Raica sara na lewena

Na Website ni iVakadinadina i Jiova

Digia na Vosa vakaViti

Na Cava e Kaya na iVolatabu me Baleta na Vakamai ni Yagodra na Mate?

Na Cava e Kaya na iVolatabu me Baleta na Vakamai ni Yagodra na Mate?

Kena isau vakaivolatabu

E sega na idusidusi matata vakaivolatabu ena kena vakamai na yagodra na mate. E sega tale ga ni dua na ivakaro me baleta na bulu se vakamai ni yagodra na mate.

Ia e volatukutukutaka ga na iVolatabu nodra buluti ira na mate na dauveiqaravi yalodina ni Kalou. Kena ivakaraitaki, dua na ka nona sasaga o Eparama me vakarautaka e dua na vanua vinaka me bulu kina o Sera na watina.​—Vakatekivu 23:​2-​20; 49:29-​32.

E vakamacalataki tale ga ena iVolatabu nodra vakama na yago mate o ira na tamata yalodina. Kena ivakaraitaki, ratou vakamatei ena ivalu o Tui Saula kei ratou na tolu na luvena tagane, mani biu tu ga na yagodratou ena nodra vanua na meca, qai sega ni maroroi vinaka. Nira rogoca qori na dauvala yalodina ni Isireli, era lai kauta na yago i Saula kei na yagodratou na luvena, mera vakama qai buluta. (1 Samuela 31:​8-​13) E kaya na iVolatabu ni donu na sala era maroroya kina na yagodratou o Tui Saula kei ratou na luvena.​—2 Samuela 2:​4-6.

Rai cala me baleta na vakamai ni yagodra na mate

Rai cala: Na vakamai ni yagodra na mate e vakaraitaka ni sega ni dokai na yagodra.

Ka dina: E kaya na iVolatabu nira na suka tale mera kuvuniqele na mate, qori sara ga na ka e yaco ni sa vuca na yago mate. (Vakatekivu 3:​19) Na vakamai ni yagodra na mate e totolo kina me dravusa se kuvuniqele.

Rai cala: Ena gauna vakaivolatabu nira mate o ira era vakalecalecava na Kalou era na vakamai.

Ka dina: Eso era tawayalodina e vakamai na yagodra nira mate, me vakataki Ekani kei na nona vuvale. (Josua 7:​25) Ia e dau yaco vakavudua qori. (Vakarua 21:22, 23) Me vaka eda sa raica mai, e vakamai tale ga na yagodra mate eso era yalodina me vakataki Jonacani na luvei Tui Saula.

Rai cala: Ena sega ni veivakaturi na Kalou ni vakamai na yago mate.

Ka dina: Me baleta nodra vakaturi na mate, e sega ni dua na ka vua na Kalou ke bulu na yago, vakamai, yali e wasawasa, se kania na manumanu kila. (Vakatakila 20:13) Na Kalou Kaukaua Duadua e rawa ni bulia vou tale e dua sa mate.​—1 Korinica 15:35, 38.