  • Me iubi ni cala e nakiti qai vakayacori tiko ga. (Aisea 58:​3, 4) E vakadonuya ga na Kalou na lolo e salavata kei na talairawarawa, kei na veivutunitaki dina ni cala e vakayacori.

  • Vakarairai ga. (Aisea 58:​5-7) Me vaka ga e dua na itubutubu, e sega ni taleitaka na Kalou me vakarairai ga nodra lomani koya na luvena, qai sega ni vu mai lomadra.

E dodonu mera lolo na lotu vaKarisito?

Sega. A vakarota na Kalou mera lolo na Isireli ena Siga ni Veisorovaki. Ia sa sega tale ni gadrevi na solevu qori ni sa vakarautaka o Jisu na sala me bokoci kina vakadua nodra ivalavala ca o ira na veivutuni. (Iperiu 9:​24-​26; 1 Pita 3:​18) A okati ena lawa e soli vei Mosese na Siga ni Veisorovaki, ia era sega ni vauci ena lawa qori na lotu vaKarisito. (Roma 10:4; Kolosa 2:​13, 14) Era na vakatulewataka yadua gona na lotu vaKarisito mera lolo se kua.​—Roma 14:​1-4.

Era kila na lotu vaKarisito ni sega ni ka bibi duadua ena nodra sokalou na lolo. E sega ni kaya na iVolatabu ni vakatau ena lolo na marau. E kaya ga ni dua na ivakatakilakila ni lotu vaKarisito dina na marau, e itovo tale ga i Jiova na “Kalou mamarau.”​—1 Timoci 1:​11; Dauvunau 3:​12, 13; Kalatia 5:​22.

Rai cala me baleta na lolo

Rai cala: A vakatututaka na lolo na yapositolo o Paula vei ira na veiwatini lotu vaKarisito.​—1 Korinica 7:5, King James Version.

Ka dina: Ni laurai na ivolavivigi makawa ni iVolatabu, e sega ni cavuti na lolo ena 1 Korinica 7:5. * Era rairai vakuria na vakasama qori o ira era lavetaka na iVolatabu, era cakava qori ena 1 Korinica 7:5, Maciu 17:21, Marika 9:​29, kei na Cakacaka 10:30. E sega ni cavuti na lolo ena veitikinivolatabu qori ena levu na vakadewa ni iVolatabu nikua.

Rai cala: Mera lolo na lotu vaKarisito me ivakananumi ni 40 na siga a lolo kina o Jisu ena vanualiwa ni papitaiso oti.

Ka dina: A sega ni vakarota o Jisu na lolo va qori, e sega tale ga ni tukuni ena iVolatabu nira cakava na lotu vaKarisito taumada. *

Rai cala: Mera lolo na lotu vaKarisito nira vakananuma na mate i Jisu.

Ka dina: A sega ni vakarota o Jisu mera lolo nona tisaipeli nira vakananuma na nona mate. (Luke 22:14-​18) A sega ni vakarota o Jisu na lolo ni tukuna eratou na lolo nona tisaipeli ena gauna e mate kina. A tukuna tiko ga e dua na ka ena yaco. (Maciu 9:​15) A veivakasalataki na iVolatabu vei ira na lotu vaKarisito era viakana, mera kana rawa mai vale ni bera nira solevutaka na iVakananumi ni mate i Jisu.​—1 Korinica 11:33, 34.

^ para. 8 A kaya na Kalou vei ira na Isireli: “Moni vakararawataki kemuni,” se “vakararawataka na yalomuni,” ena Siga ni Veisorovaki. (Vunau ni Soro 16:29, 31; King James Version) Qori e rairai vakaibalebaletaka na lolo. (Aisea 58:3) Sa rauta me vakadewataki va qo ena iVolatabu na Contemporary English Version: “Moni kua ni kana moni vakaraitaka kina ni oni rarawataka na nomuni cala.”

^ para. 19 Raica A Textual Commentary on the Greek New Testament, vola o Bruce M. Metzger, iKatolu ni iTabataba, tabana e 554.

^ para. 21 Ni vakamacalataka na solevu vakalotu (Lent) e dau caka kina na lolo me 40 na siga, e kaya na New Catholic Encyclopedia: “Ena imatai ni tolu na senitiuri, na lolo e dau tiki ni vakavakarau ina [Easter] qai rawa ni dua ga na macawa na kena balavu; levu na gauna e dua ga se rua na siga. . . . A cavuti ena imatai ni gauna na 40 na siga ni lolo ena ikalima ni lawa a vakatulewataki ena bose mai Nicaea (325), ia era veiletitaka eso na vuku ke vakaibalebaletaka dina ya na solevu vakalotu na Lent.”​—iKarua ni iTabataba, Volume 8, tabana e 468.